Is Pregadorias antigas: su signo de sa devozioni - Provincia del ...

Comune di Samassi
Oratzioni a su Babbu Eternu
Santíssimu Eternu Babbu! Su sagrau Templu Bostu santíficat s’òru chi si nci
ponit po dhu adornai: s’Altari Bostu santíficat su donu chi si nci ponit po dhu
ofèrriri a Bosu: dhu narat Gesugristu Fillu Bostu in s’Evangéliu Suu (Matt. 23.
17. 19). Ma s’Arca de su Testamentu chi cunteniat is tàulas de Lei, su bastoni
floriu de Aronni cun sa manna misteriosa própia de su Celu, non teniat bisóngiu
de èssiri santificada de su Templu o de s’Altari, poita chi fiat santa a sèi etotu, e
faiat antzis prus santu e prus venerandu su logu prus reservau de su Templu chi
est Sancta Sanctorum, logu solu dignu de Issa. Custas benisí non sunti che figuras
e umbras. Sa vera Arca chi santíficat su Templu, est custa Pipiedha maravigliosa,
chi si presentat e si oferit a Bosu in su logu sagrau, poita chi non bastoni
o manna materiali o tàulas de perda, ma est fata po cuntènniri s’Autori biventi de
sa Lei e sa vera manna Divina, su veru pani vivu e vitali, su Fillu Bostu Incarnau,
veru Deus e veru Ómini; e Issa etotu est su veru Sancta Sanctorum, su Sacràriu
de s’Ispíridu Santu, totu santidadi e gràtzia totu luxi e candori. E Bosu, o Eternu
Babbu, bolleis, chi Issa si presentit e si ofèrgiat in su Templu, po chi acrescendu
a issu gràtzia e santidadi, dhu preparit e dhu fatzat prus dignu po arreciri su Divinu
Fillu Bostu Incarnau, chi una dí at a dèpiri èssiri presentau e ofertu in custu
própriu Templu. Aici mi feis intèndiri, o Segnori, chi a Bosu non plaxint is ofertas
de corus mundanus e corrúmpius de malas passionis, ancoras chi Bosi siant
fatas in su logu santu.
Unu Babbunostu, tres ave Marias, unu Gloria Patri.
Oratzioni a Maria Santíssima
Santíssima Vírgini Maria! Po Bosu non fiat necessària sa solenni oferta de Bosu
etotu in su Templu. Custa oferta intera puríssima, amorosíssima Bosu dh’iais fata
de su printzípiu de sa vida Bosta, est a sciri fintzas de sa Immaculada Concetzioni
Bosta, poita chi fintzas de cussu primu instanti, aendu arreciu plena cognitzioni e
intelligéntzia, Bosi fiais furriada a Deus e fata totu Sua cun atus próprius e delibberaus
de biva fidi, de firma sperantza, e ardenti caridadi, e in cussa beata dispositzioni
fiais istétia, sèmpiri fintzas a imoi, comenti eis a èssiri sèmpiri fintzas a sa
morti. Ma a prus de is àterus finis de sa Divina Sapiéntzia fiat necessàriu po esemplu
a su mundu e a totus is séculus, poita chi de su mundu e de is séculus depeis
èssiri Maista e Mamma. E già de su bellu esemplu Bostu ant imparau innumeràbbilis
turbas de féminas e de óminis a si cunsagrai a Deus non solamenti cun is internus
afetus de su coru, ma ancoras apertamenti in fàcia a su Celu e a sa Terra,
separendusí de su mundu profanu e retirendusí o in is solitúdinis de is desertus, o in
is monastérius, o ancora bivendu in mesu de su séculu comenti una generatzioni a
parti, sentza èssiri de su séculu. Continuai, o piedosa Maria; e cun s’esemplu e cun
sa protetzioni Bosta agiudai a si ofèrriri e a si cunsagrai de totu coru a Deus is
piticus fillus nostus po chi passint santamenti sa vida, e is mannus po chi si dispongant
santamenti a sa morti.
Unu Babbunostu, tres Ave Maria, unu Gloria Patri.
275