ACEH_03378

JUZ 12 YUSUF (12)
13. Kheun Ya'qob di lon susah lon keu jih
Meunyoe taba jih takot musibah
Aleh jipajoh jihnyan le rimueng
Di gata taplueng tuwo tapeugah
14. Jikheun meunyo jih jikap le rimueng
Pane kamoe plueng kamoe le leupah
Rugoe that kamoe meunyo kamoe plueng \
Han jeut keu ureueng kamoe dum salah
15. 'Oh ban ka jijak Yusuf pih jiba
Meupakat cit ka lam mon jikeubah
Teuma jilhom le dalam punggong mon
Sare troh keunan wahi bak Allah
Kamoe bri wahi bak Yusuf yohnyan
Bandum buet jihnyan dudoe tapeugah
Bak watee gata han jituri le
16. Teuma jirile bandum bak ayah
'Oh troh u rumoh bak watee 'isya
Tadeungo subra jimoe dum joh-jah
17. Sira ngon jikheun hai ayah kamoe
Di sideh bunoe kamoe meupisah
Kamoe meulet-let teuwo keu adoe
Ngon barang kamoe bak jih meukeubah
Ka keuh bit jikap jihnyan le rimueng
Teuma jibaplueng han meuho arah
Han roe neupateh dum narit kamoe
Beuthat di kamoe beutoi meupeugah
18. Watee nyan teuma jipuwoe bajee
'Oh lheuh bak bajee jilabo darah
Ya'qob kheun gata dum ka jidaya
Hana tarasa buet teuh dum salah
Di lon tan laen nyang got lonsaba
Bandum buet gata pulang bak Allah
Tuhankeuh sagai nyang ek Neutulong
Uram ngon ujong beuna ngon salah
19. Teuma troh keunan ureueng musaphir
Geuyue cok ie le keunan beubagah
355