Is Pregadorias antigas: su signo de sa devozioni - Provincia del ...

244
IS PREGADORIAS ANTIGAS - SU SIGNU DE SA DEVOTZIONI
cumparsa Bosta. Poita chi cumpareis comenti Reina ingiriada de luxi, plena de
delítzias, cun Deus Babbu chi Bosi at fatu Filla Primogénita, cun Deus Fillu chi Bosi
at bófiu a Mamma, cun Deus Ispíridu Santu chi Bosi at elígiu a Isposa: Dominus
Tecum. E comenti su pecau introdúsiu de su dimóniu in su mundu, casi velenu
dissolventi e distrugidori, iat segau s’órdini e su concadenamentu de is beridadis
chi de printzípiu liganta s’Ómini a Deus e formanta s’ammiràbbili disignu de Deus
asuba de s’Ómini; aici in su èssiri Bosu contzebia sentz’alguna corrutzioni o mància,
totu si torrat a uniri e ordinai; e Bosu seis in cussu primu beatu instanti comenti
s’anedhu de totus is mistérius, comenti sa luxi de totus is beridadis. Poita chi sa
cognitzioni de Deus Unu e Trinu, sa soberanidadi de su Creadori e sa totali dependéntzia
de sa creatura, su pecau e sa ruina de s’Ómini, su netzessàriu e maravigliosu
Rescatu po mesu de su Verbu Incarnau, sa gràtzia e sa giustificatzioni, su Celu e
s’inferru, sa vida e sa morti eterna, totu est collegau intimamenti cun s’Immaculada
Concetzioni Bosta; e totus is erroris contra custas capitalis beridadis sunti cun sa
biva luxi de issa cundennaus e destruius. O cantu sunti ammiràbbilis is primus
passus Bostus in sa via de sa luxi, o bella Segnora! O cantu esaltaus nosàterus a
Bosi biri aici vitoriosa fintzas de su primu instanti! O cantu depeis gosai e esultai in
Deus ancora Bosu, o Maria! Sí, gaude, Maria Virgo, gaude: cunctas hereses sola
interemisti in universo mundo. Comenti de su soli fuint is tènebras, aici de sa biva
luxi Bosta sunt obbligaus a fuiri is tenebrosus ispíritus infernalis cun totus is fràudis
e ingannus insoru. Aici Bosu, o Vírgini benedita, besseis a sa vida coment’e
celestiali eroina a cumbàtiri e bínciri s’inferru, e innumeràbbili esércitu de sordaus
devotus Bostus pigais e avalorais a sa grandu gherra. Ah! poita no eus a èssiri
nosàterus in mesu de custus afortunaus gherreris? Poita non pigaus is armas Bostas,
o Maria, sa umilidadi, sa puresa, sa custódia de is sentidus, s’oratzioni contínua,
sa santidadi? Donai, o Mama valorosíssima, donai a dognunu de is fillus Bostus
fortza e coràgiu po si bestiri de custas armas de luxi, e po cumbàtiri gloriosamenti
contra is inimigus Bostus: da mihi virtutem contra hostes tuos.
Unu Babbu nostu, tres Ave Marias, unu Gloria Patri.
Otava dí
Maria non solamenti depiat cumpàrriri fintzas de su primu instanti valorosa inimiga
e gloriosa triunfadora de s’inferru, ma tali ancora chi fussit digna de fai de Abbogada
po is pecadoris a su tronu de Deus. No, no est beru chi Gesugristu escluat dógnia
àteru intercessori cun su Eternu Babbu Suu. Issu est certamenti s’únicu Redentori de
is creaturas Suas, s’únicu Mediadori, su Supremu Pontífitzi chi pacíficat e reconcíliat
su Celu cun sa terra, is Óminis cun Deus; est su fonti immancàbbili de totus is
gràtzias chi s’ispargint asuba de is creaturas. Ma s’infinita misericórdia de Deus po
donai prus abbundantis is médius de sa saludi, at bófiu chi is gràtzias e is méritus de
custu soberanu Redentori s’ispargessint in totus is Santus, in chini prus, in chini
mancu, po chi fatus ancoras issus intercessoris e mediadoris a nòmini de Gesugristu,
agiudessint is pecadoris a si elevai a Issu, e po mesu de Issu a Deus. Ammiràbbili
economia, chi magníficat sa poténtzia e sa glória de su Redentori, e multíplicat is