thupui.pdf

D
RAM LEH HNAM HUMHALH
- 1 -
- Lalbiakzuala
Vice President, Central YMA
‘Ram leh Hnam Humhalh’ hi YMA ten kumpuan atan
kum 6 (1998,1999, 2000, 2001, 2002 leh 2004) chhung ngawt
kan lo puang tawh thin a, kumpuan dang kan neih leh hnuah kum
2011-a YMA General Conference, Kolasib-a neih chuan kum
2012 YMA kumpuan atan ‘Ram leh hnam humhalh’ tih hi a
puang leh a, hemi chungchanga zawhna pawimawh tak chu kum
engngemawzah hnuah engatinge he kumpuan hi kan puan leh tak
tih a ni a, a chhanna pawh ‘chhunglam leh pawn lam atanga
kawng hrang hranga Mizoram leh Mizo hnam tibuaitute laka
humhalh a ngaih vangin he kumpuan hi kan hmang leh ta a
ni’ tih a ni ang.
He kumpuan chungchanga kan innghahna ni reng tur chu
YMA member ten he kumpuan hi kan tihhlawhtlin loh chuan
tihlawhtling tur dang an awm chuang lo tih leh kan theihna kawng
kawngah thahnemngai taka kan thawh tlan a ngai tih hi. He
kumpuan tihhlawhtlinna atan haw haw-a nawr chiam tur a awm
ang a, dan hmanga ngaihtuahna fim leh fel taka kalpui chi a awm
bawk ang. YMA hi tlawmngai pawl lian tak leh mite zahkai, zawl
dawh chunga vantlang rawngbawl tur a ni tih kan hriatreng pawh a
tul hle a, kan thahnemngaih luatah Kumpuan avangin keimahni leh
keimahni zawk inthen pheng phungin kan awm thei bawk. Mi
thenkhatin YMA-in kuang lo a nawr an tithin a, YMA-in kuang a
nei hran lo, kan ram leh hnam humhalh nana tha apiang kan nawr
mai a ni.
Kan kumpuan hi kawng hrang hranga kalpui tur a ni a,
hetiangin :-

D
I . Inchimralna hrang hrang laka kan inven nan leh
leilung faten kan chanvo dik tak kan chan theih nana
hmalak :
a) Electoral Roll, Tuikuk leh Foreigner chungchang :
Kan pi leh puten lu chhum ban chhum huama an lo humhalh
thin, Mizoramah hian ram dang mi (Myanmarese/Burma mi) kan
tih ang chi hi mi 80,000 - 1,00,000 vel an awm nia hriat a ni a,
heng zinga tam tak hian kan Ration min tawmpui avangin chhungkaw
tam tak chuan leilung faten kan chanvo ngei ngei Ration (Buhfai,
Electric, Gas etc.) kan kham lova, harsatna kan tawk mek a
ni.Electoral Roll siamnaah ram dang mi leh hnam dang mi, dan
lova kan rama lo lut leh cheng te kan thun zel loh nan hmalak a tul
takzet a, Political party te pawhin an party tantu/vote-tu tur an nih
vang maia Electoral Roll-a an thun fo thin an bansan a ngai.
Chutianga an lo tum fo a nih pawhin huaisen taka hnial ngam a
ngai. Tuna Electoral Roll siam mekah hian October 2012 chhungin
Electoral Roll-a hming awm te sawisel theihna hun hawn a ni a,
Form 7 hmangin kan Branch/veng huamchhunga Foreigner nia
kan hriatte chu kum engngemawzah Electoral Roll-a hming chuang
tawh pawh paih an nih theih nan YMA in huaisen taka dik lo chu
dik lo ti ngama tankhawh a tul. Electoral Roll kawl lo YMA
Branch te chuan an AERO emaw BLO emaw hnen atangin a en
theih ang a,an hnen atangin kan paih duh paih dilna Form 7
lakchhuah a, an hnenah bawk thehluh tur a ni a, Hearing neih
hunah pawh thahnemngai taka tel ngei tur a ni. Ni 1.1.2013-a
kum 18 tling lote Electoral Roll-a thun an nih loh nan pawh hmalak
a tul. Electoral Roll dik pawimawhzia sawi nan, ‘Electoral roll-a
Ram dang mi leh hnam dang mi thun a nih hian Mizo pakhat
vawhlum zel ang kan ni’ tih a ni thin.
Summary Revision of Electoral Roll 2012 a neih dan tur
ruahmanna:
- 2 -

Draft Roll tarchhuah ni : 1.10.2012
Claims & objection thehluh : 1.10.2012 - 31.10.2012
theih hun
Hearing (Disposal of claims : By 1.12.2012
& objection) (16.11.12 hmaa zawh tur)
Final publication of E.Roll : 5.1.2013
D
Tuikuk chungchang : Khawthlang lamah Tuikuk hovin sorkar
leh mipuite harsatna namen lo min siamsak reng a, kan sorkar leh
tlawmngai pawl ten Mizoram mi dik tak, 1995 Electoral Roll-a
hming chuang leh an thlah zelte chu lo kir sela kan tih lawm lawm
laiin a nawlpuite chu an hotu thenkhatte fuihpawrh vangin an lo kir
duh lova, chutiang karah Tuikuk laka Mizote tawrh nasatzia leh an
kut tuara thite hial engngemawzah an awm tawh laia Mizo kuttuara
Tuikuk thi an la awm miah loh lam thlir duh si lo, Human Rights
lam buaipuitu thenkhatin Mizoram sorkar leh Mizote min la hek ta
reng a, Sakhan tlangdunga kan Mizo chhungkaw 90 te tawrhna
lam ngaithla duh lova, Tuikuk ho tawrhna ringawt buaipuitute hian
‘YMA ten Bru ho Biak In an hal.. Mizoten an nulate an
pawngsual” tih angreng thu awiawm loh pui pui an thehdarh a,
India mipui mithmuhah hmingchhe takin kan awm mek a nih tak hi
! Min hekna tur thil thar an haihchham ta deuh a ni ang, tunlaia min
hekna tharlam ber chu “ Chumi khamia a thusawinaah Mizoram
Chief Minister-in Kristian ram kan ni a ti, India ram hi Secular
ram a ni si a” tih velte a ni. Tuna Tuikuk hovin tihhlawhtlinsak tura
sorkar an ngiat - Hmun khata awm khawm, a lokir thei tehfung
atana 1995 Electoral Roll hman loh tihte, Kum 2 chhung a
thlawna Ration dawn tihte hi kan phal ngai tur a ni lovang. An
duh loh na na na chuan lo kir lo mai rawh se, kan inmamawh
tehchiam hlawm love kan ti a nih hi !!
Foreigner chungchang : Pem lehkha inpek chungchangah pawh
ram mi ni lo na na na chu pek loh ngam a ngai a, India sorkar
- 3 -

D
danah India khua leh tui ni lo chu ram dang mi ( foreigner ) a ni a,
thisen zawm emaw, unau/hnahthlak pawh nise, International
boundary piah lama khua leh tui nihna nei chu ‘ ram dang mi’ an
ni. Chuvang chuan Zo hnahthlak pawh ni mah se, political boundary-in
min then miau si a, India sorkar dan leh Central YMA CEC
-in a lo rel tawh angin, ‘Ram dang mi chu ram dang mi a ni
(Foreigner is foreigner)’ tih hi YMA dinna a ni. YMA Branch
tinin Village Census record bu kan neih te hi uluk taka vawn that a
ngai a, a kawm senah rinhlelh leh khua leh tui dik tak ni lo ziah tur
a ni a, a kawm pawlah khua leh tui dik takte ziah luh tur a ni, a tul
dan angin kum tin ennawn a, siam that tur a ni.
Foreigner chungchangah hian sorkar, kohhran leh
khawtlang kan tanrual a ngai hle. Sorkarin a tihtur a tih loh chuan
ngampa takin an lo lut mai a, khawtlangin kan en zam mai mai
chuan tlangnel takin an khawsa leh mai. Kohhran pawhin Kohhran
member tam hrim hrim lama thahnem kan ngai a nih pawhin ‘a
dan kalh zawnga lo lutte’ thleng thlenga lawm taka lo lawmluh
zel hi a Pathian Thu chuang lo. ‘Chanchin Tha mitin tan’ kan tih
mek lai hian a Chanchin Tha lo hrilh kha a tawk viau, a bak dangthilti
dik lo leh dan kalha awm te kuangkuah kher zel hi kan tihtur
a ni hran lo. Dan lova lo lut Foreigner a lo piangthar a nih chuan
dan dik lovin Mizoramah a awm tih inhre chungin an ram lamah
haw leh mai se, Pathian a lawm zawk hmel a, ILP nei lo a piangthar
a nih chuan, sual thupha chawi chungin Mizoram hi chhuahsan mai
se, Pathian a lawm zawkin a rinawm. Khaw lian/ tam nih duh vang
leh Kohhran member tam nih duh vanga dan lova kan rama lo lut
thleng thlenga lo dawnsawn leh pawm te hi bansan ngam a ngai.
India leh Myanmar inrina hnaih Myanmar lama khaw 30 vel chuan
Champhai District Hospital-ah nau an rawn nei thin a, Hospital-in
birth certificate a pek chhuahah a pianna tarlan a ngaih si avangin
Sub-Hqrs. YMA Champhai-in Birth Certificate pe chhuak kher
lova tihdan a zawng te hi ram leh hnam humhalhna tha tak a ni.
- 4 -

