MWONGOZO WA UWEKEZAJI MKOANI SIMIYU

Zifuatazo ni miomgoni mwa sababu za kuwekeza Mkoa wa Simiyu
• Mkoa huu unafaa kwa uwekezaji kwa sababu ya hali nzuri ya hewa,
ambayo ni nzuri kwa utalii, kilimo na ufugaji. Amani na utulivu wa
kisiasa ambavyo hujenga mazingira ya usalama pamoja na kiwango
cha chini cha uhalifu ni vivutio vingine vya kumfanya mtu awekeze
katika mkoa huu. Wawekezaji hawana haja ya kuwa na wasiwasi
kuhusu usalama wa mali zao watakazowekeza katika mkoa huu. Zaidi
ya hayo, wananchi wake ni wachapakazi na wanazo stadi za kutosha
za ukulima wa kisasa.
• Kwa mujibu wa matokeo ya sensa ya Taifa ya mwaka 2012, idadi
ya watu mkoani Simiyu ilikisiwa kuwa 1,591,000. Ukiwa mkoa mpya
wenye maeneo yenye uwezekano wa kuwekeza ni wazi kuwa idadi ya
watu inaongezeka kila siku na kwa hiyo upanuzi wa huduma za kijamii
na uchumi unahitajika.
• Pato la kila mtu katika mkoa huu ni shilingi 510,023/- ukiwa ni
miongoni mwa mikoa yenye watu wa kipato cha uchumi wa kati
katika nchi. Kilimo kimeendelea kuwa ndiyo shughuli kuu ya kimaisha
na kiuchumi ya Mkoa wa Simiyu. Sekta hii inachangia asilimia 75 ya
uchumi wa Mkoa huu na inaajiri kiasi cha asilimia 80 ya wananchi
katika Mkoa huu. Mazao makuu ya biashara yanayolimwa ni pamba,
karanga na alizeti. Mazao makuu ya chakula ni mahindi, mtama,
mpunga, viazi vitamu, ulezi na muhogo.
• Usafiri wa kuunganisha mkoa huu na mikoa mingine na ukaribu wake
na nchi za jirani ni jambo jingine muhimu linalowavutia wawekezaji
katika mkoa huu.
• Wawekezaji wanakaribishwa kuwekeza katika viwanda vya pamba.
Mtu anapozungumzia uzalishaji wa pamba nchini Tanzania, mtu huyo
atakuwa anazungumzia pamba ya Maswa katika Mkoa wa Simiyu.
Kwa mujibu wa takwimu, hadi sasa mkoa wa Simiyu ndiyo Mkoa
unaoongoza katika uzalishaji wa pamba nchini Tanzania ukizalisha zaidi
ya tani 150,000 za pamba yenye mbegu kwa mwaka. Wawekezaji
wanakaribishwa kuwekeza katika kilimo cha pamba na viwanda vya
kuchambulia pamba na shughuli nyinginezo.
MWONGOZO WA UWEKEZAJI MKOANI SIMIYU | 3