Is Pregadorias antigas: su signo de sa devozioni - Provincia del ...

232
IS PREGADORIAS ANTIGAS - SU SIGNU DE SA DEVOTZIONI
Oratzioni a Deus Creadori
Santíssimu Creadori de is Óminis! Gràtzias Bosi torraus infinitas, poita chi eis restaurau
in Maria s’integridadi e s’innocéntzia originali de s’umana naturalesa. Dh’eis
fatu po onori e glória Bosta, po onori e glória de sa própria naturalesa umana, po
onori e consolatzioni de totus nosàterus chi de custa naturalesa seus fillus. Siais eternamenti
beneditu e laudau! Ma, o cantu seis ammiràbbili, o grandu Deus, in is òperas
Bostas! Custa integridadi e innocéntzia originali de Maria est printzípiu de un’órdini
nou de cosas, in su cali Bosu bolleis elevai su géneru umanu a una vida sobrannaturali
e Divina. Su primu órdini de sa creatzioni printzipiau cun Adamu e cun Eva, fiat
figura de custu segundu órdini de restauratzioni e de gràtzia chi cumentzat cun Maria
e cun Gesugristu. Adamu fiat po cussu figura de Gesugristu, Eva fiat figura de Maria.
E comenti Eva in su momentu chi fiat bogada de su costau de Adamu cali primu frutu
de issu, innotzenti e pura e totu símili a issu, inserràt in sèi is bènis e is grandesas de
sa prima creatzioni, poita chi depiat èssiri Mama naturali de totus is óminis; aici
Maria bessendu a sa vida, cali primu frutu perfetu de sa plenitúdini de is tempus,
imàgini viva de Gesugristu, cumparit in cussu primu istanti coment’e printzípiu ch’inserrat
in Sèi is bènis e is maravíglias de sa segunda creatzioni chi est s’órdini subrannaturali
de sa gràtzia, poita chi depit èssiri Mama de vida subrannaturali e Divina a
totus is eletus. Aici sa réxini inserrat sa bondadi e sa grandesa de s’àrburi e de is
frutus; aici sa vena inserrat sa puresa e sa friscura de is àcuas de su riu; aici su centru
inserrat is rajus chi de issu si partint e si difundint in dógnia parti. O cantu bèni Bosu,
o Divinu Creadori, scieis preparai e concentrai in su printzípiu is maravíglias e is
glórias chi apustis feis resaltai in sa continuatzioni de s’òpera! O cun cali ammiràbbili
sapiéntzia eis postu su primu istanti de sa Concetzioni de Maria comenti compéndiu,
de s’órdini misteriosu de sa regeneratzioni e de sa santificatzioni de is Óminis! A
Bosu Rei de is séculus immortali e invisíbbili, solu e veru Deus, siat donau dógnia
onori e dógnia glória in eternu!
Unu Babbu nostu, tres Ave Marias, unu Gloria Patri.
Oratzioni a Maria Immaculada
Puríssima Vírgini Maria! Su primu instanti de s’Immaculada Concetzioni Bosta est
unu puntu misteriosu e magníficu chi unit a is meravíglias de s’eterna preordinatzioni
chi Deus at fatu de Bosu, is maravíglias chi po mesu Bostu depit operai in s’órdini
nou de sa gràtzia e de sa regeneratzioni. Po mesu Bostu depit donai a custu órdini nou
unu Pontífitzi totu santidadi e gràtzia, chi est Gesugristu; e Bosu etotu, o Maria, seis
su tabbernàculu aintru de su cali Issu pigat su Corpus e su sànguni Suu po dhu ofèrriri
in vítima, e cumentzat s’eterna redentzioni de su géneru umanu: tabbernàculu formau
no in su primu órdini de creatzioni infetu de pecau, ma segundu un’àteru disignu de
Deus Creadori, meda prus santu, meda prus perfetu, in totu dignu de su soberanu
Pontífitzi de sa santidadi e de sa gràtzia, e po Issu apariciau e cunsagrau a nòmini de
su Celu e de sa Terra fintzas de su primu instanti: amplius et perfectius tabernaculum
non manufactum neque huius creationis (Hebr. 9) Si, Bosu seis, o Maria, fintzas de
su primu instanti de sa vida Bosta, su Templu de s’eternu Pontífitzi, su Sacràriu, su