Is Pregadorias antigas: su signo de sa devozioni - Provincia del ...

312
IS PREGADORIAS ANTIGAS - SU SIGNU DE SA DEVOTZIONI
custa Terra altzaus sa boxi cun sa Crésia Católica e naus cun allegria: Issa est esaltada
asuba de totus is Corus de is Àngiulus, sa Santa Mama de Deus, sa Biada Vírgini Maria;
Issa est fata digna de posseiri coment’e Reina sa prus ecelsa glória de su Regnu celestiali:
exaltata est Sancta Dei Genitrix super Choros Angelorum ad coelestia Regna.
Unu Babbunostu, tres Ave Marias, unu Gloria Patri.
Oratzioni a Gesugristu
Gloriosíssimu Gesús Redentori nostu! Siais eternamenti beneditu, poita chi esaltendu
Maria Mama Bosta, esaltais a su própriu tempus e pleneis de allegria sa Crésia
Isposa Bosta, de sa cali Issa est su prus gloriosu membru e sa prus nóbbili figura.
Poita chi in su celestiali Regnu Bostu est istabbiliu sa prus perfeta unidadi e sa prus
maravigliosa comunioni de is bènis e de is virtudis, de is gràtzias e de sa glória. E
ancoraschí intre is Santus, comenti intre is istellas de su firmamentu, nci siat distintzioni
de claredadi e de resplendori, nientidemancu totus partítzipant a is próprius
bènis e virtudis, a is próprias gràtzias e a sa própria glória; e is unus de su bèni prus
mannu de is àterus comenti de cosa própria insoru, profetant e gosant; e si a calincunu
si donat de prus, si donat po glória Bosta chi est bèni comuni, e po felitzidadi e
glória de totus. O mistériu de summu onori po Maria, e de infinita consolatzioni po
nosàterus! Issa prus de totus is àteras creaturas at arreciu de Bosu subrabbundàntzia
de gràtzias, e sublimidadi de glória; Issa in unioni cun is àterus membrus chi sunt is
Santus, ma meda prus de totus is àterus, resplendit luminosíssima in su Corpus místicu
de sa Crésia; prus copiosus ispandit asuba de totu su Corpus is inestimàbbilis
tesorus de sa Divina gràtzia, prus biva refletit s’allegria e s’eterna glória Bosta, e
comenti cun d-unu impetuosu torrenti de beatitúdini e de luxi bogau de su sinu Bostu,
felítzitat prus delitziosamenti sa santa Citadi de Deus. Aici de totu sa Crésia est s’onori
e sa glória de Maria, e totus is membrus de sa Crésia gosendu e beatifichendusí de is
summus bènis chi de Maria si difundint, làudant a Bosu, o Summu Gesús, chi Bosi
glorificais tantu altamenti in Issa, esaltant a Bosu, amant a Bosu, benedixint a Bosu
in eternu. Si, làudis e ringratziamentus, beneditzioni e glória a Bosu, amabbilíssimu
Redentori, poita chi non cuntentu de ai esaltada e glorificada immensamenti s’umanidadi
nosta in sa Divina Persona Bosta, collochendidha in su própriu Sóliu de sa
Divinidadi a sa dereta de su Eternu Babbu Bostu, dh’eis ancora tantu eminentementi
glorificada in d-una Sorri nosta sublimendidha a su Tronu prus onoríficu apustis de
su Tronu Bostu e esaltendidha a sa incomprensíbbili dignidadi de Reina de su Celu e
de sa Terra. Imoi cumplei, o bonu Gesús, ancora in nosàterus s’òpera Bosta, e inní
aundi regnais Bosu chi seis su Capu, regollei ancora is membrus; aundi eis esaltada e
glorificada sa Mama, condusei misericordiosamenti ancora is fillus.
Unu Babbunostu, tres Ave Marias, unu Gloria Patri.
Oratzioni a sa Vírgini Maria
Santíssima Vírgini Maria! Su mundu Bosi reconnoscit e Bosi gloríficat coment’e
Reina de su Celu e de sa Terra printzipalmenti de su soberanu poderi chi est
istétiu donau a Bosu de protègiri, de agiudai, e de salvai is pòberus fillus de