Euskal nazionalismoa eta hezkuntza publikoa: ikastolen ... - Euskara

132 Euskal nazionalismoa eta hezkuntza publikoa: ikastolen publifikazioa
2.3.2.2.- Nazio-Estatuko kideak sortuz: Prusia, Frantzia eta Espainia
Europan integrazio politikoa estatu zentralizatuaren bitartez gauzatu da
nagusiki, eta, ikusi dugunez, estatu mota horren jatorria monarkia absolutistan
datza. Aurreko ereduarekin alderatuz, estatuaren autoritatea indartsuagoa da, eta
eremu zabalagoa hartzen du. Estatuak bere zuzendaritzapeko instituzioetan biltzen
ditu gizakiak, herritartasunari dagozkion eskubideak bermatuz eta betebeharrak
ezarriz. Hauxe da, A. D. Smithen arabera, nazioa eta masa hezkuntza harremanetan
jartzen dituen lehen lotura: gobernari absolutistek hezkuntza sistema uniformea
ezartzen dute estatuaren funtzioetan eragingarritasuna lortzeko asmotan.
Alfabetatze unibertsalaren bitartez, lurraldean eta hizkuntzan oinarritutako nazio
sentimentua pizten da (Smith 1976: 208). C. Lozanok bat egiten du ideia horrekin,
dioelarik Estatu Hezkuntza Sistemak lehenago eratu zirela estatuaren osaketa
prozesua biziagoa izan zeneko herrialdeetan (Lozano 1994: 118-119). Ibilbide horri
Nazio-Estatuko kideak sortuz (creating members of the nation-state) deitzen diote hedapen
ideologikoaren teorilariek. Eredu horretan estatuari bizkarreratu zaio, argi eta garbi,
nazio interesekoa den hezkuntzaren defentsan jardun beharra, halako moldez non
"The state promotes a mass educational system in order to transform all individuals
into members ot the national polity, and it supports a uniform system to build devotion
to a common set of purposes, symbols, and assumptions about proper conduct in the
social arena. The dominant form of expansion of mass education in Western Europe
took this route, the creation of nation-state members." (Boli/Ramirez/Meyer 1985:
159)
Eredu hori jarraitzen duten adibide ezagunenak Prusiari eta Frantziari
dagozkie, eta azken honetatik hurbil, baina berezitasun askorekin, Espainia kokatzen
da.