Is Pregadorias antigas: su signo de sa devozioni - Provincia del ...

Comune di Samassi
Oratzioni a su Babbu Eternu
Santíssimu Eternu Babbu! Umiliau in su nienti miu adoru s’altíssima Magestadi Bosta,
e biu chi comenti una dí eis a bòlliri su sacrifítziu de su própriu Unigénitu Fillu
Bostu Gesús, aici bolleis su sacrifítziu de Maria Mamma Sua ancoras Pipiedha; poita
chi giustu comenti seis e perfetu, boleis uniformidadi de mistérius inter sa Mamma e
su Fillu; e po cussu dependu èssiri Issa impari cun su Fillu Conredentora de su mundu,
depit uniri su sacrifítziu Suu a su Sacrifítziu de su Fillu po su grandu Rescatu. E
comenti su Fillu cumentzat su sacrifítziu Suu a su primu intrai in custa vida in su sinu
de sa Mamma, aici sa Mamma dhu cumentzat in is primus annus Suus a su primu
cumpàrriri in su sagrau Templu Bostu, chi est su logu de sa immolatzioni de is vítimas.
Aici totu est in armonia, e fintzas sa diferéntzia de sa immolatzioni, poita chi su
sacrifítziu de su Fillu s’at a acabbai comenti a Issu cumbenit, in manera esterna violenta
e sanguinosa, mentras a su ministériu de sa Mamma cumbenit de correspòndiri
fintzas a s’últimu cun sacrifítziu internu silentziosu e incruentu. Intendeus duncas chi
su sacrifítziu de Gesugristu est su modellu e s’esemplari de totus is àterus sacrifítzius,
e chi essendusí a Bosu sacrificau Issu chi est su Personàgiu prus mannu e
prus santu de sa Terra e de su Celu, e cun Issu sa Mamma Sua Maria, non c’est prus
cosa ne persona chi no si depat a Bosu sacrificai reconoscenduosí coment’e supremu
Èssiri chi teneis asuba de totus interu domíniu, e chi seis Meri assolutu de sa vida e de
sa morti. A Bosu po cussu si sacríficat Abeli in su printzípiu de su mundu, a Bosu Isacu
in su progressu de is séculus; a Bosu is pillonis de s’ària, is animalis de is campus, e is
cosas inanimadas; a Bosu si sacríficant is Màrtiris in s’orríbbili pompa de is suplítzius,
e is austerus penitentis in s’ocultu siléntziu de is solitúdinis, e is chi sunt is penosus
ministérius consumendusí lentamenti in is trabballus insoru. Totu depit èssiri sacrificau
a Bosu. Imparainosí, o Eternu Babbu, a Bosi ofèrriri in sacrifítziu impari cun su sacrifítziu
de Gesús e de Maria, s’ànima e su corpus nostu cun totus is poténtzias e is sentidus
nostus, in manera chi siat óstia santa, immaculada, atzeta a is Divinus ogus Bostus.
Unu Babbunostu, tres Ave Marias, unu Gloria Patri.
Oratzioni a Maria Santíssima
Santíssima Vírgini Maria! su sacrifítziu Bostu a s’intrada in su Templu est preparatzioni
a is àterus sacrifítzius de sa vida Bosta cun is calis depeis uniriosí a su Divinu Fillu
Bostu Gesús po su Rescatu de su mundu. Poita chi, ancoras chi non dhu scipiais distintamenti,
Bosi assugetais cun sa dispositzioni de s’ànimu a is penas de sa Gruta de
Betlèm, a s’ispada de dolori chi at a èssiri annuntziada de Simeoni, a is angustias de
s’esíliu in s’Egitu, a is privatzionis de sa poberesa, a is amarguras po sa persecutzioni
contra a Gesús, a sa pérdita de s’Isposu e de su Fillu, a is doloris de su Calvàriu, a is
tristuras de sa solitúdini. A totu Bosi assugetais sentza reserva, candu a s’intrada in su
Templu, su Satzerdotu, ponenduosí is manus asuba de sa conca, pigat possessu de Bosu,
comenti de una vítima a nòmini de Deus. Custu sacrifítziu est ancoras esemplu luminosu
a dógnia Cristianu poita chi po sa continua mortificatzioni interna e esterna in sa cali
issu depit bíviri, sa vida sua depit èssiri totu sacrifítziu, gruxi, e martíriu. Finalmenti
custu sacrifítziu Bostu est luminosu esemplari e modellu de sa vida de annegatzioni e
de sacrifítziu chi s’at a introdúsiri in sa sotziedadi Cristiana cun su stabbilimentu de is
283