Hezitzaileen prestakuntza esperientziala: aisialdiko ... - Euskara

Esperientziaren bilakaera eta azterketa 157
hartzen nuen, eta eragiten zidan. Finean, niretzako esperientzia hezitzaile guztiek osatzen
zuten unitatea zen; hori bai, berorren ulermen sakona erdiesteko hezitzaile bakoitzaren
prozesua ulertu eta bertan arakatu behar nuen.
Has nadin, bada, esperientzia azaltzen.
4.2. ESPERIENTZIAREN IKUSPEGI OROKORRA
4.2.1. Hasierako prestakuntzaren ikuspegi orokorra
Hasierako ikastaroan kokatu nuen ikerketaren eta, bidez batez, formazioaren abiapuntua.
50 orduko ikastaroa diseinatu nuen. Berau 2001ko irailean eman nuen bi herritan: iraileko
lehen erdian Andoainen eta bigarren erdia Bergaran. Andoainen, bertako Gazte lokalean
egin genuen ikastaroa. Toki bikaina eta aproposa gorputz ariketak egiteko, handia zelako eta
espazio asko zuelako. Bergaran, AEK-ko euskaltegian. Nahiko egoitza txiki zen, eta ez zen
batere aproposa nire nahietarako, horrexegatik gorputz ariketa asko kalean, ondoko parke
batean, egin genituen. Orotara 100 orduz aritu nintzen hasierako formazio ikastaroa ematen.
Horrela antolatu nuen bi zioengatik: alde batetik, suspertzaile guztiek ikastaro batean
sartzeko gehiegitxo zirelako, orotara 24 pertsona; eta, beste aldetik, ikastaroa toki jakin
batean kokatuz gero, zenbait pertsonek arazoak edukiko lituzketelako bertara iristeko. Hau
da, ikastaroa Andoainen baino burutu izan ez banu, Aretxabaletatik etorri behar zuten
suspertzaileek arazo franko edukiko lituzkete heltzeko, autoz denbora larregi, eta garraio
publikoz are gehiago. Hortaz, bi aldagai horiek aintzat hartuz Gipuzkoako bi herri horietan
burutu genuen hasierako formazio ikastaroa. Andoainen 15 hezitzailek hartu zuten parte, 6
herrietakoak; eta Bergaran 11, 3 herrietakoak. Geografikoki gertuen zeuden herritakoak;
horrela, Andoainen, Andoain, Hernani, Astigarraga, Beasain, Urnieta eta Lasarte-Oriako
hezitzaile bat (nahiz eta herri hori ikerketan ez nuen sartuko); eta Bergaran, Aretxabaleta,
Bergara eta Deba. Argi gera bedi, horrek ez zuela esan nahi, gero ikusi zen legez, horiek
guztiak lanean arituko zirenik; batetik, zenbait herritan Kuadrillategi egitasmoa aurrera atera
ez zelako (gazteek ez zuten izena eman parte hartzeko, beste zenbait arazo...), Hernani eta
Astigarragaren kasuak bezala; eta, bestetik, zenbait herrik gero lanean arituko ziren
hezitzaile kopuru altuagoa bidali zutelako hasierako formaziora (adibidez, Aretxabaletak lau
hezitzaile formatu nahi zituen, bada ez bada ere, nahiz eta seguruenera bi edo hiru besterik
ez ziren lanean arituko).