Hezitzaileen prestakuntza esperientziala: aisialdiko ... - Euskara

Esperientziaren kokapena 137
Kultur Tailerrak
Kultur Tailerrak Kuadrillategi egitasmoaren funtsezko tresna ziren. Bertan hezitzaileak
gaztetxoekin harremanetan jartzen ziren, eta une eta leku horietan bertan egituratzen eta
gauzatzen zuten euren hezitzaile lana. Astean lau orduko saioak ziren, egun bakar batean
egiten ziren. Beraz, garrantzitsua zen formazioaren ikuspegitik, suspertzaileek une horretan
aplikatzeko edota agertzeko aukera izango zutelako formazioari esker eskuratutakoa, nahiz
eta formazioaren muina eta erdigunea hasierako ikastaroa eta hezitzaileekin ikasturtean
zehar egin genituen etengabeko formazioari begirako saioak izan.
Kultur tailerren bitartez, beraz, nerabeei zuzendutako euskarazko aisialdiko eskaintza
bideratzen zuen Kuadrillategi proiektuak. Horrelako eskaintzak arrakasta izango bazuen,
dinamikoa, joria, eta dibertigarria izan beharko zuen nahitaez. Kultur tailerren bidez honako
helburu hauek lortu nahi ziren:
-Jende berria ezagutzea.
-Jende berriarekin eta ezagunekin euskaraz aritzea.
-Kultura gai ezberdinen oinarria eskuratzea.
-Egingo diren jardueren plazerraz gozatzea, hau da, norberak gustukoak dituen jarduerak
egiten ongi pasatzea.
-Ezagunak ditugun lagunekin eta berriki ezagutu ditugunekin gustura egotea.
-Kultura tailerrak norberaren gustukoak izatea.
- Beste lagunarteko kideekin harremanetan jartzeko aukera eskaini.
Ikus daitekeenez hezkuntza-xedeek pisu garrantzitsua hartzen zuten egitasmoan. Beraz,
egitasmoa egokitzat jo genuen gure ideia garatzeko; izan ere, hezitzaileen lana pertsonen
arteko harremanetan zuen oinarria, eta testuinguru aproposa ikusten genuen bost
harremanbideen ereduan oinarritutako formazio-esperientzia bat martxan jartzeko.
Ikerketa zein herritan jarri genuen martxan.
Esperientzia hau 2001ko irailetik 2002ko ekaina bitartean egin genuen, eta herri
ezberdinetan jarri genuen martxan, egitasmoa bera eta hezitzaileak herri eta toki
ezberdinetakoak zirelako. Gipuzkoako herri hauek izan ziren: Andoain, Aretxabaleta,
Beasain, Bergara, Deba eta Urnieta.