Atxikimendu insegurua eta genero rolak pertsonarteko ... - Euskara

Ondorioak eta eztabaida 231
Genero roleko aldagaiak eta atxikimendua mendekotasun patologikoaren
agertzen diren korrelatuak izanik ere, diseinu mota honekin ezin da kausalitatea
bermatu. Hala eta guztiz ere, pentsa daiteke aipatu hauek mendekotasunaren bidea
marrazten dituzten aldagaiak direla. Gizakiaren garapena kontutan harturik,
atxikimendua eta genero rolaren araberako identitatea lehenago agertzen dira
ontogenian. Mendekotasun patologikoa helduaroan kokatzen den bitartean,
atxikimenduaren ardatzen azpiko eredu mentalak haurtzaroko lehenengo harremanean
hasten dira eratzen. Buru-eredu eraginkorren jarraikortasuna guztiz zehatza ez bada,
neurketa-tresnen fidagarritasun ezari eta gertatzen diren aldaketei egotzi dakieke (ikusi
Feeney, 1999). Edonola ere, gertatzen diren aldaketak atxikimendu insegurutik segurura
jazotzen dira eta ez alderantziz, gizakion helburua segurtasunera bideratzen baita
(Hazan eta Shaver, 1993). Era berean, genero roletako zurruntasuna lehenago gertatzen
da, nerabezaroan birplanteatzen direla gizarteak ezarritako rolak eta bere zentzuak,
honen inguruko identitatea eratzeko. Denbora pasa ahala, ordea, ez da genero rolen
zurruntasuna galtzen, baizik eta areagotzen dira gizartearen rolekiko identifikazioak
helduaroan.