Hezitzaileen prestakuntza esperientziala: aisialdiko ... - Euskara

Esperientziaren bilakaera eta azterketa 180
“Beno, taldeka jarriko gara. Irizpide bakarra launaka jartzea izango da, bai? Lasai egin taldeak
bi hiru minutu hartu, launaka jarri arte ez baitugu jarraituko”. Lasaitasunarekin hartuko luke,
nerabeei denbora utziz, eta mementokoari garrantzia emanez, taldeak egin ezean ez
bailukete aurrera jarraituko.
Ikusten duzue, bada, egoera baten aurrean trebetasun bakoitzak modu ezberdin batean
jokatzen duela. Denak balekoak dira, denak beharrezkoak, eta egoeraren arabera bat edo
beste aukeratu beharko dugu.
Ulertu al da?
Baietz esan zidaten buruarekin, halere ez nintzen oso gustura geratu. Banekien
trebetasunak askoz sakonagoak izan zitezkeela, eta emandako adibideak ez bero eta ez
hotz utzi zituen. Horrela, azalpen eta adibide gehiago emanez jarraitu nuen, baina ezer
berririk ekarri gabe, beti ideia berdinaren bueltan, hau da, norberak besteen aurrean
agertzeko modu jakin bat duela, eta gure barruko indar edo mugimenduaren arabera
agertzen garela besteengana. Hori ongi zegoen, baina azalpena apur bat findu behar nuen..
Egia esan, hori guztia agertzeko nahiko denbora hartu bagenuen ere (hau da, lehengo
saioaren erdia, bi ordu luze pasatxo), nire baitan azkar joateko irrika zegoen, edo hobe
esanda, suspertzaileek nik esan nahi nuena eta helarazi nahi niena, lehenbailehen ulertzeko
desioa. Edonola ere, bide onetik nindoala ziur nintzen. Suspertzaileek gauza berrio mordoa
eskuratzen ari ziren, baina ez arrapaladan. Oraindik sakontzeko asko bagenuen ere, gustura
nengoen ordura arteko martxarekin.
Bigarren ideiari heltzeko errealitatetik ateratako adibide bat aztertu genuen. Hezitzaileei
proposatu nien emango nien adibidea agertzen zen egoerari irtenbide praktikoa eman
beharko ziotela, ez hitzekoa, baizik eta ekintzetan oinarrituta. Nolanahi ere, ariketa honen
helburua ez zen konponbidea aurkitzea, trebetasun guztiek sistema bat osatzen dutela
ikustaraztea baizik. Elementu guztiek elkarri eragiten diotela, eta horiek Kuadrillategin
martxan jarri nahi genuen esku-hartze estiloa definitzen zutela. Honako adibide hau luzatu
nien:
Kultur Tailerretan duzuen taldea oso erritmo bizikoa da. Abiadura handia jartzen dio tailerrari,
gehiegizkoa. Zenbait gaztetxoei antzematen zaie, eta sarritan hala adierazten dute, egiten
dituzten jarduerekin ez direla gustura sentitzen. Jarduerarekin hasi eta berehala bukatzeko irrika
sortzen zaie beste zerbaitetan hasteko. Ez dute nahiko patxada eta lasaitasunik zerbaitetan ari
direnean horretaz gozatzeko, tailerretako oso gauza gutxitan lortzen dute satisfakzioa. Unean
uneko egoerak ez die asebetetzen, beti “hurrengo ekintza”rekin pentsatzen dute. Etorkizuna