Is Pregadorias antigas: su signo de sa devozioni - Provincia del ...

246
IS PREGADORIAS ANTIGAS - SU SIGNU DE SA DEVOTZIONI
Oratzioni a Maria Immaculada
Puríssima Vírgini Maria! Imoi intendu su chi boliat significai s’Arcàngiulu Gabrieli,
candu annuntziendu a Bosu s’Incarnatzioni de su Verbu Eternu in su sinu
Bostu Bos iat nau chi Bosu iais agatau gràtzia in Deus: invenisti enim gratiam apud
Deum (Luc. 1.30). Sí, dh’intendu. Bosu, o Maria, eis agatau atzetatzioni e aggradessimentu
summu in Deus, poita eis agatau su pretziosu tesoru de sa gràtzia Sua;
e eis agatau custu pretziosu tesoru aundi is àterus fillus de Adamu dh’anta sèmpiri
pérdiu. Ah! in su primu instanti de sa vida, in su primu èssiri contzebiu in su sinu de
sa Mama, dógnia Ómini, oh dolori! perdit sa gràtzia de su Creadori suu, e in cussu
puntu, po su pecau originali, benit ghetau in sa massa de sa comuni perditzioni, est
fatu fillu de s’ira de Deus, ne àteru méritat che s’ódiu e sa dannatzioni eterna.
Custa est sa trista sorti de totus nosàterus. Ma Bosu, o Maria, Bosu non timeis de sa
parti de Deus ne de ódiu, ne de ira, poita chi eis agatau in cussu primu instanti sa
gràtzia de Issu. Fortunada Maria! E tantu prus afortunada, in cantu chi non po Bosu
sola eis agatau atzetatzioni e gràtzia, ma ancora po nosàterus pecadoris; e tanta
nd’eis agatau chi su bellu títulu eis merésciu de printzipali Abbogada nosta debustis
de Gesugristu. Bosu duncas, o bella agatadora de sa gràtzia, cun su frutu beneditu
de is intragnas Bostas eis a istesiai de nosàterus sa giusta ira de Deus, e cun is
virginalis manus Bostas eis a sustènniri is débbilis passus nostus in sa via periculosa
de custa vida: invenisti enim gratiam apud Deum. Po is bisòngius presentis cun
filiali cunfiantza Bos invocaus, e po is bisòngius estremus de sa morti nosta. Bosu
nos eis a fai provai is abbundantis misericórdias de Fillu Bostu Gesugristu Segnori
nostu, poita chi seis clementi, piedosa, amorosíssima, o benedita e dulcíssima Abbogada
e Mama nosta, Vírgini Maria.
Unu Babbu nostu, tres Ave Marias, unu Gloria Patri.
Nona e última dí
Sa soberana puresa de Maria in s’Immaculada Concetzioni Sua ancoras chi totalmenti
prodigiosa e sentza esemplu, non cumparit benisí tantu noa a su mundu, chi
de su mundu ancora non si depessit aspetai. Deus Segnori de is tempus e de is
cosas, chi de s’eternidadi s’iat elígiu Maria a Filla Primogénita, a Mamma, e a
Isposa, e chi si cumplaxiat de Issa in manera inesplicàbbili innantis ancora ch’Issa
esistessit, iat bófiu annuntziaidha in dogna tempus a is Óminis cun profetzias, cun
misteriosas immàginis, e cun figuras. Sa fémina forti chi depiat iscerfai sa conca de
su serpenti, promítia de su própriu Deus in su Paradisu terrestri; cudha fémina
singulari chi totu Vírgini e pura depiat contzebiri unu Fillu ammiràbbili, prenuntziada
de su Profeta Isaias; una Ester sola esentada de su decretu generali de morti
fatu contra su Pópulu Ebreu; una Giudita chi sola assaltat su comuni tirannu e dhu
bincit; de àtera parti, s’arca chi sola e segura istat asuba de is àcuas de su dilúviu
universali in is calis dógnia àtera cosa si perdit; s’arrú chi in mesu de is flammas
abbarrat floridu e no si abbruxat; sa pedhi de Gedeoni imoi asciuta in mesu de unu
campu bagnau, imoi bagnada in mesu de unu campu asciutu; s’arca de su Testamentu
totu formada de linna incorrutíbbili; cudhu monti asuba de totus is montis;