Is Pregadorias antigas: su signo de sa devozioni - Provincia del ...

Comune di Samassi
Sétima dí
Proponendu Maria de abbarrai sèmpiri in su Templu cun votu de perpétua virginidadi,
ancoraschí isciessit de incúrriri in su opróbbriu de s’isterilidadi, no depiat po
cussu crèiri chi non potzessit èssiri Mamma de su tantu disigiau Messias. Si custu
podiat èssiri errori de sa plebbi pagu istruia, non podiat èssiri de Maria chi ligiat e
meditàt is Divinas Iscrituras, e cun s’Ispíritu Suu illuminadíssimu ndi penetraiat is
sensus ancora ocultus. Imoi in cussus libbrus Divinus fiat istétia registrada de Isaias
cudha solenni profetzia chi narat: ecu chi sa Vírgini at a cuntzebiri e at a parturiri
unu Fillu chi at a tènniri su nòmini de Emanueli (Isai. 7,14). E Maria iat cumpréndiu
certamenti chi in cussas proféticas paràulas si fuedhàt de su Messias; e po conseguéntzia
iat cumpréndiu chi sa Mamma de su Messias depiat èssiri una Vírgini,
antzis sa Vírgini singulari, sa Vírgini po ecelléntzia, s’única e sola chi a su própriu
tempus chi iat a èssiri Vírgini, iat a dèpiri èssiri Mamma tantu afortunada. E po cussu
candu a s’annúntziu de s’Arcàngiulu Gabrieli iat inténdiu chi si tratàt de su Messias
Fillu de Deus, iat aferrau súbbitu su filu de su Mistériu, coment’e cosa chi non dhi
beniat de nou, poita chi dh’iat meditau e inténdiu in su famosu passu de Isaias. Su chi
fiat benniu de nou, coment’e cosa incredíbbili, fut ch’Issa etotu fiat sa Vírgini designada
de su Profeta: tantu sa menti Sua fiat atesu de crèiri chi unu bèni aici mannu
fussit po Issa! tantu fiat profunda e perfeta sa umilidadi Sua!
Unu Babbunostu, tres Ave Marias, unu Gloria Patri.
Oratzioni a su Babbu Eternu
Santíssimu Eternu Babbu! candu eis condúsiu a su sagrau Templu Bostu sa Pipiedha
Maria, e dh’eis inspirau su votu de perpétua Virginidadi, dh’eis consagrada visibbilmenti
a èssiri digna Mamma de s’Unigénitu Fillu Bostu, comenti dh’iais consagrada
invisibbilmenti fintzas de su primu instanti de s’immaculada Concetzioni Sua. Ma poita
mai nienti dhi donais a isciri de cust’altíssima destinatzioni Sua, e nemmancu ndi dhi
lassais passai in sa menti unu pensamentu? O cantu segretas e ammiràbbilis sunt is vias
in is calis conduseis is Santus, e ancora sa prus santa de totus is creaturas, sa Reina de
is santus, Maria! Custu est certamenti poita chi bolleis ch’issus si fatzant dignus cun sa
umilidadi insoru; essendu grandu lei istabbilia de sa sapiéntzia Bosta, chi eis a donai is
gràtzias a is úmilis e dhas eis a negai a is superbus, e chi chini si umíliat at a èssiri
esaltau, ma chini si esaltat in supérbia at a èssiri umiliau e aterrau. E comenti Maria
depiat èssiri digníssima de sa prus sublimi gràtzia e de su prus santu e altu mistériu, chi
fiat s’Incarnatzioni de s’Unigénitu Fillu Bostu in su sinu de Issa, aici bolleis ch’Issa
camminit in s’umilidadi sa prus perfeta, sa prus profunda, e si fatzat antizipadamenti
conformi a su própriu Fillu Bostu e Suu, su cuali si at a umiliai fendusí ubbidienti
fintzas a sa morti, e a sa morti de sa Gruxi. E de Pipiedha Issa Bos intendit plenamenti,
e comenti Primogénita de su coru Bostu pigat is paternus sentimentus bostus, e Bosu
feis is delítzias Bostas in custa ammiràbbili fidelidadi Sua. Ma e candu at a èssiri chi a
imitatzioni de Maria Bos intenda ancoras dèu, e Babbu celestiali, e mi assugeti a sa
grandu lei de sa umilidadi Cristiana, creendumí nienti, e cunfiendumí solamenti in
Bosu po mesu de Gesugristu Fillu Bostu, Mediadori, e Salvadori Miu?
Unu Babbunostu, tres Ave Marias, unu Gloria Patri.
281