Is Pregadorias antigas: su signo de sa devozioni - Provincia del ...

138
IS PREGADORIAS ANTIGAS - SU SIGNU DE SA DEVOTZIONI
ànima de dha cuntrairi. Antzis chini mai at a èssiri istau, chi apat a bosu negau custa
glória, tantu de bosu meréscia, e tantu giustamenti a bosu dépia? Si! Divinu Redentori!
Fiat dépia a sa suprabbundàntzia de is méritus bostus: fiat dépia a sa virtudi bosta
illimitada, chi abbratzat totus is tempus, passaus e futurus: fiat dépia a sa infinita
santidadi bosta, chi ódiat a morti su pecau, e fintzas s’umbra de su pecau: fiat dépia a
bosu, sa glória de ai tentu sa morti de su pecau, innantis ancoras chi issa fessit intrada
in d-un’ànima, sa glória de ndi pesai su già arrutu, ma de sustènniri ancoras e preservai
calincunu de non arrúiri mai. Nosu cunfessaus cun gioja chi a bosu apartenit custa
glória, o Gesugristu, e cun trasportu de afetus si dha cuntzedeus: a bosu dogna onori,
dogna glória po totu s’eternidadi.
Est custa sa glória de unu creadori perfetíssimu, onnipotentíssimu, comenti seis bosu.
Est custa sa glória de una redentzioni sa prus etzellenti, sa prus abbundanti, sa prus
nóbbili, e prus digna de bosu. Ma custa est redentzioni, chi a calincuna creatura
solamenti privilegiada in summu gradu eis riservau, in sapientíssimus consillus bostus.
Immoi, chini podiat mai èssiri custa creatura tantu fortunada, foras che Maria?
Pater tre Ave e Gloria
Oratzioni a Maria Immaculada
Puríssima Vírgini Maria! O cantu est pretziosa sa sorti bosta! In su primu instanti de
sa cuncetzioni bosta, Bosu eis arriciu impari cun su printzípiu de sa vida s’aplicatzioni
ancora de is méritus subrabbundantis de su Redentori, chi si preservat de contrairi
neu, o umbra de culpa; e bieis in bosu cumplia in cussu primu istanti, sa glória de sa
Redentzioni de Gesugristu, in d-unu modu su prus etzellenti e perfetu, cun privilégiu
su prus singulari a Bosu solamenti cuntzédiu, chi si ponit in d-un’istadu meda superiori
a totus is creaturas redimias. Ma e cantu prus fortunada seis, Maria, essendu
istada redimia in modu aici nóbbili e perfetu, po donai a su Redentori su corpus e su
sànguini, cun su cali depit Issu riscatai totus is óminis! Aici est veramenti de sa virginali
puríssima carri bosta, si depit formai sa carri chi, deificada de su Verbu Redentori,
si depit formai sa vítima, de s’immolai, po soddisfai a sa divina giustítzia, e redimiri
su mundu; de su puríssimu sànguini, po isburrai is pecaus de totu su géneru
umanu, chi at a èssiri bíbbita delitziosa de celesti puresa e de vida eterna a totus is
fielis; su sànguini e sa carri chi at a dèpiri populai su celu e sa terra de Vírginis e de
santus e chi bistida de glória at a dèpiri èssiri elevada asuba de totus is celus, e collocada
in su sóliu de sa divinidadi a sa dereta de Deus. O cali ecelsa puresa e santidadi
est mai sa bosta, o Maria! O cali abbissu de glória! Ma sa glória bosta non si potzat
iscarèsciri a nos àterus míserus, chi mancai elígius po divina misericórdia a partitzipai
a su grandu riscatu e a is gràtzias de su Salvadori fillu bostu, depeus cumbàtiri dí e
noti is perversas nostras inclinatzionis e is insídias de is esternus nemigus e tra is continus
pecaus, sèmpiri tímidus e intzertus de s’eterna sorti nostra. Deh aberei, o piedosa,
aberei, cun is piedosas manus bostas, su tesoru de sa redentzioni de Gesugristu, e de
issu tiraindi po nosu, prus copiosus e prus eficatzis agiudus, cun is calis binciaus is
nimigus nostrus, e assiguraus su perfetu nostru riscatu, e sa totali libberatzioni nostra.
Pater, tre Ave e Gloria