D
Heng naupiang te hi India khua leh tui nihna ‘Citizen by birth’
hmangin an nei thei tlat a, ruahmanna tha tak siam a tha hle.
Sorkar phalna nei lo, a remchanna hmun apianga khua/
bawk din thin hian ram dang mi a kova, suahsualna leh ruihtheih
thil siamna hmun a tipung. Burma ramri hnaiha ram dang mi tamna
leh sorkar phal loh thil tawlhrukna hmun Saikhumphai Bawk
tihtawp a nih theih nana Vaphai khua ten inlungrual tak a, hma an
lak ang chi hi hmun tam takah kan mamawh ta niin a lang. LAD
hnuaia Committee on unauthorised settlers/settlement pawh
hian phalna nei lova khaw din mai mai te tihtawp a nih theih nan
hma a lak chak a pawimawh hle. Assam leh Mizoram ramri buai
reng te hian YMA member te rilru a ti na a, Mizoram State
Boundary Committe hian eng angin nge hma a lak zel dawn tih hi
Mizoram mipuite kan thlir thuap a ni. Hemi chungchang hi Politicsa
hamthatna lak nana hman chi a ni lova, mimal intihlarna tur chi a
ni hek lo, inlungrual taka Mizo mipuite kan kalhona tur a ni zawk.
Dan hmangin : Mizoram hi kil thumah ram dangin min ri a, Burma
nen Km 404 leh Bangladesh nen Km 318 kan inri a, a zavaiin ram
dang nen kan inrina chu Km 722 lai a ni. Foreigners ( Protected
Areas) Act 1958 hnuaiah Mizoram hi hungbik a nih vangin ram
dang mi lo zin/tlawh duh tan Protected Area Permit(PAP) neih a
ngai a, PAP hmang hian India sorkar, Ministry of Home Affairs
chuan Foreign Tourist 4 emaw, a aia tam emaw tan ni 10 chhung
Mizoram tlawhtir phalna Mizoram sorkar hnenah a pe a,
Pakistan,Bangladesh leh China ram mite phei chu Central sorkar
phalna lo phei chuan Mizoram sorkarin phalna a pe thei lo. PAP
chungchanga hriattur pawimawh tak chu Myanmar( Burma ) mi
leh sate chuan Union Home Ministry atanga phalna an neih chuan
ramri atanga Km 16 chhung an zin thei a, chutih rualin PAP hmanga
Mizoram lo tlawh ram dang mite chuan an lo luh atanga darkar 24
chhung ngeiin Foreign Registration Officer(FRO) hnenah an in-
- 5 -

D
report tur a ni. Tunah hian India sorkarin ni 31.12.2011 atanga
kum khat chhung atan a thlahdul mek a ni.
Rule 4 of the passport ( Entry to India ) Rules 1950 hnuaiah
Mizoram sorkarin ‘Guidelines for Regulating Entry of
Myanmarese tribals into Mizoram’ tih dan siamin Myanmar leh
India inrina atanga Km 40 huamchhung Myanmar lama cheng tlang
mi tupawhin India ram a lo luh duh chuan Myanmar sorkar atanga
India ram lo zin/luh phalna leh India/Mizoram sorkarin Form 1
hmanga lo luh phalna(Entry permit) a pek te chu a mihring a zir leh
a lokal chhan a zirin ni 30 aia rei lo Mizorama cham phalna pek
theih a ni. An lo luhna atanga Km 40 bak an pel tur a ni lova, Km
40 an pelh dawn a nih chuan Passport leh Visa nung lai an nei tur
a ni thung. Entry permit pekchhuah a nihin Myanmar atanga
Mizoram luh phalna original emaw an Identity Card (ID) emaw,
Entry Permit pe chhuaktu Officer hian a laksak tur a ni a, an haw
leh hunah an lam leh ang. Hemi bakah hian Mizoram chhung,
Myanmar ramri atanga Km 40 huamchhunga cheng ngei sponsortu
an awm chuan District tina SP ten thla 3 chhung Temporary
Stay Permit an pe thei bawk.
Heti khawpa dan khirh leh tha kan nei chung hian Mizoram
chhunga Foreigner tam lutuk ( mi 80,000 - 1,00,000 vel ) hi tu
thiam loh nge ni ang le? Entry Permit emaw Temporary Stay permit
emaw pawh nei lo, kan rama ram dang mi tam ta lutuk hi dan
kengkawhtu tur tuemaw chuan a tihtur a ti lo a ni!! Burma
politics kal dik lo avanga lo tlan chhia chu ni se, India sorkarah
political asylum emaw refugee dinhmun te dil awm tak ni si, chutiang
an awm si lo. Kan rama ram dang mi tam takte hian sorkar hlauva
tlanchhia an inti hlawm amaherawh chu Mizorama thilsual an tih
apiangin awlsam takin ramri kanin Burma-ah an tlanchhe thei tho
si a, Refugee chu an ni lo a ni. USA, Malaysia leh Thailand vela an
- 6 -

D
luh theih nan tawrhna tinreng tuarin an insawi a, khawvelin Refugee
te a lainat tlat si avangin - hman lawka thingzai leh puantah
thinte kha tunah chuan USA velah Dollar hmangin an
inchhekarbawm ta a nih hi!! Khawvel mithmuha thiam chan
tumin, an insawi khawngaihthlak a, tutemaw buaipui beiseiin Human
Rights Commission-ah dik lo takin Mizo te min hek mek a, Mizote
hi hnam sual chhuahin min chhuah ta!! Kut kuangkuaha thu mai
mai tur kan ni em? Thir chu a lin laia den tur a ni dawn lawm ni? In
luah tur chungchangah te duhtui deuh tlang ila, dan lova Mizorama
lo lut leh ILP nei lote chu sum kan lo chan deuh dawn a nih pawhin
kan in luahtir lo mai ila...Vawiina Mizoram luahtute hi kan tu leh
faten engtinnge min rawn la sawi dawn tihte chu ngaihtuah peihte
tan ngaihtuah a hun hle.
Mizoram chhim leh thlang lama Chakma pung nasa te hi
engtinnge kan tih dawn le? Directorate of Economics & Statistics
chhuah Mizoram Statistical Handbook 2008 leh Mizoram
Statistical Handbook 2010-a te hi a dik a nih ngai chuan Bungtlang
‘S’ leh Chawngte RD Block huamchhunga mihring leh chhungkaw
zat kum khat lek chhunga intamhleih lutuk te hian ngaih a titha thei
lo. Inthlahpun nasat vang leh pemkhawm tam vang nge Bangladesh
atanga dan lova lo lut Chakma an pun vang le?
Block Mihring Mihring Punna
(1.2.2008) (31.3.2009)
Chawngte 10116 43508 33392
Bungtlang S 1463 17876 16413
Block Chhungkua Chhungkua Punna
(1.2.2008) (31.3.2009)
Chawngte 2090 9384 7294
Bungtlang S 429 3584 3155
- 7 -

D
Helai vela Registrar, Birth & death ten awlsam takin India
rama piang tarlanna ni bawk Birth Certificate an lo pe zung zung
duh mai ang em tih chu mi tam tak zawhna a ni. He thil hi YMA ten
kan mutthluksan mai tur chi a ni dawn em ni le?
Village Council Roll 2012-ah chuan Lunglei District hnuaia
Constituency dang punna chu 12.34%,11.81 %, 7.2 % vel lek
lek a nih laiin 35 - West Tuipui punna chu 24.07% daih a ni a,
khaw hrang hrang 16 zinga Mizo khua te 4.84% vela a pun chauh
laiin Chakma tamna khua chu 40 % leh 45 % velin a pung!! YMA
Sub Hqrs.Lunglei-in hma a lak meuh chuan 35-West Tuipui bial
punna chu 13.24 %-ah a tlahniam leh thei ta dawrh si a, chuti
chung chuan Lunglei District chhunga constutuency 7 zinga pun
tam berna a la ni ta cheu a ni. Ram leh hnam humhalhna kawnga
hmalakna tur lian ber pakhat chu ram dang mite an lo luh zel loh
nana tan lak a ni.
b) Ei leh bar leh sumdawnnaa inchimral laka inhumhalh:
Hemi chungchang hi ‘ei leh bar, sum leh pai
chungchanga hnam dang rahbehna’ tih zawng pawhin a sawi
theih ang a, sumdawnna leh thilsiam lama ram dang leh hnam dang
mite an inhaivur a, ram leilung hausakna ang chi te inlaksak te, an
thlazar hnuaia leilung faten harsatna an tawh phah hial khawpa an
chanvo inlaksakte hi ei leh bar leh sumdawnna lama inchimralna
(Economics Assimilation ) an tih chu a ni.
Mizoram hi India ram state dang nen Km 284 lai kan inri
a, hnam dang lo luh tamna ber Assam nen kan inrina chu Km 123
lai a ni. Intam hneha inchim pil tak mai tluka hlauhawm chu
sumdawnna inchimral a ni a, South Africa ram chungchang kan
hria a, a tam lamah chuan mi hang an tam zawk hle amaherawh
chu a tlem zawk mi ngo hovin sumdawnna bulpui an thunun tlat
avangin Apartheid ( Chi leh chi inthliarna ) tihbo ni tawh mah
- 8 -

