Is Pregadorias antigas: su signo de sa devozioni - Provincia del ...

Comune di Samassi
Bostu. Aici Bosu scerfais de su totu a su serpenti infernali sa conca, e a sa Divina
senténtzia donais su cumplimentu prus bellu cun allegria universali de sa Terra e de
su Celu. A su biri su gloriosu triunfu dèu pigu ànimu e esclamu: O inferru, aundi est
sa poténtzia tua?! O morti, aundi est sa vitória tua?! Ecu chi de sa sepultura essit sa
vida, de su logu de sa corrutzioni essit sa glória. No, su géneru umanu non at a mòrriri
po sèmpiri: issu ti at a bínciri, o morti; e in sa vitória sua t’at a assorbiri e annientai:
issu t’at a bínciri, o inferru, e in sa vitória sua non solamenti at a torrai a èssiri immortali
comenti fiat in printzípiu, ma bestiu de glória, tormentendudí tui de inútili ràbbia,
at a ocupai in su Celu cudhas sedis de is calis is superbus príntzipis tuus fiant istétius
iscaciaus. – Ma innòi Bosu, o Mama, cun su luminosu esemplu Bostu mi feis intèndiri,
chi po bínciri una dí cun custa gloriosa resurretzioni sa morti, est necessàriu bínciri
imoi su pecau, e scerfai, po nai aici, cudhu dultzi ingannosu, cun su cali su dimóniu
a pecai íntzitat e ispingit. O gloriosíssima Maria! Avaloraimí Bosu a custa vitória, e po
chi dèu potza apetigai coragiosamenti is diabbólicas lusingas, feimí gustai sa suavíssima
fragràntzia de is virtudis Bostas, e sa felitzidadi de is eternas celestialis delítzias.
Unu Babbunostu, tres Ave Marias, unu Gloria Patri.
Tertza dí - Esaltatzioni de Maria
Sa esata giustítzia, e soberana libberalidadi, cun sa cali Deus recumpensat segundu
su méritu is creaturas Suas, depiant tènniri preparada in su Celu po Maria sa recumpensa
prus bella chi nci fussit mai apustis de sa de Gesugristu. Issa fiat istada in sa
Terra sa prus úmilis serbidora de su Segnori: a Issa duncas fiat dépia sa esaltatzioni
prus manna in is Celus. Issa in sa valle de su plantu sa prus plena de amargura e de
doloris; duncas a Issa sa prus ecelsa consolatzioni, sa prus brillanti allegria in su
Paradisu. Issa in sa via de s’esíliu sa prus rica de donus e de méritus; duncas a Issa sa
prus ispléndida corona in su Regnu. Issa sa prus santa, sa prus perfeta non solamenti
intre is óminis mortalis, ma ancora intre is Àngiulus beatus; duncas a Issa asuba de
totus is Santus, e asuba de totus is corus de is Àngiulus sa prus sublimi esaltatzioni.
Issa sa prus unia sa prus íntima a su summu Rei Gesús, e po is vínculus de su sànguini
poita chi vera e digna Mama Sua, o po is sentimentus de s’ànimu poita chi sa prus
fideli de totus is creaturas, duncas a Issa su Tronu prus acanta a Gesús, e apustis de
Gesús sa suprema dignidadi, su supremu poderi de Reina in s’universu. Custas sunt
is régulas cun is calis sa suprema giustítzia e sa libberalíssima bondadi de Deus coronat
in is Santus is donus Suus e is méritus de sa fideli cooperatzioni insoru; aici est
istétiu po sa prus santa de totus Maria cun magnificéntzia chi etzedit dógnia pensamentu
creau. Est elevada Issa duncas in is Celus de luxi in luxi, de glória in glória, de
sublimidadi in sublimidadi; passat is Órdinis de is Vírginis e de is Confessoris, de is
Patriarcas e de is Profetas, de is Màrtiris e de is Apòstolus; bandat asuba de totus is
Angélicas Gerarchias; e casi nessunu límiti ponendu a sa elevatzioni Sua ndi benit
fintzas a su sóliu de sa Divinidadi, e est fata sètziri a sa dereta de su Divinu Fillu Suu.
Is Santus e is Àngiulus cuntemplant totus cun maravíglia is amabbilidadis, is
gràtzias, is incantadoras bellesas de Issa; e totus a Issa reverentis s’inclinant, e a sa
esaltatzioni de Issa totus aplàudint, esclamendu: Issa nd’est digna: a Issa apustis de
Gesús s’onori, sa beneditzioni, sa glória, po totus is séculus. E nosàterus ancora de
311