Is Pregadorias antigas: su signo de sa devozioni - Provincia del ...

Comune di Samassi
siaus elígius po Divina misericórdia a partitzipai de su grandu Rescatu e de is
gràtzias de su Salvadori Fillu Bostu, depeus cumbàtiri dí e noti is malas inclinatzionis
nostas, is insídias de is esternus inimigus, e is continus pecaus, sèmpiri
timorosus e intzertus de sa eterna sorti nosta. Ma aberei Bosu, o Piedosa, aberei
cun is beneditas Manus Bostas su tesoru de sa Redentzioni de Gesugristu, e bogaindi
po nosàterus prus abbundantis e prus eficatzis agiudus, cun is calis binciaus is
inimigus nostus, e assegureus su perfetu Rescatu e sa totali libberatzioni nosta.
Unu Babbu nostu, tres Ave Marias, unu Gloria Patri. (S’Innu, ecc, comenti in sa
prima dí).
Tertza dí
Maria creada cun disignu totu nou in sa perfeta integridadi de sa natura, e rescatada cun
sa Redentzioni sa prus etzellenti po no contrairi mancu s’umbra de su pecau, non depit
istai mancu unu momentu sentza èssiri plena de gràtzia santificanti. S’Ispíritu de su
Segnori, chi oféndiu de su pecau de s’Ómini si fiat retirau de sa natura umana già
corrúmpia, circàt, po nai aici, unu logu, una sedi, in mesu de is Óminis, poita chi essendu
Ispíritu de bondadi e de amori, bollit comunicaisí continuamenti a is creaturas Suas
e faidhas beatas. Ma po su spàtziu de cuaranta séculus Issu no at agatau in mesu de is
Óminis logu dignu de Sèi. E ancoraschí una borta e s’àtera infundessit sa virtudi Sua in
is Patriarcas, in is Profetas, e in àterus giustus; nientidemancu in totu su tempus de su
Testamentu antigu fiat sèmpiri scarsa sa misura ch’Issu donàt de sa gràtzia Sua; e casi
non fidendusí de is Óminis ancora meda imperfetus e carnalis, andaiat cumplendu cudh’antiga
Divina senténtzia: non permanebit Spiritus meus in homine quia caro est
(Gen. 6). Ma arribbau su tempus de Maria, s’Ispíritu Santificadori fintzas de su primu
instanti s’impossessat de Issa, e spandit in su sinu de Issa casi a torrentis e sentza misura
luxi subrannaturali sa prus clara, sperantza in Deus sa prus firma, dulcíssimu ardentíssimu
amori Divinu, e dógnia àtera sorti de scuisitus donus e gràtzias celestialis, chi non
solamenti giusta e santa dha faint, ma ancora similíssima a Deus e de Deus, prus chi
non totus is àteras santas creaturas, digníssima. Apustis de ai circau, po nai aici, inutilmenti
in mesu de is Óminis, ponit in Maria sa regali Sedi Sua, fissat in Maria sa perpétua
abbitatzioni de sa Magestadi Sua; e Maria fintzas de cussu primu instanti tenit sa
prima plenitúdini de sa gràtzia, chi dha fait superiori ancora a is prus sublimis ispíritus
de su Paradisu; de manera chi fintzas de su primu instanti de su èssiri Suu Issa podit nai
cun totu beridadi: sa gràtzia santificanti, s’Ispíritu Santificadori de su Deus miu est
benniu a si reposai in mei: requievit in tabernaculo meo.
Unu Babbu nostu, tres Ave Marias, unu Gloria Patri.
Oratzioni a Deus Santificadori
O Eternu Ispíritu Santificadori! Sentza de Bosu nienti nc’est in s’Ómini de bonu,
nienti de santu. E po cussu s’umana naturalesa privada de sa Divina virtudi Bosta est
andada po tantus séculus corrumpendusí sèmpiri prus e degradendusí bregungiosamenti.
Ma ecu chi Bosu torrais, e animais de nou in Maria custa naturalesa; e dha
nobbilitais, e totu noa e meda prus bella de su chi fiat innantis dha feis reflorèssiri.
235