D
se, vawiin thlengin a tam zawk chu a tlem zawk thuhnuaiah an la
awm reng a ni.
Mizo District Council hunlai leh Autonomous District
Council ten Trade Licence an pe a nih ngawt loh chuan Non-
Tribal in Mizoramah sumdawn theihna an nei lova, District Council
hunlai (Union Territtory hunlaia pek pawh a awm ) khan
hnamdang mi 53 te hnenah sumdawn phalna pek a ni a, chung
zinga mi tam tak chu an thi tawh naa, Karimganj/Hailakandi/Aizawl
vela Dan hre mite ruaiin, an chhung te leh an thian te hnenah Power
of Attorney siamin, an trade licence chu an inhlanchhawng a, an
sumdawn theih hunchhung pawh tawp (Expire) daih tawh mah se,
heng mite hian Aizawl khawpui leh hmun dangah sumdawnna an
la kalpui ta zel a ni. Sumdawnna thenkhat chu Mizo ten kan tih
theih loh leh kan phak loh pawh a awm ngei ang amaherawh, chu
kan rama hnam dang sumdawng te sumdawn dan tam ber hi chu
leilung faten kan tih ve theih a nih avangin kan chanvo tam tak chu
chhuhsak kan ni mek a, hemi avang hian Mizo mipuite sum tam
tak chu Mizoram chhunga virvel lovin phai lamah a luang zawih
zawih a, sumdawnna sum che vel hlawkna chu hnam dangin an tel
ber. Kum 2011-a Central YMA-in Mizoram sorkar hnena Aizawl
khawpuia dan lova Mizo hming hawha hnamdang sumdawng 263
te hming a thehluh lah chu District thuneituten an titawp hleithei lo.
Mahni Branch huamchhunga hnam dang dan lova Mizo hming
hawha sumdawng te titawp tura YMA Branch tinten hma kan lak
thar a tul hle.
Hnam dang sumdawng chungchanga harsatna thlentu lian
tak chu an Mizo nupuite hminga sumdawnna an kalpui avangin
hmalak a harsa hle. Chutih laiin Supreme Court leh R.L Cell,
Ministry of Welfare,Govt of India thuchhuak (No 12025/6/90/
SEC)-ah chuan Tribal-in Non-Tribal nupui pasala a neih chuan an
chhungkua leh fate chu Non-Tribal an ni tawh ang tih a ni a, kan
- 9 -

D
ramah hian Non -Tribal Trading regulation kan neih loh avangin
hengho hian dan kalhin kan ramah sumdawnna an kalpui a ni.
THE MIZO DISTRICT (Transfer of land) Act 1963 angin Tribalin
Non-Tribal hnenah ram hralh, hawh tir, pek leh inthleng pawh a
theih lova, Section 17, Mizo District (Agricultural land) Rules 1971
leh Rule 13, Mizo District ( Land & Revenue)Rules 1967 chuan
chiang takin a duh nazawng Non-Tribal in ram a neih theih loh dan
a sawifiah bawk. Hnam dang sumdawng chungchanga thil
vanduaithlak tak chu Mizo nu / pa thenkhatin sum siamna atana
an hminga hnam dang an sumdawn tir nasat avangin kan ramah
hian, a bik takin Aizawl khawpuiah harsatna nasa takin a thleng
mek a ni. Sumdawng rau rau leh kan mamawh zuar theuh theuhah
pawh mahni Mizo puite dawr hram hram hi ram leh hnam
humhalhna pakhat a ni bawk.
Inner Line Pass (ILP) chungchang : British hovin min awp laiin
inhung bikna dan tha tak - Bengal Eastern Frontier Regulation
1873 min siamsak a, Inner Line Permit/Pass (ILP) tel lova luh
theih lohna hmunah puan kan ni a, he inhumhalhna dan hi Mizoram,
Nagaland leh Arunchal Pradesh in kan hmang mek a, India ram
hmun danga chengte hnawk ti em em mah se, ILP avangin vawiinah
hian kan la inchimral lo hram hram a ni. A thatzia hriain tunah hian
Manipur mipuite chuan ILP hman a nih ve theih nan kawngzawh
leh thuthmuk (Dharna) hmangin Central sorkar an nawr chiam a,
mipui 70 % in an thlawp naa, a hlawhtling thei lo.
August 30, 2010 -a chhuah, ILP guidelines thar bera hriat
tur pawimawh te:
Inner Line Pass chi hnih(2) a awm
1. Temporary Pass (Ni 15 chhung atan, ni 15 dang
pawhsei theih)
- 10 -

D
2. Regular Pass (Thla 6 chhung atan tum 2, thla 6 dang
ve vea pawhsei theih)
ILP neih ngai lo/ huam lohte :
1. Sorkar duty-a Mizoram lo lut leh Mizoram sorkar hnuaia
hnathawk mek leh an chhungte (FR&SR emaw CCS pension
rules-a family member tarlante chauh), sipaite, sorkar hnathawk
pension, Mizoram mi tribal nupuia neia, khawsa chhunzawm te,
Corporation hrang hranga thawk te leh Government advocate te.
2. Mizorama Institution hrang hranga zirlai te (ID erawh an
neih a ngai )
Mizo District Council hunlai leh Autonomous District
Council pathum - LADC, MADC leh CADC in hnam dang
Permanent Trade Licence an lo pek te chuan Inner Line Pass kum
khat atanga kum thum chhung an nei thei a, Trade Licence neitu
chuan a sumdawnnaa puitu tur mi panga aia tam lo a sponsor thei
bawk. Temporary Trade Licence neitu chu kum khat atanga kum
thum chhung ILP pek theih a ni a, a sumdawnnaa puitu tur mi
panga aia tam lo a sponsor thei bawk.
Aizawl DC Office atanga January - September thlenga
hnam dang hnena ILP pek chhuah tawh zat chu 4969 a ni. Kan
buaina pakhat chu hnam dang ILP nei lo leh ILP-a Mizorama an
awmna chhan tarlan ang lova khawsa/awm tam lutuk ta hi a ni.
ILP neitu chu a sponsor-tu hnenah lo chuan hna a thawk
thei lo tihte, a sponsor-tu in a hnam dang sponsor awmna
chin a hre zel tur a ni tihte, a sponsor-tu in a hnam dang
sponsor a rawih/hman duh hun a zawh chuan Mizoram pawna
dah kir leh thlengin mawh a phur tihte hi keimahni zawkin kan
zawm that loh avangin harsatna kan tawk nasa a, kan inenlet a tul
hle. ILP khauh leh khawnga kalpui tur chuan dan leh thupek vawngtu
- 11 -

D
ten an tihtur an tih a ngai a, tlawmngai pawl te pawhin kan venpui
a tul. Kan rama ILP nei lo hnamdang lo lut turte laka ram ven leh
a nihna anga ILP hmang lote laka hmalak hi thil tul tak a ni.
ILP Guidelines 2010 -ah chuan District tinah a khat tawkin
surprise check neih thin tur a ni a, District tina Superintendent of
Police-in thla khata tum khat tal ILP surprise check neih a nih leh
nih loh a ngaihven tur a ni tih a ni. An check dan report chu thla tin
chawlhkar khatnaah Home department, Police headquarters leh
an district Magistrate-ah an thelut tur a ni. Thil mak ang reng tak
chu mahni leh mahni lo in-sponsor an awm thin hi a ni a, hetiang
titur chuan Home Department atangin phalna hranpa a ngai a, an
changin an phalsak a, a chang leh an phalsak lova, ILP Guidelinesah
chuan mahni leh mahni in-sponsor theihna tarlan a ni lo. (Dan
dik lova Trade Licence neiin mi 5 aia tam lo a sponsor thei tih
hi an changchawi a,anmahni an lo in-sponsor tel a nih ngawt
loh chuan)
c) Chi bing leh hnam bil inlakhranna :
Kum 2012 YMA Kumpuan ‘Ram leh hnam humhalh’
kaihhruaina I (b) na chu tun hma atanga YMA ngaihdan lo ni tawh,
vawiin thlenga kan kalpui - Hnam bil leh chi bing inla hrang
zawnga thiltihte, ram leh hnam inpumkhatna tichhe thei
zawnga hmalakna reng reng chu dodal tlat tur a ni tih hi a ni a.
Mizoram leh Mizo inpumkhatna tichhetute laka dodal leh a laka
inhumhalh hi YMA tihtur a ni a, a chi bing zawnga hmalak te, hnam
bil zawnga thiltihte hi inpumkhatna tichhetu pakhat a ni fo. Political
party leh tlawmngai pawl hrang hrangin Mizoram ramri chinfel
nana Boundary Convention hial kan neih mek laia chhim lama mi
thenkhatin Mizoram zim te, sahhek leh chhawn tuma Union
Territtory an ngiat leh neih tuma hma an la fo pawh hi kan
inpumkhatna tibawrhbangtu leh tichhetu a nih vangin dodal ngam
- 12 -

