Is Pregadorias antigas: su signo de sa devozioni - Provincia del ...

Comune di Genuri
Gògius po su mesi marianu - Genuri 151
Cun càntigu de alligria
ingenugaus a peis sus,
laudeus sèmpiri prus
in custu mesi a Maria.
1) In tzitadi de Palestina
de dógnia gràtzia donada
totu bella e immaculada
nascit custa mamma divina
e po custa vida mischina
consolu e vera ghia.
Laudeus sèmpiri prus
in custu mesi a Maria.
2) Anna est mamma fortunada,
Gioachinu babbu diciosu
de su partu gratziosu
de custa filla adorada,
in tempus preannuntziada
impari cun su Messia.
Laudeus sèmpiri prus
in custu mesi a Maria.
3) In sa prus tènera edadi
a Deus si est consagrada,
a su templu presentada
de sa Santa Trinidadi,
sprigu de virginidadi
ti declaras vírgini e pia.
Laudeus sèmpiri prus
in custu mesi a Maria.
4) A Betlemme s’incamminais
cun Giusepi isposu amau,
aundi su Verbu incarnau
a luxi Bosu donais,
cun chini a nosu portais
su riscatu e s’alligria.
Laudeus sèmpiri prus
in custu mesi a Maria.
5) Mirainosí cun coidau
mamma de su Santu amori,
ca su divinu Redentori
a Bosu nos at lassau,
candu Giuanni at intregau
a fillu bostu in agonia.
Laudeus sèmpiri prus
in custu mesi a Maria.
6) Po su gosu chi eis provau
in sa Santa Resurretzioni,
e in sa gloriosa Ascensioni
de fillu bostu adorau,
dognunu siat arriparau
de Bosu Vírgini e pia.
Laudeus sèmpiri prus
in custu mesi a Maria.
7) Cun sa celesti imbasciada
in sa santa abbitatzioni
s’adoràbbili Incarnatzioni
de su Verbu s’est averada,
in Bosu Vírgini sagrada
segundu sa profetzia.
Laudeus sèmpiri prus
in custu mesi a Maria.
8) Preannuntziai cun Gesús
dh’at bófia su Creadori,
po ispantu e po terrori
de s’inferru prus e prus,
po èssiri de is fillus sus
su consolu e s’alligria.
Laudeus sèmpiri prus
in custu mesi a Maria.
9) O suprema Deidadi,
de Bosu Vírgini sagrada,
s’elígia seis istada
fintzas de s’eternidadi,
de totu sa Trinidadi
po Mamma de su Messia.
Laudeus sèmpiri prus
in custu mesi a Maria.
113