Is Pregadorias antigas: su signo de sa devozioni - Provincia del ...

280
IS PREGADORIAS ANTIGAS - SU SIGNU DE SA DEVOTZIONI
sotziedadi de s’altíssimu órdini Teàndricu, e depit èssiri tipu e modellu de is virtudis
de sa Crésia Bosta. Ma po chi resplendat mellus sa Virginidadi de Maria Bosu
amais ch’Issa dha stabbilat cun atus próprius Suus, cun clara cognitzioni de menti,
e cun plena delibberatzioni de voluntadi, proferendu unu votu perpétuu e irrevocàbbili.
O cali bella e ammiràbbili armonia poneis Bosu, o Segnori, in is òperas e in is
mistérius Bostus! Fei chi non dha scuncerteus nosàterus cun vitziosus sentimentus
e cun malas òperas. Ma cun s’esemplu e po sa intercessioni de Maria, avalorai, o
Babbu celestiali, s’umana infirmidadi po mantènniri in vigori custa glória singulari
de sa Virginali puresa in is chi ndi arricint su pretziosu donu, e in is àterus po dha
imitai cun sa castidadi necessària a totus is chi si glóriant de su nòmini e de sa
professioni de Cristianus.
Unu Babbunostu, tres Ave Marias, unu Gloria Patri.
Oratzioni a Maria Santíssima
Santíssima Vírgini Maria! Cantu eminenti no est s’intelligéntzia Bosta, chi fintzas de
Pipiedha eis distintu chi sa Virginidadi est prus ecellenti de su matrimóniu, e chi
fendindi votu perpétuu, Bosu faiais cosa prus aggradàbbili a Deus! Po àteru in Israeli
non fiat praticada sa Virginidadi ne tenta in onori, ma in grandu onori fiat su matrimóniu;
e ancoras is Vírginis chi abbitànt in is apartamentus atacaus a su Templu, ndi
bessiant apustis de algunu annus po èssiri donadas a maridu; e Gesugristu Fillu Bostu
at a elevai una dí su matrimóniu a sa dignidadi de Sacramentu in sa Crésia Sua. Nienti
de mancu Bosu connosceis chi prus ecellenti e prus aceta a Deus est sa Virginidadi. O
cantu seis digna, o Maria, de èssiri Isposa de s’Ispíridu Santu, Deus de santidadi e de
puresa, e Mamma de s’eterna Sapiéntzia Incarnada! Certamenti su matrimóniu est
necessàriu in su comuni de is óminis po mantènniri in pei su géneru umanu fintzas a
chi fatzat su mortali cursu suu, po populai sa terra, po cumpliri su númeru de is eletus
in su Celu. E cun grandu misericórdia e sapiéntzia Gesugristu dh’at a elevai a sacramentu
po santificai cun gràtzias particularis s’orígini de is óminis, e is trabballus e is
penas de is Babbus e de is Mammas in su pesai e educai is Fillus. Ma cun custu no at
diminuiu po nienti s’ecelléntzia de sa Virginidadi. Issa est comenti su flori chi bessit
de is ramus prus eletus e prus sanus santificaus de su matrimóniu; e si su matrimóniu
est Sacramentu po agiudai cun is gràtzias particularis is cojaus in sa vida de su comuni
de is óminis, sa Virginidadi est donu prelibbau de su Babbu celestiali chi elevat a
s’órdini de is Àngiulus is chi ndi sunt decoraus. E aici dh’eis connotu Bosu, o Maria,
chi seis sa Reina de is Àngiulus, sa Reina de is Vírginis, candidíssimu lillu de Paradisu,
prus luminosa de su soli, prus pura de sa luxi. Nientidemancu in prémiu de sa
virtudi Bosta, a su própriu tempus chi eis a conservai in totu su resplendori sa glória
de sa Virginidadi, eis a tènniri ancora su veru matrimóniu cun totus is bènis suus; e a
imitatzioni bosta medas ant a mantènniri su virginali candori bàsciu su velu de unu
legítimu e santu matrimóniu. O prodígius! O miràculus! O glórias! de is calis Bosu, o
Maria, seis Mamma, primu esemplari e perfetu modellu. Ah! feinosí amai sa puresa
Bosta in manera chi dha copieus in calincuna manera in is personas, e in sa vida nosta.
Unu Babbunostu, tres Ave Marias, unu Gloria Patri.