D
a tul. Mizoram sorkar kal tlang lova tututenemaw Direct Funding
neih tuma an phi chung thin te hi inlakhranna rahka a ni tih kan
chian a ngai. Ram leh hnam dingchhuak tur chuan a mi chengte
inpumkhatna leh inlungrualna a pawimawh ber a, keimahni leh
keimahni kan in ep a, kan inbakkaih chuan he ram hi engtikah mah
a dingchhuak ngai lovang.
Zofate kan la tlem tehlul nen, a inlahrang zawng leh
inthendarh zawnga khawsa kan awm fo hi bansan a ngai.
Inpuhmawhna dik lo tak tanchhana HPC (D) ten Tuivai Group,
Tuisual Group, Chalfilh Group leh Serlui Group-a YMA Branch
29 lai mai tihluihnaa an han thiah tir ta mai te hi a pawi takzet zet a,
YMA History-a thil la thleng ngai lo a ni. Hmun danga hlim leh
hlawhtling taka YMA Day kan hman laiin heng Branch
huamchhunga YMA ruhkawl hote chuan mittui nen YMA day 2012
te kha an hmang asin! He ramah hian YMA pawisawi hi Mizo
mipuite pawisawina a ni tih hriat a tul a, YMA branch tihluihnaa
thiah takte hi pangngai takin kal chho leh rawh se kan ti a ni.Kan
ramah hian nu leh pa chan chang turten nu leh pa chan thiam sela,
fapa dinhmun changtu in fa nihna dinhmun hre bawk sela, kan
ramah hian inpumkhatna a awm ngei ang. Hnam bil leh chi bing
zawnga inla hrang thei tur ang chia thuneihna hranpa ang chi inpek
hi Central YMA duhdan a ni ngai lova, chuvang tak chuan kumpuan
kaihhruainaah pawh ‘hnam bil leh chi bing inla hrang zawnga
thiltihte, ram leh hnam inpumkhatna tichhe thei zawnga
hmalakna reng reng chu dodal tlat tur a ni’ tih tarlan hial a ni.
Chi bing leh hnam bil chungchangah kal nat lutuk erawh a him chuang
lo. Zohnahthlak thenkhatte an hnam tawnga an tawng changa, ‘Veng
dang Sial hmuha inhmuh mai te’, ‘Mizo i ni nange’ intih maite hi
a pawi hle a, eng hnam mah rilru na lova insiam tlan a ngai hle. Kan
ram zim te a zim belh loh nan a inthendarh zawng ni lo, a insuihkhawm
zawnga kan kal a pawimawh takzet a ni.
- 13 -

D
Kum 2013-ah Assembly inthlanna kan nei leh dawn a,
kum dang ang bawka YMA ten Political Party tinte hi chibing leh
hnam bil party tumah thawhhopui lo turin kan ngen che u a ni.
Khawngaih takin Political Party ten min chhinchhiahsak teh u.
d) Awmze neia pun zel a ngai :
India ram chhiarpui 2011-ah chuan Mizorama mihring
awm zat chu mi 10,91,014 kan ni a, India mipui 1,210,193,422
zinga 0.009 % chauh kan ni a, chumi awmzia chu India mi 1,00,000
zinga 9 chauh Mizoram mi kan tihna a ni. Chhiarpui awm apianga
Mizoram mipui pun dan han en hian a ngaihthatthlak hran lo hle.
Kum 1971 -1981 chhungin 48.55% in kan pung a, 1981-1991
chhungin 39.70% in kan pung leh a, kum sawm dan inchhiarah
kan tlahniam hret hret zel a, kum 1991 - 2001 chhungin 28.82 %
in kan pung ta chauh a, kum 2001-2011 ah phei chuan 22.78 %
chauhvin kan punna hi a tlahniam ta a ni. Chumi awmzia chu kum
sawm dan zela 6 % - 10 % vela kan punna rate a tlakhniam zel
chuan kum 2050 velah chuan punna rate 0 % a ni ang a, mihring
kan pung tawh dawn lova, thil hlauhthawnawm tak a ni.
Kum 2009 khan Mizorama naupiang 2,91,74 an awm
laiin mitthi 6001 an awm a, kan decadal growth rate a tlem tual
tual si a, Zohnahthlak luah chin ram ( Burma, Assam, Manipur
etc. a mite ) zawng zawng te mahnia ro inrela, thuneihna leh rorelna
pakhat hnuaia kan awm thei ta a nih ngawt si loh chuan tun atanga
kum 50 hnuah chuan Mizoramah hian Mizo leh hnam dang awm
zat a intluk thial tawh ang. Birth Control policy hi India ram pum
dinhmun thlir chuan thiltih awm tak a ni ngei mai amaherawh chu
Mizoram dinhmun thlir erawh chuan thil hlauhawm tak a tling thung.
Hnam tlem te, chim ral tham lek nih chuan hlauhthawng reng renga
khawsak a reh ngai dawn lova, Central sorkar atanga inang khat
chanvo chang tur pawhin a chan tam theih tak tak lo. India sorkar
- 14 -

D
leh hnam dang zah kai tur chuan tun dinhmun aia tam nih a ngai.
Chutih rual erawh chuan enkawl peih loh tur leh chawm zawh loh
tur fa hrin teuh erawh thil hlauhawm tak a ni ve thova, chawm
zawh ngei chinah kan ram leh hnam humhalh zel tur leh Mizo hnam
nihna keng zel tur mihring awmze neia pun zel dan ngaihtuah a tul
hle a ni.
II. Zu leh ruihhlo do kawnga hmalak :
Zu leh ruihhlo hi ram leh hnam tlukchhiatna,mimal leh
chhungkaw zahawmna tichhetu leh titlarantu,khawtlang nun tiraltitu
leh thihna thlentu a ni. MLTP Act hmanna ni si, heti em ema zu a
tam si hi a zahthlak hle. Kan rama zu leh ruihhlo tihbo a nih theih
nan Sorkar, Tlawmngai Pawl, Kohhran, Political Party leh VC te
kan tan ho a pawimawh hle. Zu leh Ruihhlo hi ram leh hnam hmelma
a ni a, taksa leh thlarau dinhmun thlenga chhiatna thlen theitu a ni
tih hriaa, mahni theihna kawng kawngah pawl hrang hrang te tanho
a ngai hle.
Kumin January - August chhung khan Mizoram Excise &
Narcotics Department chuan ruihhlo kaihhnawih dan chi hrang 4
hmangin mi 2830 an man tawh a, chung zingah chuan MLTP Act
hmanga man chu mi 2037 ( 71.79 % ) a ni. Thil vanduaithlak tak
chu Zu zuarin an tan aia tang tur ‘aikal’ an la thin hi a ni. Aikal rau
rauva aikal nih chakawm lo ber pawl a ni mai thei amaherawh chu
pawisa an hlawh tlat avangin aikal nih duh an tam. Zu zuar man te
hi a nihna ang takin hrem nise, a zuar na na na a in case-a man ni
thin lo sela, zu zuar man te chu an mihring dinhmun khawngaihthlak
lam thlir lovin a thiltisual lam en zawkin thubuai rem thin ni se, kan
ziawm ngei ang.
CADS : Central YMA hnuaia ruihhlo do pawl, Central Anti Drugs
Squad (CADS ) hi ni 8th May, 2010-ah din a ni a, ni 29th May,
- 15 -

