Is Pregadorias antigas: su signo de sa devozioni - Provincia del ...

154
IS PREGADORIAS ANTIGAS - SU SIGNU DE SA DEVOTZIONI
Oratzioni
Ínclita eroina de sa fidi Luxia, Bosu chi eis connotu de bon’ora sa vanidadi de is
cosas terrenas e de su primu flori de is annus eis sighiu amorosamenti s’Angioni
Immaculau; impetrainosí de Deus chi ancora nosàterus dhu potzaus onorai cun sa
esata osservantza de is cumandamentus suus, e ricreaus de sa protetzioni bosta regnit
sempri in nosàterus cudha divota emulatzioni chi risplendit in is Santus, po èssiri
dignus divotus totus in sa terra e dignus cumpàngius totus in su celu.
Cuinta dí
Non bastat a Luxia de condúxiri una vida profumada de lillus, ma bolit puru sacrificai
sa própriu vida a testimoniantza de sa fidi chi professat de Gesugristu. Teniat in cussu
tempus Pascàsiu su guvernu de Siracusa e apena tenit riportu chi Luxia est cristiana,
dha fait tradúsiri a su tribbunali suu. Creit chi is lusingas o is amaletzus scotant su coru
de custa tènera vírgini e chi vacillit in sa fidi. Ma cumparta Luxia a peis de su tirannu
cunservat in fronti cudh’ària de paxi, cussa festosa esultantza totu própria de chini
circat sa glória de Deus. Interrogada si adoressit is deus su campidógliu rispondit coragiosa
chi non riconoscit àteru Deus foras de su Deus de is cristianus. Tentat invanu su
prefetu cun mila lusingas e finalmenti dhi fait presenti is prus acerbus suplítzius de una
bàrbara morti; ma Luxia corrispondit cun eróica indiferentza a cantu de mali dhi presentat
su tirannu; su cali andau in fúria cun sa sfertza in manu dh’imponit assolutu
siléntziu. Oh! “T’ingannas”, rispondit Luxia; a is umilis serbidoris de Deus non dhis
mancat sa paràula de buca, ne citit sa língua po su timori de sa morti. Est promissa de
Deus de su cali non si cancellat síllaba a chi candu nosi presentéssimus a is reis e a is
tirannus non penséssimus comenti depit rispóndiri, poita issu etotu nos iat a sugerí su
de nai, poita non seus nosu chi fuedhaus, ma s’Ispíritu Santu chi fuedhat in nosu.
Oratzioni
Ínclita Eroina de sa fidi Luxia, Bosu chi seis posta de bon’ora bàsciu su patrocíniu de
Maria, de sa cali eis ritraiu s’inestimàbbili donu de su candori virginali, fei chi ancora
nosàterus postus bàsciu is alas de sa protetzioni de Maria Immaculada dh’onoreus a
similantza bosta rigordendu chi fiat santa prima de nàsciri, chi est sa prus perfeta
creatura chi siat essida de is manus de s’altíssimu. Destinada fintzas de s’eternidadi a
templu de s’Ispíritu Santu e mama de s’Unigénitu Fillu de Deus e Signori nostu
Gesugristu, chi est elevada asuba de totu is corus de is àngelus, chi ananti de su tronu
de Deus fait de abbogada de is pecadoris, chi est su Rifúgiu de is Miseràbbilis, sa
Dispensadora de is Gràtzias, sa Reina de su celu e de sa terra; po chi onorifichendu a
Maria in custa terra, dha potzaus tènniri cun bosu difensora in puntu de morti.
Sesta dí
Intendendu su Tirannu chi cantu sutzediat in Luxia fiat totu ispirau de s’Ispíritu Santu
su cali cunfortat dogn’ànima casta, maturat s’infernali disignu de bolli strapai a sa
columba de Siracusa s’inestimàbbili tesoru de sa Virginidadi. Ma fortunatamenti a su