Is Pregadorias antigas: su signo de sa devozioni - Provincia del ...

288
IS PREGADORIAS ANTIGAS - SU SIGNU DE SA DEVOTZIONI
Setenàriu in onori de Maria Santíssima Addolorada 376
In Nòmini de su Babbu, e de su Fillu, e de s’Ispíridu Santu. Amen.
Atu de Contritzioni
Misericórdia, o Segnori! Nosu miseràbbilis pecadoris nosi penteus cun totu su coru
de is pecaus nostus. Nosi ndi penteus po is bènis chi eus pérdiu, e po is malis chi eus
merésciu pechendu. Ma printzipalmenti nosi ndi penteus poita chi eus oféndiu unu
Deus aici bonu e aici amàbbili comenti seis Bosu. Boliaus èssiri mortus innantis de
Bos ai oféndiu e proponeus cun s’agiudu de sa gràtzia Bosta de no Bos ofèndiri mai
prus, poita chi Bos amaus prus de totus is cosas.
(Aici si donat printzípiu dógnia di).
Prima dí
Trista e in grandu lutu sa Crésia in custu Santu tempus avisat is Cristianus fillus suus
chi acumpangint devotamenti a Gesús e Maria in sa dolorosa Passioni insoru. A custu
piedosu avisu nosu cun su coru penetrau de dolori ndi beneus a is peis Bostus, o
Mama afligidíssima, po cumpliri custa sagrada obbligatzioni. Bosu agiudai sa debbilesa
nosta a cumprèndiri in custu altíssimu mistériu is disignus de su Segnori; e de su
profundu mari de s’amargura Bosta dignaiosí versai calincuna guta in is corus nostus,
po chi santamenti nos addoloreus e prangiaus cun Bosu. 377
Maria iat cumentzau a èssiri addolorada de candu iat cumentzau a èssiri efetivamenti
Mama de Gesús. Poita chi bèni addotrinada coment’Issa fiat in is Divinas Iscrituras
iat connotu fintzas de insaras chi totus is umiliatzionis e is penas de su promítiu
Messias registradas de is Profetas in is libbrus Santus depiant arrúiri asuba de su
beneditu Frutu ch’Issa portaiat in su sinu Suu. Ma custu segretu dolori de sa sant’Ànima
de Maria iat arriciu un’aumentu sentza misura in su Templu de Gerusalemmi.
Si presentat inní Maria in cumpangia de s’isposu Suu Giusepi, cuaranta dis apustis
de su partu Suu segundu sa lei de Moisès, oferit a s’Eternu Babbu su pipiu Suu
Gesús, e ascurtat cun ammiratzioni is grandus cosas chi si pubblicanta de Issu. Ma
ahi! Su santu béciu Simeoni tenendu in is bratzus suus su celestiali Pipiu, apustis de
is beneditzionis e is glórias, pigau severu e proféticu tonu, narat a sa Mama: custu
Fillu Tuu, o Maria, est postu in Israeli po sa ruina e po sa resurretzioni de medas, e
coment’e unu signali contra su cali ant a èssiri dirígias is contraditzionis de is óminis;
e Tui etotu ndi as a tènniri s’ànima traspassada comenti de un’ispada: et Tuam ipsius
animam pertransivit gladius (Luc.2.35). Maria sentit su pesu de custas dolorosas
paràulas chi no ndi essint mai prus de su coru; e meditendidhas dí e noti, e confrontendidhas
cun is profetzias de is Libbrus Santus, àteru non bit in su dulcíssimu Fillu
Suu Gesús, che una vítima destinada de sa Divina Giustítzia a is flagellus, a is obbilus,
a sa gruxi, a sa morti; de manera chi totus is amabbilidadis de custu Divinu Fillu
innotzentíssimu si convertint a is ogus de sa Mama in argumentu de intensu dolori. Si
uniformat Issa, est beru, cun perfeta umilidadi a is dispositzionis de Deus; ma custu
non impedit chi una profunda aflitzioni non dhi fatzat passai is annus gemendu e