D
2010-ah hmalak tan a ni.Aizawl khawpui chhunga Branch hrang
hrangte kaltlangin Central YMA-in CADS member te a ruat a,
term 4-na hmang mekin, ruihhlo man halralna hun pawh hi tum 6
lai huaihawt tawh a ni. Branch hrang hrang atangin member 46 an
awm a, Office Bearers te nen 51 an ni. OB te hi Convener 1,
Asst. Convener 2, Secretary leh Asst. Secretary 1 ve ve an ni.
Training leh thiamna hranpa nei lo ni mah se, Pathian
hruaina azarah CADS member te chuan kan thalai tam tak ruihhlo
avanga boral tur chhanchhuahnan an mawhphurhna thahnemngai
takin kalpui a ni a. CYMA Hall hi Duty Room-ah hman a ni a,
veng hrang hrangah a tul chuan zing leh zan zawmin hmalak thin a
ni a, a chang leh ruihhlo zuar zawngin an tlan kual a,a chang leh
KS te an zawng khawm thin. Ruihhlo zuar leh tithin an mante
atangin an lakna an zawng thin a, tlaivar a ruihhlo zawn leh chan
chang a tam hle a, chutiang chuan thahnemngai takin an informer
ten ruihhlo zuar an hriatte chhuiin an umzui thin. Hna laklawh chang
a tam thin em avangin a tul angin tlaivara buaipui chang an ngah
hle.
CADS member- ten mahni lirthei intumin, ruihhlo chhui
nan leh duty nan phal takin an thawhchhuah pui thin a,a chang
changin Central YMA-in POL man a tumsak ve zauh thin a, mahni
insengso leh nupui fanaute pawh awp lum hman lovin, hlawh pawh
nei lovin, an theihna zawng zawng nen ram leh hnam tan Ruihhlo
dovin rim takin an thawk thin. An mi mante thuneitute kuta pek a
nihin witness-ah an tang nghal thin a, thilsual titute hrem an nih ngei
theih nan vawi tam tak Court-ah an inlan thin bawk.
Synod Social Front-in ruihhlo ngai leh zuar te Counselling
class pe turin Counsellor min pe a, Central YMA Hall-ah nitin
councelling class an neihpui thin a, an mi mante ruihhlo laka
chhanchhuah an nih theih nan Councelling pek a nih bakah tlai tin
- 16 -

D
ruihhlo avanga harsatna tawkte, hmeichhe humsual daite leh Addict
Centre hrang hranga awmten Pathian chhanchhuahna an chan
theih nan tawngtai rualna hun an hmang thin bawk.
Ruihhlo man : ( 1.11.2011 - 31.8.2012 inkar)
No. 4 (Heroin) - 18 Hawng, 597.5 Can, 285 Piece
Parvon/Proxyvon - 157977 Capsules
Nitrosun/Alprozelum - 2824 Tablets
Ganja - 17.5 Kgs 2 Tola
Cough Syrup - 2693 Bottles
Opium - 2 kgs
Damdawi kheh chi - Truck trip 2
Excise/Police-a hlan - 171
Home-a dah - 41
Councelling pek zat - 1085
Damdawi man hlutna - Rs. 1,58,71,495.00
Tanpuina dawn - Rs. 3,27,500.00
Sub-Hqrs., YMA te hmalaknate a fakawm a, YMA
Branch leh Group thenkhatte ruihhlo do kawngah muthlu deuh
mah se, hmun tam takah chuan thahnemngai takin ruihhlo do hna
an thawk mek a ni. Kan ruihhlo man leh tihchhiat te, mihring kan
siam that zozai te thlir chuan YMA te hian ruihhlo do hna hi thawk
lo ta ila, eng ang chiahin nge kan ramin a chhiat phah ang a, mi
engzahin nge thihpui dawn a, chhungkaw engzahnge kehchhia ang
tih hi ngaihtuah ngam rual a ni lo.
Kristian nun dan tha ngaihsan tih thiltuma neitu YMA
kan nih angin zu leh ruihhlo do hi Pathian rawngbawlna a nihzia
inzirtir uar fo a ngai hle. YMA Dan Bu-ah chuan YMA member
chuan Zû leh Ruih theih thila insum mi nih a tum tur a ni tih
- 17 -

D
a awm a, member ten ngaihtuah that a ngai hle.Kan kumpuan
tihhlawhtlinna atan YMA Branch tinten thahnemngai taka ruihhlo
kan do tlan a tul a, inthlahdah mai lovin hun pawh a duh rei dawn
tih hre chunga hmalak a ngai.
Mizorama Drugs kaihhnawih thihna
Kum Mipa Hmeichhia Total
1984 1 nil 1
1985 1 nil 1
1986 No record No record -
1987 5 nil 5
1988 3 nil 3
1989 6 1 7
1990 7 nil 7
1991 7 1 8
1992 10 2 12
1993 17 1 18
1994 24 3 27
1995 49 6 55
1996 45 6 51
1997 56 1 57
1998 76 8 84
1999 77 12 89
2000 128 11 139
2001 92 9 101
2002 85 7 92
2003 124 12 136
2004 122 21 143
2005 35 7 42
2006 21 1 22
2007 25 4 29
2008 4 2 6
- 18 -

D
2009 25 3 28
2010 13 3 16
2011 12 0 12
2012 27 4 31
(Upto 9 Oct)
YMA-in kum 2005 atanga kum 2008 chhung kumpuan
atan ‘Ruihhlo Do’ kan hmang a, YMA Branch ten thahnemngai
taka hma kan lakna rah lanna pakhat chu ruihhlo kaihhnawih thihna
( OD -a thi) a tlem tial tial kha a ni a, amaherawh chu kumpuana
hman tak loh hnuah YMA te kan inthlahdul ta deuh nge ruihhlo
vanga thi an pung leh ta tlat mai a, tan lak thar leh a ngai hle.
HIV/AIDS : Ruihhlovin a ken tel tha lo tak chu natna tihdam
theih loh HIV/AIDS a ni. Kristian ram tia kan chhuan em em, heti
khawpa inkhawm tamna ram leh Camping uarna ram siah hian he
natna hi kan do hneh hlei thei lo chu a ni.
Mizoram State Aids Control Society report
( As on April 2012)
Thisen endik zawng zawng : Mi 1,91,398
HIV positive hrik pai : Mi 6905
Aids vanga thi zat : Mi 306
Inkaichhawn dan tlangpui:
Sex atangin : Mi 4519
Inchiuna atangin : Mi 1935
Chhungte atanga kaichhawn : Mi 255
A dang atangin : Mi 196
HIV positive te kum zat :
Kum 14 hnuailam : Mi 272
- 19 -

D
Kum 14 - 24 : Mi 1646
Kum 25 - 34 : Mi 2911
Kum 35 - 49 : Mi 1845
Kum 50 chunglam : Mi 230
Kum hriat loh : Mi 1
April- September 2012 inkara Aizawl District chhunga
Integrated Counselling and Testing Centre (ICTC) 25-a mi 15,450
thisen endiknaah HIV hrik pai mi 553 hmuhchhuah a ni a, naupai
mi 5671 thisen endik zingah mi 55 te thisenah HIV hrik
hmuhchhuah a ni bawk. Kan hnam a boral loh nan theihtawp
chhuaha HIV/AIDS darh zel lohna tur kawng kan zawh a tul takzet
a, helam kawnga thawktute tawiawm a, kawng kawhhmuh zel hi
mitin mawhphurhna a ni.
Sualna tipungtu leh kan ram dinhmun: Zu leh ruihhlo hian sualna
leh thiltha lo hrang hrang a tipung a, sualna hrang hrang- ruk ruk,
tualthah, inrawk leh pawngsual lo thlenna chhan tam ber chu zu
leh ruihhlo avanga ngaihtuahna fim hman loh vang a ni chawk.
Kumin January - February chhung mai khan he Lalpa zawnchhuah
ram , ringtu inti tamna ramah hian ruang chhar 4, mahni intihlum 8
leh tualthahna 3 a thleng hman der a, HIV positive pun nasat dan
pawh kum 2000-a mi 41 chauh kha kum 2003-ah chuan mi 222
an lo tling der a, kum 2012 (April thleng) ah phei chuan HIV hrik
pai mi 6905 an tling ta dawrh mai ! Kum 2011 chhung mai khan
Police-ah thilsual tih case 2723 siam a ni a, kum 2007 atanga
2012 (April thleng) khan Mizoramah inpawngsualna tum 452 a
thleng a, India ram pumah a mi cheng zat chhutin pawngsual tamna
ber state a ni. Kum 2008 - 2011( September thleng) khan Mizoram
pumah mahni intihlum mi 737 an awm a, kum 2011 chhung mai
han rilru na avanga mahni intihlum mi 53 an awm. Kum 2011-a
NGO pakhat zirchiannaah Aizawl khawpuiah hmeichhe awm herh
leh inzuar (KS) 480 vel an awm a, kumin hian hmeichhe inzuar
- 20 -

