Is Pregadorias antigas: su signo de sa devozioni - Provincia del ...

242
IS PREGADORIAS ANTIGAS - SU SIGNU DE SA DEVOTZIONI
Oratzioni a Maria Immaculada
Puríssima Vírgini Maria! Dèu adoru su misteriosu isposalítziu, cun su cali s’Ispíridu
Santu destinau a Isposu Bostu de totu s’eternidadi, Bosi fait vera Isposa Sua in su
tempus. Miru cun maravíglia e stupori s’abbissu de soberana grandesa a sa cuali
custu títulu gloriosu Bosi elevat. E intendu chi Bosu non seis istétia Isposa insaras
solamenti candu s’Ispíridu Santu est beniu asuba de Bosu po cumpliri s’Incarnatzioni
de su Verbu Eternu, ma benisí de su primu instanti de su èssiri Bostu. Poita chi dependu
Bosu contzebiri spiritualmenti su Verbu Eternu innantis de dhu contzebiri corporalmenti,
dh’eis contzebiu in su coru Bostu prevénia de s’Ispíridu Santu fintzas de
cussu primu instanti. Si, dh’eis contzebiu conoscendidhu cun sa Fidi sa prus biva,
confidenduosí in Issu cun sa prus firma Sperantza, adorendidhu, amendidhu cun sa
prus intensa Caridadi. Fintzas de cussu primu instanti duncas seis istétia Isposa. Imoi
est beru chi sa Sposa est inferiori a su Sposu, ma tenit cun Issu grandus tratus de
ugualidadi, e tali íntima unioni chi sunti duus in d-una sola carri. O mistériu chi in
Bosu tenit su cumplimentu prus bellu! S’Ispíridu Santu Bosi fait totu Sua, e casi Bosi
deíficat. Issu est in Bosu, e Bosu totu in Issu, in manera tantu perfeta chi seis casi una
sola cosa cun Issu. Aici Issu Bosi preparat fintzas de su primu instanti a contzebiri
una dí corporalmenti Cudhu chi est s’aspetatzioni de is Gentis, sa glória de Israeli, su
suspirau de is Natzionis, su Verbu Eternu. O Isposa! O abbissu de puresa e de santidadi!
O dignidadi! O glória! O cantu seis atesu, o Maria, fintzas de s’umbra, fintzas de
s’idea de corrutzioni e de pecau! Ah! seus nosàterus chi frecuentementi po summa
disgràtzia nosta amaus familiarizainosí cun su pecau e cun sa corrutzioni. Ma Bosu, o
potentíssima Maria, tirainosí interamenti a Bosu, e po mesu Bostu interamenti a Deus.
Unu Babbu nostu, tres Ave Marias, unu Gloria Patri.
Setima dí
Sa Primogénita de su Babbu, sa Mamma de su Fillu, sa Sposa de s’Ispíridu Santu,
Maria, depiat cumpàrriri in su mundu vitoriosa de s’inferru e de totus is insídias
infernalis; e aici realmenti cumparit. Non solamenti benit Issa a prodúsiri de su Virginali
sinu Suu su beneditu frutu Gesugristu, cun su cali depint reparaisí totus is dannus
causaus de s’antiga Eva po sa sedutzioni de su serpenti infernali; ma Issa etotu depit
èssiri inimiga de s’inferru, fintzas de su printzípiu; e tali inimiga chi non solamenti
siat animada de ódiu summu contra is òperas infernalis, non solamenti bessat sana e
salva de is infernalis artifítzius; ma de prus fèrgiat cun colpu fatali sa infernali poténtzia,
dha bínciat e ndi triunfit valorosamenti fintzas a scerfai cun su pei Suu sa superba
conca de s’antigu serpenti. Ah! consoladí, o prima mamma nosta Eva! Cessa finalmenti
de su prantu e strexi is làgrimas de is ogus tuus! Cussu infami serpenti, ministru
de morti mandau a tei de s’inferru chi fendu pecai a tei impari cun Adamu, at
causau s’originali infetzioni de su pecau in totus is fillus tuus, est imoi abbàtiu e
bintu. Reputendusí su malignu seguru tirannu de is Óminis, tentat de si acostai a
Maria po dha fai preda sua; ma non podendu penetrai cun su velenosu àlidu suu in su
bestiri de luxi chi dha coberit in su bessiri de su nienti, abbarrat confúndiu, e a su
própriu tempus de su pei de custa noa fémina scerfau; poita chi biendu evitau e bintu