Hezitzaileen prestakuntza esperientziala: aisialdiko ... - Euskara

Esperientziaren bilakaera eta azterketa 177
Galdetegiaren esaldi bakoitzaren bukaeran A, B, C, D eta E hizkiak agertzen ziren,
horiek trebetasunak ordezkatzen zituzten. Horrela, hezitzaile bakoitzak esaldia irakurri
ostean zenbaki bat jarri behar zuen erantzunaren intentsitatearen arabera; era horretan,
esaldiak zioena norberaren nortasunarekin edo jokaerarekin bat zetorrela uste bazuten 3
zenbakia jarriko zuten. Zertxobait identifikatzen baziren 1, indiferentziaz hartuz gero 0, eta
batere identifikatzen ez baziren –2. Erantzuten bukatu ostean, erantzun positiboen (+) eta
negatiboen (-) batuketa egin zuten, modu horretan letra bakoitza kopuru jakin bat izango
zuen: A-n x zenbakia, B-n y zenbakia... Hori egi ostean, letra bakoitzak irudikatzen zuen
elementua agertu nien. Lehen aldiz, azaltzen nien bost elementuen teoriaren kalitate
bakoitza, hau da, lehen aldiz entzun zuten hezitzaileek hain sarritan erabiltzea nahi nuen
hizkera: Lurra, Sua, Egurra, Ura eta Metala. Hasiera batean, izenak baino ez nizkien azaldu,
nire asmoa gehien zuten trebetasunaren arabera taldeka biltzea baitzen, eta beraien
hitzetatik eta esperientziatik zer-nolako ezaugarriak dituen entzutea. Hau da, beraiek izatea
lehendabizikoz nolakoak ziren azaltzen zutenak, gero ereduaren ikuspegi zabal eta
sakonago bat nik eman ahal izateko. Horrela, talde bakoitzak agertu zuen bere emaitzen
berri, baita trebetasunaren nolakotasuna. Denek, Aritzek izan ezik, nahiko ados eta
konforme agertu ziren emaitzekin. Nonbait, galdetegitik atera zituen emaitzak ez zetozen bat
bere izaerarekin eta estiloarekin, Sua gailentzen zitzaiola ez zen egia Aritzen irudirako. Esan
nion galdetegiaren helburua ereduaren elementuak agertzea zela gehienbat. Azalpen hori
ongi hartu zuen. Ondoren, talde bakoitzaren ondotik nik azalpena eman nuen, bai Lurra, bai
Ura, bai Sua, bai Metala eta bai Egurra zer ziren eta horien ezaugarri nagusienak aipatu
nituen. Lurra lasaitasunarekin lotu nuen; Egurra dinamismoarekin eta ekintzak eta
mugimenduak gustuko dituenarekin; Metala ordena eta pertsona metodikoekin, definizioa eta
zehaztasuna bilatzen dutenekin; Ura, bapatekotasunarekin eta sormenarekin; eta Sua
komunikaziaorekin. Honela agertu nien, gutxi gora behera, hori guztia (hitz zehatzak ez diren
arren, baliagarriak dira jakiteko ereduaren zer-nolako agerpena egin nuen lehendabizikoz):
Lurraren trebetasuna gauzak patxadarekin hartzen dituen pertsonekin loturik doa. Pertsona horiek
erritmo geldoa dute gustuko. Egurraren arketipoa pertsona aktiboa izango litzateke. Hau da,
ekintza mugimendua eta abentura oso gogoko dituena, erronkak bilatzen dabilena etengabe eta
muturreraino ahalegintzen dena. Metalarena, aldiz, pertsona ordenatu eta metodikoa izango
litzateke. Definizioa, diziplina eta egitura zehatzak gustatzen zaizkionak. Bere printzipioen arabera
jokatzen duena. Zehatzak eta ordenatuak. Ura, hau da, espontaneitatea edo berezkotasuna
errotua duten pertsonak oso sortzaileak dira. Beti gauza berrietan pentsatzen ari da, eta horrek
maiz independenteak eta bakartiak izatera bultzatzen ditu. Ez dira batere konbentzionalak, eta
diren bezala azaltzen dira munduaren aurrean. Suaren trebetasuna nagusitzen den pertsonetan
enpatia oso ohikoa izaten da. Erraz lortzen dute egoera enpatikoa, besteen sentimenduak