D
660 zet an awm a, chung zinga 2.80 % chu HIV positive an ni.
Hetih lai hian mahni mipatpui mutpui thin mi 513 an awm a, Aizawl
district chhungah ruihhlo hmanga inchiu thin mi 4904 enkawl mek
an ni.
Hetiang hi kan ram dinhmun a nih si avangin hmalak nasat
a ngai hle. Kan ram hian hmangaihtu YMA te min nei a, YMA
member kan nih si chuan a humhalh kawngah kan ralbang thei
lovang.
III. Ei leh bar zawnna leh kawng hrang hranga intodelh
theih nana hmalak :
Ram leh hnam humhalh nana hmalakna tur pawimawh ber
pakhat chu intodelh a ni. Eng anga hnam tam pawh ni ila, ei leh
bara kan intodelh si loh chuan kan him tak tak thei lo. Tam ringawt
hian mi chhiahhlawh leh nekchep nihna a dal reng reng lova, midang
rahbeh nih kan duh lova, hnam dang sumdawng te kan ngaimawh
a nih chuan keimahni tal kan intodelh a ngai. Ram leh hnam
changkang leh hmasawn an tehna ber pakhat chu a mipuite
thawhchhuah atangin a ni fova, intodelh lo hnam a huaisen theih
lova, intodelh lo ramin hma a sawn thei tak tak lo.
Intodelh tur chuan mamawh tihtlem kawng zawn pawh a
tul a, mahni mamawh thawk chhuak turin tan kan lak a ngai hle.
Mahni neih tawk hlut thiam a, inrenchem taka sum leh pai
khawlkhawm thiam tura inzirtir zel pawh kan ngai. Kan taksa leh
thlarau tana hlawkna awm miah lo, pan hnah leh kuhva ringawt
pawh hi phai lam atangin Mizoramah thlatin Rs Nuai 35 vel man
ve ve kan chaw lut a, kan Mobile bill atana kan sen te hi a tam
asin!! Mizoramah hian Mobile handset nuaih 6 chuang hman mek
a ni a, chhungkaw khatah Mobile phone 3 zel awm ang a ni. Heti
em em lo deuh hian kan khawsa tlang theiin ka ring tlat. April 23,
2010-a BBC News-in Mizoram min puan dan te kha ngaihtuah
- 21 -

D
zui tham a ni, ‘India hmarchhak kil,Mizoramah chuan Mobile
phone 6,00,000 chuang a awm a, thla tin Mobile Phone billah
Rs maktaduai 50 vel an seng thin. He state-ah hian mimal
industry erawh chu hmuh tur awm lo tluk a ni’ tiin.
Ram leilung faten ‘hnathawh tur a vang’ kan tih mek lai
hian ram dang mi leh hnam dang mite chuan thawhsen loh an hmu
si. Hemi avang hian thlatin Mizoram pawisa maktaduai tel chu
phai lam leh Burma lamah a luang lut si a ni.Hnathawh loh hi
inchhuanna tur a ni lova, zaha lak chi a ni zawk tih zawnga thanharh
kan mamawh a, ram dang mite leh hnamdangin kan rama hna an
thawh ang hi, thawh tur dang kan hria a nih si loh chuan mahni
intodelh nan a ram neitute hian kan thawh ve mai a ngai a ni tih hre
chungah nun a ngai a, helam kawnga inzirtir nasat hi kan mamawh
hle.Robert Burton-a chuan “dawngdahna aia lian nguina thlentu
a awm lova, hnathawh aia tha nguaina damdawi a awm hek
lo ” a ti a, kan Bible-ah ngei pawh “ Tupawhin hna a thawh duh
loh chuan ei pawh ei suh se ( II Thes 3:10 )” a ti. Hmanah chuan
thalai hnathawk lova khawlaia tei mai mai an awm chuan “I dam
lo em ni” an inti thin a, khawlaia awm mai mai kha an zak thin a ni
ngai a, tunah erawh chuan hnathawk lova tei mai mai zaha la tumah
kan awm ta lo. Hnathawh hmusit zawnga pianthar te, hnathawh
zak tlat YMA member nihte hi i zak ang u.
Intodelh hi zahawmna a ni a, mahni thawhchhuah phu lova
khawsak leh nun hi thil zahthlak tak a ni tih inzirtir a ngai. Mobile
Phone Handset Rs 1,00,00 chuang man neiha, chhungte hnena
Top Up man dil duk duk zahna chang hriat leh si lohte hi bansan
ngam a tul tawh a, chhungte chawm hlawm si, Show room a mi
ngat thawmhnaw man to tak tak inbel tum ang chite hi bansan a
hun ta. A thawk chhuaktu aia a hmang raltu kan tam hian
chhungkua a tibuai a, rukruk a hring chhuak a, khawtlang
nun a tichhia thin. Pawn lam hnatlanna leh pawl hminga thawhho
- 22 -

D
changa taima fu si, in lam leh mahni hrawk chawmna tur lama kan
taima leh duh tlat thin lote hi inngaihtuah harh a hun tawh a, zing
thawh bak thawh tur nei hran lo, mamawh leh duh erawh ngah
tak thalai, hmasawn tum miah lo kan tam lutuk hi kan ram thanmawh
bawk pakhat a ni a, intodelhna kawng daltu a ni. Gibbon chuan
“Mihringin hma a sawn loh chuan a hnungtawlh emaw rawih
lam a pan tal emaw a ni thin” a ti. India ram state zinga ziak leh
chhiar thiam tam ber dawttu Mizoram-in thawnchhuah tur chu
thudang, ei leh bara kan mamawh tawk pawh kan la thawkchhuak
lova, kan intodelh thei lo hi a mak hle !
Mahni mamawh thawkchhuak turin hna te lua leh hniam
lua a awm thei lo.Kan hriat loh lamah hian mi ngaihsanawm tak
tak erawh an awm teuh...Kulikawnah Chanchinbu zawrhna atanga
Cement In lian tak sa thei Pu T.B Siana a awm a, Khatla vengah
hmeithai Pi Ngurbiaki ( 54), meihawl leh vawk vulh atanga Cement
in chhawng li lai sa thei a awm bawk. Tv Rozikpuia, Armed Veng,
nitin chhangban zuar chhuak thin chuan ni khatah Rs 400/- a hlawh
thin a, thla khatah Rs 1,00,00/- a hlawh pha daih. Pi Chhumi
(79)Dinthar chuan nitin Aizawl khawpuiah Magazine a zuar kual
thin a, ni khatah Rs 300/- a hlawh pha a, thla khatah Rs 7500/- a
hlawh daih, nula nalh tak tak tuktin zing dar 3:30 vel atanga Zarkawt
leh Dawrpui pheia chanchinbu sem kual thin pawh an awm. A
lungchhiatthlak lai ta ber chu chutiang zawnga hma la duh si lova,
khawi lai dawr emaw nilenga nghah a, thla khata Rs 1500/-
Rs 2000/- vel hlawh kan thlang zawk tlat hi a ni. Zaninah hian
Chanchinbu sem tur leh chhangban zuar a, meihawl zuar turin kan
inzirtir a ni lo. Hnathawh hi a zahthlak lova, eng hna pawh hi
eizawnna tlak a tling, tuman hnathawk thinte an hmusit ngai lo kan
ti mai a ni. Heng mite hi nu leh pa thawhchhuah ring a, inla lian a, in
vaivung thinte ai chuan an entawntlak zawk kan ti a nih hi.Chawm
hlawm thalai, chawm hlawm State ni chungin ram leh hnam humhalh
huai a theih loh.
- 23 -

D
Kan lo neih dan te hi ennawn a tul ta, ram awl awm duai
si, kum khat ei khawp pawh thawkchhuak thei lova hma kan la
thin te, kan tih ve theih ngawih ngawih ranvulh thlenga intodelh
lova, State danga mi kan han chaw lut thinte hi ngaihtuah tham a
tling.Mizoram sorkarin kut hnathawktute chawikanna tur policy a
lo neih tawh - Garden Colony, Jhum control, MIP leh NLUP te hi
a tha vek amaherawh chu engatinge a nih tur anga a nih loh fo le ?
A hlawhtlin nan tih tak takna kan neih loh vang a nih ka ring tlat.
Mipui nawlpui inhlawhfakna MGNREGS te, mi rethei chenna in
nei lo tana in sakna tur IAY te, thingtlang khaw kar kawng siamna
tur PMGSY te, leilet leh luidung cheibawlna tur IWDP leh IWMP
te, Self Help Group hmalakna tur SGSY te thingtlang khaw tui in
tur pekna ARWSP te hi a nihna ang takin kalpui ila, thuneituten
pawhin chanvo insiam ve phet tum lo sela, mipui hnena thleng tur
chu thleng mai sela, chutiang bawk mipui pawhin kan hnathawh
danphung (Work culture) tihdanglam nan leh thatchhiat phah nan
hmang lo ila, kan ram hian hma a sawn ang a, kan intodelh phah
ngei ang. Kan ram intodelhna atan rinawmna leh tihtakzeta
thawhrimna kan mamawh ber a ni.
IV. Hnam nun kal sual tur laka inhumhalh leh hnam
nihna a bo loh nana hmalak :
Khawvel hmasawn leh thang zel rualin kan ngaihtuahna
leh duhzawng te, kan rilru put hmang leh thlir dan te a dang chho
ta zel a, changkanna leh thanna chu kan mamawh a, mahse a ruala
kan ngaihtuahna leh rilru kan her rem thin loh avangin ngaihlut tur
thlan kawngah kan kal sual ta lek lek. Zai thiam te, hmel thate,
infiammi te an ngaihsanawm a, a hlut pawh an hlu. Chutih rual
chuan a hleihluaka kan buaipui thinte,mahni hna thulh phah thak
thak hial a,kan zahawmna hloh thak phah hiala kan chim buai thin
te hi changkanna lohna pakhat a ni tih hriaa, bansan ngam a hun
tawh a,an talent chhuanawm tak hlutsak chunga ngaihhlut dan
tawk thiam a ngai a ni.
- 24 -

