ACEH_03378

YUSUF (12) JUZ (13
Raya that dacha bandum na kamoe
Neulakee jinoe ampon bak Allah
98. Neukheun jeut teuma lonlakee ampon
Ubak Tuhanlon bandum na salah
Keubit Tuhanlon Maha Pengampon
Lom pih Tuhanlon Maha Pemurah
99. 'Oh troh geutamong keudeh bak Yusuf
Ta'dhem le Yusuf ibu ngon ayah
'Oh lheuh meuwa-wa ayah deungon ma
Geukheun le teuma boh tamong bagah
Tamong u Meuse bak nanggroe kamoe
Aman that sinoe ngon kheundak Allah
100. Ayah ngon ma geupeuek sigra
U ateuh keuta laju nyang meugah
Bandum treuk sujud keunan bak Yusuf
Teuma kheun Yusuf neueu hai ayah
Wahe ayahlon ta'bi leumpoelon
Nyoekeuh ka langsong Tuhan peuleumah
Ta'bi ka beunar Neubri le Po lon
Tanyoe meuhimpon di sinoe sudah
Got that buet Tuhan Neupeugot keu lon
Neupeuteubiet lon bak teumpat salah
Neupeuteubiet lon dalam penjara
Teuma dum gata keunoe talangkah
Tatinggai duson keunoe tateuka
Chetan jak daya pih nyoe ka leupah
Lheuh jipeupake lon ngon chedara
Tuhan kuasa bandum Neupeuglah
Keubit Tuhanlon cit leumah leumbot
Keu peue nyang meuh'eut Neuh han soe teugah
Dumpeue Neuteupue Allah Ta'ala
Ngon bijaksana Neuh han ban peugah
101. Tuhanku Droeneuh ka Neubri keu lon
Lon mat keurajeun bak nanggroe luah
Lagi pih keu lon ka Neupeureunoe
Ta'bi dum leumpoe ka jeut lonpeugah