Hezitzaileen prestakuntza esperientziala: aisialdiko ... - Euskara

Esperientziaren bilakaera eta azterketa 317
galdera horretara, eta gorputzari kasu egiten zioten. Beraz, bide hori berria zen
eurentzat, ordura arte atal edo alor analitiko gailendu baitzen.
b) Era berean, gaztetxoek nola zeuden kezkatzen eta jabetzen ziren.
Horretaz gain egoera orokorraren giroz jabe ziren.
Horrek guztiak indar handi zuen nire irudikoz; izan ere, praktika pedagogikoaren aldaketa
Lorea, Amaia, Larraitz eta Idoiaren kasuetan sentsazioetatik etorri zen, eta horren ondorioak
esperimentatzen eta bizitzen ari zirenez, eurentzako erabilgarritasuna, baliagarritasuna eta
esanahia erabat itsatsirik geratzen zitzaien. Zenbaitetan txundituta geratzen nintzen
Larraitzek eta Idoiak euren esperientziaren, edota tailer batean gazte jakin batekin
gertatutakoaren kontakizunarekin hasten zirenean, zer indar jartzen zuten euren hitzetan.
Gainera zail egiten zitzaien bizitutakoa ongi, argi eta zehatz argitzea. Bizipena hain berria,
eta hain bizia eta joriz zenez berbalizatzeko zailtasunak zituztela. Esperientziatik hitz egiten
ari zirelako, hain zuzen ere; beraiek bizitako zerbaiten inguruan, ez teoria edo euren
eremutik kanpo zegoen zerbaiti buruz.
Egoera horretan, eta praktikari eta harremanei gehiago dedikatzeak Amaiaren
espontaneitatea eta freskotasunerako joera (Ura) askatzeko bide izan zen. Tailerrak hain
lotuak eta egituratu ez izatea inprobisaziorako tartea handia uzten zien hezitzaile, eta
testuinguru horretan Uraren kalitatea agertzeko aukera izaten zuen Amaia, eta oso-oso
gustura sentitzen zen horretan, baita bere buruarekin apur bat harrituta kalitate horren
esperimentazio zela-eta:
“Bueno, ni be harrittuta gelditu naiz... Bai eta gustura, eh! Fenomeno! Oso gustura!” (Amaia
Fernández, 2. elkarrizketa).
Esan nahi baita Loreak eta Amaiak tailerrak dinamizatzeko esperimentatzen hasi ziren
modu berriak Amaiaren Ura agertzen ahalbidetu zuela. Neurri handi batean, esperientzia
berria izan zen beretzat Uraren kalitatearen indarra eta ezohikotasuna bizitzeko aukera
izaten zuelako. “Gustura sentitzen naiz Uraren kalitatearekin, nahiz eta batzutan tonta edo
xelebre samarra naizela sentitu eta ondoren lotsatzen naizen”. Haatik, horrek freskotasuna
eta bizitasuna ematen zion gazteekiko harremanari. Hezitzaileek hartu zuten bideari esker,
euren arreta gune nagusia harremanetan kokatu zuten, eta harreman horietan beraiek nola
agertzen eta sentitzen ziren. Bada, garai hartan egitasmoa elikatzen zuen indarra
harremanena zen. Argi zegoen, Bergarako nahiz Aretxabaletako gazteengan zein