Aiako Harria Parke Naturaleko (Gipuzkoa) interes bereziko landare ...

3.1. HARKAITZ SILIZEOAK
Euskal Autonomi Erkidegoan lehenagotik harkaitz silizeoetako landare hauei buruz zegoen
informazioa ez zen oso aberatsa: Asplenium septentrionaleren kasuan Bizkaian 3 zita zeuden eta
Gipuzkoan bakarra, Aiako Harrian hain zuzen ere, eta beraz, oso arrarotzat kontsideratzen da; Huperzia
selagoren kasuan, Bizkaian 4 zita ezagutzen ziren eta Gipuzkoan beste 4, hauetako bat Aiako Harrian,
beraz arraroa kontsideratzen da. Azkenik, Petrocoptis pyrenaica landarea dugu, Gipuzkoan soilik
ezagutzen da 2 zitarekin eta horregatik oso landare arrarotzat hartzen da (ASEGINOLAZA et al., 1985).
Petrocoptis pyrenaica subsp. pyrenaica (J.Bergeret) A.Braun ex Walpers
KOROLOGIA: BANAKETA GEOGRAFIKOA, ZENTSUA ETA OKUPAZIOA-AZALERA
Petrocoptis pyrenaica, Pirinio atlantiar frantzesetako eta mendebaldeko Pirinioetako endemikoa da
(CASTROVIEJO et al., 1990; SAULE, 1991). Aragoien Huescan ere agertzen da eta Euskal Herrian
Nafarroan, Gipuzkoan eta Araban (VILLAR et al., 1997). Gipuzkoako populazioak Aiako Harrian daude eta
Nafarroako eta Lapurdiko populazioekin jarraiera bat osatzen dute Aiako Harria-Bortziri mendigunean.
Landare honek pareta bertikal edota estraplomatuak kolonizatzen ditu eta sarriago ageri da paraera
horizontala duten harkaitzetan baino. Horregatik bere banaketa ez da homogeneoa Aiako Harria guztian,
hau da, habitat eskuragarritasunak baldintzatu du espezie honen banaketa. P. pyrenaica-ren kasuan ez
dugu bizi deneko eremuaren azalerarik neurtu, alde batetik mendiak berak ezartzen dituen
zailtasunengatik eta bestetik ezinezkoa litzatekeelako datu erreal bat lortzea.
Hauxe da banaketaren berrikuspen bibliografikotik ateratako emaitza eskala geografiko
desberdinetan adierazita:
Mundu eta Europa-mailan: Pirineo atlantiar frantzesetako eta mendebaldeko Pirineoetako endemikoa
da (CASTROVIEJO et al.,1990; SAULE, 1991; VILLAR et al., 1997).
Penintsula Iberiar-mailan: Huesca, Nafarroa, Gipuzkoa eta Arabara mugatzen da (CASTROVIEJO et
al.,1990; VILLAR et al., 1997).
Euskal Herri mailan: Mendi septentrionalen ekialdeko muturrean aurkitzen da espeziea. Nafarroan,
San Donatok landarearen mendebaldeko banaketa-muga osatzen du. Gipuzkoako populazioak Aiako
Harrian daude eta Lapurdikoekin jarraiera bat osatzen dute Aiako Harria-Bortziri mendigunean
(VILLAR et al., 1997; AIZPURU et al., 1999).
Euskal Autonomi Erkidegoan: Aiako Harrian 700 m-tan eta Aralarren, Irumugarrieta-Aldaonen 1360
m-tan aurkitu da (ASEGINOLAZA et al., 1985).
Aiako Harria Parke Naturalean:
Petrocoptis pyrenaica espezieak gaur egun betetzen duen eremua, bibliografian topatutakoa baino
eremu zabalagoa da. Datu bibliografikoetan (ASEGINOLAZA et al., 1985) koadrikula bakarra aipatzen da
(30TWN9893) eta mendiko miaketaren ostean beste lautan agertu da: 30TWN9895, 30TWN9995,
30TWN9892 eta 30TWN9992 (ARBELAITZ et al., 2002).
23