D
Hmasawnna leh changkanna karah kan ngaihhlut zawng,
ngaihsan zawng a fuh loh chuan chhiatna kawng bak zawh tur
dang kan nei lo. Bike chanchin hre viau, Chanchin Tha hre leh
mang si lote, Football chanchin hre em em mai, mahni vengchhung
chhiatni thatni inkaihhruai dan hre leh mang miah si lote hi thil ropui
tak a ni hran lo. Inkhel ena meng thei viau si, mitthi lumena meng
leh thei der si lova haw zul zul thinte hian ngaihtuah tur a titam.
Kuttling lova sum thawhchhuah thin te hi mausam ngam a ngai a,
hah thikulin a sum neihte a thawk chhuak lo tih hriat ngawih ngawih
leh thlan tlaa a hlawh chhuah ni lo tih hriat em em te thleng pawha
sum ngah vang hrim hrima kan han inngaisang leh inchawimawi vel
ta chiam thin hi bansan ngam a ngai tawh. An hlawh/thawhchhuah
dik tak leh an khawsak dan inmil lo sorkar hnathawk an tam
a,hengho hian zak miah lovin Kohhran leh khawtlangah chanvo
thate an la chang ta zel a, heng mite en dan tawk pawh mipuiin kan
thiam a ngai ta. Mizoram tichhetu pakhat chu corruption a ni a,
corruption-ah chuan dawngdahna, zelthelna, inthlahdahna,
thatchhiatna leh kut tling lova sum lakluh thlengin a tel vek. Sorkar
hnathawk pension hlei thei lote hian mi nuih an tiza tih inhria sela,
kuttling lova contract hna thawk thinte hian zah nachang hre rawh
se. George Bernard Shaw- a’n “Khawvela thil pawimawh ber
chu sum hi a ni. Hriselna te, chakna te,inpekna te,zahawmna
te,mawina leh hmelthatna te hi sum vanga awm vek a ni” a lo
tih chu kan sukthlek leh tualzal nun en chuan a taka tidiktute kan
nih hmel hle. Ram leh hnam humhalh tur chuan sum hmanga engkim
kan teh ta mai nia lang hi kalsan ngam a tul.
Kan piantharna te hian kan nunah danglamna a thlen thin
em le? Khawnge ka piangthar tawh si a, ka kum dik lo taka ka
tih-naupan hi ka han siam tha teh ang ti tawh engzatnge awm le?
Kumin chu ka thawkchhuak ta nual a, kan dinhmun a ziaawm ta
bawk a, BPL list atang hian ka han inpaihtir tawh teh ang ti tawh
kan awm em le? Kum khat chhunga kan chhungkaw thawhchhuahin
- 25 -

D
Rs nuaih 2 a pel ta si a,kumin chu ka fapa,ka fanu in Scholarship
dil tawh suh se ti kan awm tawh em le? Ka contract hna hi piangthar
lo hna aiin a tha ngei tur a ni tia rilru siam danglam kan awm tawh
em le ? Biak Inah ka lam nasa si a, khawnge mi rel kan sim tawh
teh ang tia inhmuchhuak thar engzatnge awm tawh ang le? Mahni
thisen zawmpui nau te pawh awm peih mang lovin Sap ramah mi
nau an han awm peih tlat te, mahni pi leh pu te buaipui peih mang
si lo, mahni chhung leh khat pawh ni miah lo, mi pi, mi pu awm
tura ram pawn an han pan vang vang te hi engtinnge in ngaih ve le?
August 1965-a Malaysia awpna atanga Singapore a indan
chuan mipui an lungngai hle, mahse tihtakzeta ram hmangaihtu Prime
Minister Lee Kuan Yew-a leh a tul huna ram tana chan tur pawh
chan huam mipuiten hma an han lak tak tak chuan kum 8 chhungin
Singapore chu khawvela khawpui nuam leh thianghlim, changkang
bawk, sum la lut hnem leh ram hausa a ni pha...Keini erawh chu
Compensation ringawt beiseia kan khawsak avangin kan rama
project tam tak chu a thuanawp mek a nih tak hi!! Khawiahnge
vantlang leh midang tana inpekna nun kha a awm tak le? ‘Sem
sem dam dam, ei bil thi thi’ ti liam liam thin kha tunah chuan
‘Sem sem thi thi, ei bil kawt kawt’ kan ti zo ta a nih hi !
Chhungril nun hi pawn lamah a langchhuak a, tuna kan
lanchhuah dan hi kan chhungril nun chu a ni. Engngemaw mai maia
mi chawimawi kan uar viau laiin ram leh hnam tana mi
chhenfakawm te chawimawi kawngah erawh kan hnufum leh viau
lawi a, in leh lo ngaihtuah aiin nawmchenna leh ei tur buaipui zawk
kan tam. Ram leh hnam humhalh tur chuan rilru thianghlim te, mimal
leh vantlang hriselna leh thianghlimna kawngah hmalak a ngai a,
hrisel loh chuan engmah a tihtheih loh. Taksa ngeih leh ngeih loh
lam ngaihtuah miah lova, ka-in a chak apiang ei mai thin kan nih
avangin harsatna kan tawk nasa. World Cancer Day 2012 a mi
thiamte report-ah chuan Mizo hmeichhia 62 % in vaihhlo tih an
- 26 -

D
ching a, Mizoram State Tobacco Control Society-in sikul naupang
2295 a zirbingnaah 54 % in vaihhlo eng chi pawh an hmang a,
India ram pum chhutin mipa leh hmeichhia cancer vei tamna ber
state kan ni te hi, a chhuanawm loh hle. Nun uluk nachang hre lo
hnam an hrisel tak tak thei lova, an dingchhuak tak tak thei ngai lo.
Zirna leh thiamna atangin kan nun chhe mek hi a siam that
theih a, zirna uar khua leh veng apiangah hmasawnna a awm a,
ruihhlo bual at leh ngaihsan tur dik lo ngaihsan tlatna a ti
bova,khawtlang nun a nuam thin. Zirna kawnga mi hlawhtling te
ngaihsan leh ngaihhlut thiam te hi zirlaite fuihtu pawimawh tak a ni
a, mi hlawhtlingte hian rual elna an neih vangin zirna leh thiamna an
ngaihlu a, chumi hlawhchhuak tur chuan theihtawp an chhuah thin
a lo ni.
He rual elna nei tur hian ‘thliarkar rilru’ kan neihte paih
bo a ngai a, mahni khua leh veng piah lam thleng phak ngaihtuahna
kan neih a tul. Inhungbikna lama kal nasat lutuk leh changchawi
luatte hian hnam tlakchhiatna a keng tel ve tho tihte pawh hriat a
tha.Khawvel hawiher kan zir chian a, kawng hrang hranga inelna
khawvel khelmuala tel ve phak tumin inbuatsaih ve a tul tawh a.
Globalisation in min deng ve mek a, a ruala rem taka lo inherrem
thiam a ngai. Look East Policy-in min nuai tan a, hemi hunah tak
hian kan Mizo hnam zemawi leh nunphung tha - tlawmngaihna,
rinawmna,taihmakna leh dikna te a pawimawh zual sauva, pawlawh
taka nun leh lepchiah taka khawsakna lak ata kan inhumhalh a
ngai bawk. Hmasawnna avangin ram hi thang uak uak mah se, a
mi cheng ten kan hnam rohlu tha leh mawi - tlawmngaihna, aia upa
zahna, rinawmna, dikna te kan thlah a nih vaih chuan hmasawnna
duhawm lo ber a tling ang.
Kan ram hmasawnna hi Border Trade emaw Multi Nodal
Project emaw ah pawh innghat ni sela, thiamna tihpun leh hnathawk
- 27 -

