Is Pregadorias antigas: su signo de sa devozioni - Provincia del ...

Comune di Samassi
vida ispirituali ch’Issu teniat in s’ànima mia. Ahi! chini m’at a donai dolori e làgrimas,
po chi in su restanti de sa vida mia dèu pràngia sa ingratitúdini mia contra a su
Segnori e Deus miu? De Bosu dhu dimandu, o cara Mama addolorada: Fac me Tecum
pie flere, Crucifixo condolere, donec ego vixero.
Unu Babbunostu, tres Ave Marias, unu Gloria Patri.
Tertza dí
Considereus oi unu nou dolori in Maria chi perdit s’amau Fillu Suu Gesús. Fidelíssima
osservadora de sa Divina Lei bandat Issa dogni annu cun s’Isposu Suu Giusepi de
Nàzaret a Gerusalemmi po adorai in su Templu de su Segnori in sa solenni festa de sa
Pasca portendinci cun Sèi ancora su pipiu Gesús. Imoi ecu chi candu Gesús est in is
doxi annus, apustis cumplias in su Templu in tali ocasioni cun is parentis Suus is
sólitas pràticas de religioni, torrendu issus a Nàzaret, si separat de sa cumpangia
insoru e abbarrat in Gerusalemmi, sentza ch’issus si ndi acatint po totu una dí. Ma
connota a su mericedhu sa mancanza de Gesús, chini podit cumprèndiri sa dolorosa
ferida ch’issus ndi sentint in su coru? Ahi! sentza Gesús non podint bíviri unu solu
istanti. Si dònanta súbbitu a dhu circai intre is parentis e is amigus chi viagiànt cun
issus, torrant a Gerusalemmi, e plenus de afannu bandant osservendu in is arrugas de
sa Citadi e domandendu in is domus de is connoscentis po agatai su pérdiu tesoru, ma
nisciunu scit donaindedhis novas: et requirebant Eum inter cognatos et notos; et non
invenientes regressi sunt in Jerusalem requirentes Eum (Luc. 2. 44. 45). Si bit insaras
po sa prima borta verificada in totu sa perfetzioni sua sa penosa sollítzita circa de sa
vera sposa de is Cànticus: surgam et circuibo civitatem: per vicos et plateas quaeram
quem diligit anima mea: quaesivi Illum et non inveni (Cantic. 3. 2). O cali dolorosa
circa est custa mai? Non timint già is santíssimus isposus po sa sorti de Gesús, isciendu
bèni ch’Issu est su Fillu Unigénitu de Deus e chi nienti dhi podit sutzedi de mali
contra sa voluntadi Sua? Ma po sèi etotu issus timint e si afligint, pensendu in sa
umilidadi insoru èssiri indignus de custoiri prus a longu su celestiali tesoru, o de
dh’ai forsis displàxiu cun calincuna pagu atenta e pagu respetosa manera.
Maria no agatat custu colpu inaspetau in sa dolorosa Profetzia de Simeoni, ne in is
Profetzias de is antigas Iscrituras, e no scit cumprèndiri cali ndi potzat èssiri sa càusa.
Contínuat Issa duncas cun amarga intzertesa is diligéntzias Suas in cumpangia de
Giusepi, e non pigat reposu, e non si donat paxi, fintzas a chi in sa tertza dí non dh’est
cuntzédiu de agatai su stimau Fillu in su Templu de su Segnori.
Unu Babbunostu, tres Ave Marias, unu Gloria Patri.
Oratzioni a su Eternu Babbu
Santíssimu Eternu Babbu! Est providéntzia Bosta chi Maria e Giusepi cun d-una
disatentzioni de su totu innotzenti non s’acatint po totu una dí de sa mancantza de
Gesús, po chi custu Fillu Bostu Incarnau andendusindi a su Templu sentza nd’isciri is
parentis Suus po nci tratai is interessus de sa glória Bosta, imparit a is fillus Cristianus
chi candu si tratat de si consagrai a su servítziu Bostu in d-unu stadu prus perfetu,
non depint circai sa voluntadi de is Babbus terrenus; e a su própriu tempus imparit a
293