Hezitzaileen prestakuntza esperientziala: aisialdiko ... - Euskara

Oinarri teorikoak 66
- Ez dago bestearen ulermenik aurreiritzi batzuetan oinarrituta dagoen aurre
ulermenik gabe. Aurre ulermen horretan kokatuta dago ulertzen duenaren
subjektibotasuna. Aurre iritzi horietan, norbanakoaren egoera partikularrak eta
berezituak sartzen dira, bai eta norbera kokatuta dagoen tradizio historikoa ere.
Hori guztia, esperientzia ororen aldez aurreko orientazioa da.
- Gure kontzientzia historikoki kokatuta dago, eta historiaren ondorioengatik
baldintzatuta dago. Beraz, indibiduoak historian eragiten du, baina, era berean,
ondorio hori ere jasotzen du.
- Bestearen ulermena ulertzen duenaren lekutuk egiten da, bertan gauzatzen da.
Modu horretan egiten dugu bat bestearekin.
Hortaz, kalitate hau agertzea ez da besteen prozesu mentalak eta emozionalak berak
bizitzen dituen moduan ulertzea, sentitzea eta esperimentatzea, hori ezinezkoa baita. Estilo
honen agerpenak ezin du izan prozesu objektibo bat, besteak beste, enpatia eta bestea
ulertzea, sakonki ulertzea, ez baita fenomeno erreproduzitzailea, produzitzailea baizik
(García Amilburu, 2000). Ulertzea beraz, interpretatzea da, eta hori egoera eta baldintza
jakinetan gertatzen da. Beste pertsona bat ulertzea, bere esperientzia eta bizipenekin bat
egitea, ez da bere baitan dagoen jatorrizko sentimendua berreraikitzea, norbanakoa eta
bestearen arteko nolabaiteko bitartekotza lortzea baizik, non bestearen egoeraren
interpretazioak hezitzailea ulermenera eraman dezakeen. Norberak ez du beste pertsona era
objektiboan ulertzen, aldiz, bestea sakonean pentsatzen eta sentitzen duena interpretatzen
du. Zehaztapen horiek guztiak oso garrantzitsuak iruditzen zaizkigu azaltzen ari garen
kalitatearen oinarriak finkatzeko. Kalitate honen agerpenean, hezitzaileak eta hezigaiak
azken horrek adierazten ari dena esperimentatzen dute elkarrekin. Hezitzaileak “elkarrekin
esperimentatzen” horretara iritsiko da hezituaren esperientziak iradokitzen dizkion bere
barne-erreferentzietatik. Esan nahi baita “ni zuk duzun egoera ulertzera eta elkarrekin
esperimentatzera iritsiko naizela nire barne-iturri eta –erreferentzietatik”. Hortaz, Suaren
kalitatearen bidez “ukitu” egiten du hezitzailea besteen egoerak, “ukitu” modurik
sentikorrenean gainera. Horren zergatia –eta gainontzeko harreman-trebetasunena ere-
LeDouxen (1999) aurkikuntzetan koka genezake. Berak ondorioztatzen du gizakiok begien
bidez, entzumenaren bidez... hartzen ditugun zeinu sentsorialen lehen geltokia, talamotik
pasa ostean, amigdalan dagoela, eta berau garunean kokatzen da. Beste bide bat zeinua
talamotik neokortexera daraman da, hau da, garun pentsalarira. Adarkatze horrek
ahalbidetzen du amigdalak erantzuten has dadila neokortexak informazioa interpretatzen
hasi baino lehen. Hortaz, esan daiteke garunak badituela neokortexa saihesten duten