ACTA APOSTOLICAE SEDIS - La Santa Sede

454
Acta Apostolicae Sedis – Commentarium Officiale
IV
Sanctuario Dominae Nostrae del Valle Catamarcensis dioecesis Rosa aurea tribuitur.
BENEDICTUS PP. XVI
Ad futuram rei memoriam. — Ab incohato iam saeculo XVII Beatam
Mariam Virginem del Valle colere coeperunt fideles, cuius signum Decessor
Noster Leo XIII, insignis memoriae, coronavit. Annorum decursu frequentes
peregrini ad hoc sanctuarium, ubi Deiparae simulacrum asservatur, accedere
solent, caelestem Matrem veneraturi, ut supernis subsidiis affatim repleantur.
Materna enim Ipsa sua tutela gressus christianorum dirigit, quippe quae
veluti stella in historiae pelago demonstret iter, quod haud semel obscuratur
atque procella vehementer agitatur (cfr. Spe salvi, 49).
Ut autem Sanctuarium hoc Dominae Nostrae del Valle Catamarcensis
dioecesis congruentius extollatur atque nihil in eo loco ornando, colendo,
praetermittere cupientes, Nos Rosam ex auro conflatam magna cum animi
affectione harum Litterarum vi tribuimus et donamus, quae inibi exinde
servabitur, peculiaris Nostrae benevolentiae veluti signum ac spectabile
documentum, quo Sanctuarii huius dignitatem augere cupimus.
Rosam hanc Venerabilis Frater Noster Franciscus Xaverius S.R.E. Cardinalis
Errázuriz Ossa, Archiepiscopus metropolita Sancti Iacobi in Chile,
tum suae tum Nostrae in Virginem Mariam pietatis tuiturus partes, ipsi
Sanctuario del Valle tradet, cunctis laetantibus.
Quae vero in sollemni benedictionis rosae caerimonia a Deo, Patre misericordiarum,
efflagitavimus, ea rursus ab Eo postulamus ut omnibus hominibus
bonae voluntatis affatim impertiat eosque supernis cumulet donis.
Datum Romae, apud Sanctum Petrum, sub anulo Piscatoris, die XXIX
mensis Iunii, in sollemnitate SS. Petri et Pauli Apostolorum, anno MMX,
Pontificatus Nostri sexto.
Loco e Plumbi
In Secret. Status tab., n. 125.000
De mandato Summi Pontificis
Tharsicius card. Bertone
Secretarius Status