Is Pregadorias antigas: su signo de sa devozioni - Provincia del ...

Comune di Samassi
Novena po sa presentatzioni de sa Santíssima Vírgini Maria in su templu 365
In nòmini de su Babbu e de su Fillu e de s’Ispíridu Santu. Amen.
Oratzioni Preparatória
Umiliau ananti a s’altíssima Magestadi Bosta, o Eternu Deus, dèu Bosi adoru
comenti primu Printzípiu e últimu Fini miu. Bosi disígiu comenti summu Bèni
miu. Bosi torru infinitas gràtzias comenti a supremu Benefatori miu. Bos invocu
coment’e onnipotenti Protetori miu; Creu in Bosu, o Deus miu: avivai Bosu sèmpiri
prus sa fidi mia. Speru in Bosu: fortificai Bosu sèmpiri prus sa sperantza mia.
Amu a Bosu: acrescei Bosu sèmpiri prus in mei su Divinu amori Bostu. Mi pentu
cun totu su coru de Bos ai oféndiu, e propongu firmamenti de mi emendai e de
fuiri totus is ocasionis de pecai: agiudai Bosu sa debbilesa mia. E imoi donaimí
sa gràtzia de considerai devotamenti su Mistériu de sa Presentatzioni de Maria a
su Templu Bostu. E Bosu, o Maria, piedosíssima Mamma mia, assisteimí a dhu
fai santamenti a glória de Deus e a glória Bosta, e a profetu de s’ànima mia. (Aici
si donat printzípiu dógnia dí).
Prima dí
Intrendu a considerai is primus fatus chi sa veneranda traditzioni de sa Crésia nosi
fait isciri de sa Santíssima Vírgini Maria, s’ànima fideli totu si consolat e santamenti
si allirgat, comenti a vista de unu Paradisu de delítzias. Maria est arribbada apenas a
is tres annus de sa vida Sua, e sciendu chi su Babbu e sa Mamma Sua, is Santus
Giuachinu e Anna, iant promítiu de dha cunsagrai a Deus in su servítziu de su Templu
de Gerusalemmi, domandat e pregat chi custa promissa si cumplat, disigendu Issa
ardentementi de s’inserrai in su logu santu po stai arregorta totalmenti in Deus. Inní
at a bíviri in cumpangia de is devotas féminas chi abitànt in is apartamentus destinaus
po issas a costau de su Templu, trabballendu is robbas chi serbiant in is sagradas
funtzionis, e stendu bàsciu sa diretzioni de is santus Sacerdotus de su Signori. O
cantu sunti castus is primus afetus de su coru de custa predileta filla de su Monarca
de su Celu! O cantu sunti bellus is primus passus de Issa in d-una via totu de santidadi
e de luxi! Comenti sa columba essia de s’arca de Noè no scit istai foras de issa ne
agatat aundi pònniri su pei, aici custa candidíssima columba de Paradisu no scit istai
in su mundu profanu, ma suspirat de pipiedha a su niu de su logu sagrau, bolat cun is
disígius Suus a si reposai in su sinu de su Segnori.
Unu Babbunostu, tres Ave Maria, unu Gloria Patri.
Oratzioni a su Babbu Eternu
Santíssimu Eternu Babbu! Seis Bosu chi cun providéntzia totu particulari dirigeis
totus is passus de sa Primogénita Filla Bosta Maria. E non podiat èssiri diversamenti.
Apustis chi Bosu dh’iais predestinada ab eterno a èssiri sa prus digna de
totus is creaturas, sa Sposa de su Divinu Ispíritu Bostu, sa Mamma de su stimau
271