D
peih mi chherchhuah lama kan kal a nih si loh chuan a hlawkna
teltu kan ni chuang lo ang. Kan zir thiamna te hian hnathawk peih
lova min chhuah mai ang tih erawh a hlauhawm hle a, ziak fung
nen chauhva eizawn tur emaw ti chunga zir thiamna kan neih chuan
zirna tum ber kan thelh chiang hle ang. Tum nei mumal lo thalai
kan tam lutuk ta hian harsatna min thlen a, chuvang chuan ram leh
hnam humhalh tihhlawhtlin nan rual elna rilru atangin, a sang emaw
a hniam emaw, engngemaw tal tum neih a ngai.
Thawhrim avanga mi hlawhtling te, rinawm taka mahni
hna thawk thin te, ram leh khawtlang tana tangkai zawnga mi
inphalte hi an ngaihsanawm a, an entawntlak a, chawimawi pawh
an ngai. Chutiang mi ni tura inzirtir a ngai a ni. Kan ngaihsan zawng
chu rinawmnaah innghat sela, belhchian dawl bawk sela, chu chuan
thil tha zawng zawng - dikna te, zahawmna te, thatna te, taihmakna
leh thawhrimna te a keng tel vek tih kan hriat a ngai hle. Khawvelah
hian thawhrimna tluka ropui a awm chuang lova, thawhrimna hi
englai mahin khawvelin a hmusit ngai lo. Thomas Jefferson chuan,
“Vanneihna hi a awm ngei a, mahse mi taimate kawngah
chauh a awm” a lo ti hial a, khawvel hian thawhrimna tel lova
hlawhtlinna dik thuruk pekchhuah tur a la nei lo. Mi hlawhtling ni
tur chuan zir thiamna piahah thawhrim a la ngai zel tih hrechunga
zirna leh thiamna kawnga rual el hi ram leh hnam humhalhna kawng
pakhat a ni.
Kan inpumkhatna pakhat Mizo tawng tihlar zela, thangthar
zelte hnena Mizo lam chi hrang hrang leh Mizo kutchhuak/thilte
ngaihhlut leh chawisan inzirtir zel hi ram leh hnam humhalhna pakhat
a ni bawk.
- 28 -

D
V. Ram ro hlu-thing leh mau, nungcha, lui tui leh boruak
humhalh
Kan ram ro hlu- thing leh mau, nungcha hrang hrang, kan
lui tui neihte leh boruak humhalh hi he kumpuan thiltum pawimawh
tak a ni bawk. Kan Medicinal plant plantation neih te tihthar leh a,
phalna neia thing leh mau late pawhin a tichereu zawng leh suasam
zawnga hma la lo tura inzirtir a ngai hle.
Kan lui tuite humhalh thiam a ngai a, kum 2011 YMA
General Conference-a thu kan rel - kan tui hna te humhalhna nana
hmalak tih bawhzuia Central YMA leh PHE Department
thawhhonaa Tuihna humhalh beihpui kan han thlakte hian rah tha a
chhuah zel turah ngai ila. A mipui nawlpuiten tui pawimawhzia leh
a hna te humhalh thiam a tulzia lama kan thanharh zel a pawimawh.
Khawvel mi thiamte chuan tun atanga kum 50-ah chuan thuneihna
leh tuialhthei inchuh vanga indo aiin tui thianghlim inchuh vanga
indona a thleng nasa tawh ang an ti. Tui thianghlim inchuh vangin
khawvel dangah ram leh ram intihbuaina a thleng mek a, Nile luipui
chungchangah Egypt leh Sudan ten buaina an nei reng a, Euphrates
leh Tigris luipui inchuhin Turkey, Irag leh Syria te an intibuai mek
a, Jordan lui tui inchuhin Israel, Lebanon, Syria leh Jordan ramte
an innghirngho reng a.India ramah ngei pawh Cauvery lui tui inchuhin
Karnataka leh Tamil Nadu state te an buai reng a nih hi! Kan
rama lui kan humhalh that a, kan tui hnate kan enkawl that ngat
chuan engtikniah emaw chuan phai tual lama cheng te khu tui
thianghlim mamawhna avangin kan thuhnuaiah kan la dah ngei ang,
chumi atan erawh chuan kan tihtur kan tih a ngai thung.
Ram leh hnam ropuina chu a len leh tetah a innghat ber
lova, a mihring te nunphung leh chetziaah a innghat zawk. Ram leh
hnam humhalhna atana inzirtir tul leh pawimawh tak chu ram leh
hnam hmangaihna thinlung neih a ni a, miin neitu rilru nei tel
chunga a khawsak na na na chuan ram leh hnam a chhiat a thata
- 29 -

D
mawhphurhtu nia inhriatna a lo nei a, chumi atang chuan a
mihringpui te chauh ni lo, kan ram rohlu - thing leh mau, khawmual,
boruak leh tuia nungcha te thlenga tichereu lova, humhalh duhna a
lo piang thin.
YMA Member ten kan hriatreng tur chu kan ram leh hnam
hi humhalh tlak rual lovin nekchep leh suasamin a awm mek a ni
hauh lova, beidawnthlak khawpa, humhalh rual lovin kan ram leh
hnam hi a chhe ta vek a ni hran lo, humhalhna tur tam tak erawh
kan nei tihah kan chian a ngai. He ram hi a chhengchhia, a rualrem
lo, a leilung a la upa tawk lo tiin sawi sawi mah ila, he khawvelah
hei lo chu ram dang kan nei lo. Ram changkang zawk leh India
ram hmun dangah han thang vang vang thin mah ila, kan rilrua riak
leh kan ngaih ber chu ‘Kan zotlang ram nuam’ tho hi a ni. Mi
thenkhatin “ Mizoram chu sualna a nasa tawh em mai kan fate
phaiah dah bo daih teh ang ” an han tih te hian mahni kan
inmualpho thin a lo ni. Engatinge a siam that hna a thawh mai loh ?
Engatinge a fate seilenna tlaka a chhungkua a siam mai loh ?
Ireland ram zalen nana beitu Robert Emmet-a chanchin
chu Irish-ho chuan tun thlengin an la inhrilhchhawng thin. Thi tura
a chungthu rel a nih a, a thuchah hnuhnung chuan chona siam tharin,
an ram tana nun hlan duhna thinlung a neihtir nasa hle. “ Ka thlan
kawngka chu min lo dawngsawng turin a inhawng ta e, chutah
ngei chuan ka pil riai riai ngei ang.Thil pakhat chiah ka ngen
e - ka thlan lungah engmah rawn ziak suh u, thlamuang takin
ka chawl tawh ang e. Ka ram hi ram dangte zinga a dinchhuah
ve hunah, ka thlanlung in la rawn ziak dawn nia” tiin. A
thlanlungah engmah ziah a ni lova, a thlan hmun hria pawh an awm
lo mahse ram tana nun hlantu Robert Emmet-a thlalak erawh chuan
Ireland ram in sang tam tak banglai a luah a, a thuchah hnuhnung
chu infuih thar nan an la hmang ta reng a ni. Mizo tlangval thu leh
hla thiam Kaphleia’n “Khawvel hi eng nge ka hnutchhiah ang?
- 30 -

D
Ka ram hi eng nge ka hnutchhiah ang? Hnahthel ro angin ka
tla bo mai dawn em ni? tia ka inzawh hian chhan har ka ti a,
ka lungngai thin a ni....” a tih te, TB avangin a thi mai tawh
dawn tih a inhre si, thildang ti hleithei lova a awm hrehawm ti
lutukin, “ Tupawh keimah anga mahni leh midang tana thiltha
tih tum lova, ral thlir mai mai mi chu a ram tan fapa tlaktlai
lo, hrin man awm lo a ni ang ” a lo tihte leh Pu C. Zoramliana’n,
“ Kan vanglai hun leh ni zawng te, Kan ram tana hlan zelin,
Fam dairial pawh chang ila, Kan sakruang Mizoram tan” a
lo tihte hian kan ram leh hnam tan kan ngaihtuahna kaitho lul rawh
se.
Thangthar lo la awm zel turte tana chenna tlak ram nei tur
leh chhuan tlak hnam hnutchhiah tur chuan vawiina mite hian hma
kan lak a ngai a, kan tu leh fate zelin min dem loh nan humhalh a
ngaihnaah pawh hma la zel ila..He thu hi chu a pawimawh - Ram
leh hnam humhalhnaah Politics-a kan ngaihdan inan lohna
hian hmalakna dal lo sela, Kohhran thurin inan lohna
avangin hmalakna thuanawp lo sela, a pawimawh berah
chuan kan ram leh hnam humhalh tur hian YMA member te
kan tling tawk vek tih hria ila. Kan theihna chin leh theih dan
erawh chu a inang lo mai thei mahse kan theihna kawng kawnga a
humhalhtu kan nih theuh chuan kumpuan hlawhtling tak kan nei
ang a, a hlawkna teltu pawh keimahni tho kan ni ang a, kan tu leh
fate zel tan chhenfakawm tak ram leh hnam kan hnutchhiah bawk
ngei ang.
Tho la, ding ta che, i hliam a dam e,
I tha thumte a kiang e;
Hnutiang hawi lovin ram kal siam ta che,
Khuavel i la chhing ngei ang.
- 31 -
- V. Thangzama