Is Pregadorias antigas: su signo de sa devozioni - Provincia del ...

Comune di Samassi
Sétima dí - Oratzioni
Gloriosíssima Abbogada mia Sant’Anna, chi po cumpliri dignamenti is partis de
Mamma in elígiri a tempus oportunu un’isposu dignu de Maria Santíssima Filla bosta,
festis recurta cun fervorosa oratzioni a Deus, domandendiridhi no un’ómini ricu
e de calidadis cunfacentis a promovi s’ambitzioni e sa vanidadi, ma unicamenti chi
fessit plenu de santas virtudis e dignu cumpàngiu de sa virtuosíssima Filla bosta, bosi
pregu chi cun s’intercessioni bosta mi alcantzeis luxi de su celu, po elígiri sèmpiri in
is delibberatzionis mias su chi est prus cumbenienti a su bèni de s’ànima mia, sentza
lassaimí sedúsiri de su vanu isplendori de custus bènis mundanus, chi sunt de imbaratzu
a sa vera felitzidadi. Aici siat.
Si domandit sa gràtzia.
Antiphona
Otava dí - Oratzioni
Gloriosíssima Abbogada mia Sant’Anna, chi in sa felitzíssima morti bosta eis tentu sa
bella sorti de tènniri acanta s’amantíssima Filla bosta e Reina de is Àngelus Maria, e
fuedhai amorosamenti cun Issa algunu tempus, e istendu in is bratzus suus esalai s’ànima
in manus de su Creadori bostu; po custu favori singulari, chi eis arriciu de su celu,
bosi súplicu chi in s’ora de sa morti mia tenga po intercessioni bosta s’assisténtzia de
Filla bosta Santíssima e Mamma de is pecadoris Maria, poita chi po sa intercessioni sua
passit s’ànima mia de is bratzus suus in is manus de su Divinu Redentori miu. Aici siat
Si domandit sa gràtzia.
Antiphona
Nona dí - Oratzioni
Gloriosíssima Abbogada e Protetora mia Sant’Anna, chi pustis de una glória sustantziali
po sa cali totus is santus sunt perfetamenti beatus in su Paradisu, gosais ancora una singulari
glória po s’èssiri umanau su Verbu divinu in sa discendéntzia bosta, e generau comenti
ómini de su própriu sànguini bostu trasfúndiu in sa Santíssima Vírgini Filla bosta; dèu
bosi pregu, amorosíssima Abbogada mia, chi unidamenti a is onoris chi arriceis in su celu
de totu sa corti tzelestiali coment’e Mamma de Maria bosi digneis de atzetai custus atus
de ossécuju chi in signali de sa divotzioni mia bos apu ofertu in custas noi diis: bosi pregu
medianti su potenti patrocíniu bostu a otennimí sa gràtzia de imitai is virtudis bostas
uniformendimí aici in is pròsperus, comenti in is contràrius avenimentus, a sa divina
voluntadi, poita chi cumplendu a is doveris de bonu cristianu, e de divotu bostu, potza
apustis in cumpangia bosta alabai e gosai a Deus eternamenti. Aici siat.
Si domandit sa gràtzia.
Antiphona
FINI
Anno 1861
Palmerio Garau Parroco
265