Is Pregadorias antigas: su signo de sa devozioni - Provincia del ...

292
IS PREGADORIAS ANTIGAS - SU SIGNU DE SA DEVOTZIONI
paisu prus superstitziosu de su mundu, comenti est s’Egitu, aundi fendu cun sa preséntzia
Sua arrúiri is ídolus e isvanèssiri is òperas de su dimóniu, at a suscitai in brevi
unu pópulu de santus Anacoretas e de austeríssimus Cenobbitas chi at a èssiri s’ammiratzioni
de sa Terra e de su Celu. Fuit, e annuntziendu cun sa fuida Sua su próssimu
terríbbili abbandonu de s’ingratu pópulu Ebreu de su cali si partit, annúntziat a su
própriu tempus sa misericordiosa vocatzioni de is Gentilis in mesu de is calis si refúgiat.
Fuit, e cun s’esemplu de sa fuida Sua imparat a is Fidelis Suus a pigai is médius
prus ordinàrius e ancora is prus úmilis e oscurus po cumpliri is òperas de su Segnori
ancora is prus etzelsas; a triunfai de sa ingiustítzia de is óminis non già cun sa supérbia,
ma cun sa umilidadi e cun sa passiéntzia; a non si crèiri abbandonaus de Deus
candu si binti calincuna borta obbligaus a cèdiri in aparéntzia a su furori de is inimigus
insoru. O cantus finis de misericórdia e de saludi teneis e manifestais, o Deus
miu, in sa penosa e umilianti fuida de s’Unigénitu Fillu Bostu Incarnau! Po cussu
unendumí po compassioni a is doloris de Maria in custu amargu passu e addolorendumí
cun Issa, adoru sa piedadi e sa sapiéntzia Bosta. Bosi ndi torru umilíssimas
gràtzias, e Bos pregu vivamenti chi mi ndi fatzais profitai po sa salvatzioni mia.
– Unu Babbunostu, tres Aves Marias e unu Gloria Patri.
Oratzioni a Maria Addolorada
Afligidíssima Vírgini Maria! Dèu bengu cun su devotu pensamentu a Bosi acumpangiai
in sa penosa fuida Bosta, e pustis mi abbarru cun Bosu in s’Egitu. Biu is penas de
sa poberesa e de sa solitúdini chi Bosi angústiant in custu esíliu, ma cumprendu chi
non sunti custus is printzipalis motivus de s’internu dolori Bostu. Bosu Bos afligeis
asuba de Gesús poita chi dhu bieis disconnotu e refudau de su Pópulu Ebreu; e meda
Bos afligeis ancora asuba de custu Pópulu, chi est Pópulu Bostu, biendidhu cúrriri a
grandus passus a s’última ruina po s’abbandonu chi bandat meritendusí de sa manu
de Deus. O cantu amargu est po Bosu su pensai in custa solitúdini comenti cussu
Pópulu ingratu iat negau un’allógiu a su Salvadori Suu nascenti in Betlèm, ne si fiat
incurau de dhu reconnòsciri e de dhu adorai debustis nàsciu; comenti antzis a su
intendirindi sa notítzia de is Reis de s’Orienti in Gerusalemmi si fiat totu conturbau;
e comenti dh’iat fatu fuiri cun su ferotzi decretu de morti fatu de su crueli Erodes. E
si furriais is ogus a s’Egitu in su cali biveis, àteru non bieis che unu pópulu inimigu
po is abbominatzionis e idolatrias suas. E si amargu Bosi est su passau e su presenti,
meda prus amargu Bosi est su pensamentu de is doloris chi depint sutzèdiri in su
tempus chi at a bèniri. Ahi! chini Bos at a consolai in custa terra allena, o Vírgini filla
de Sionni? Veramenti teneis raxoni de repítiri po Bosu sa dolorosa paràula de Geremias;
Su Segnori m’at postu in custa terra deserta e arida, e innòi mi tenit desolada e
plena de amargura: posuit me desolatam, tota die moerore confectam (Jerem. trhen.
1, 13). Ma consolaiosí puru, o Vírgini benedita! Già chi teneis cun Bosu su Divinu
Gesús chi fait is delítzias de su Paradisu; e sa glória de Issu no at a tardai a resplèndiri
impari cun sa glória Bosta asuba de totus is Pópulus de sa Terra. Seu dèu chi depu
afligirimí e pràngiri amargamenti, poita chi seu dèu, chi peus ancora de su ingratu
Pópulu de Israeli, apu fatu fuiri prus e prus bortas su Salvadori miu scacendidhu de su
coru miu. E seu dèu, chi, peus ancora de su crueli Erodes, ndi dh’apu pigau sa bella