HENAC

HENAC
Ebaluazioa Ebaluazio-irizpideak
5.2.4. B2 mailako ebaluazio-irizpideak
a. B2 Koherentzia soziolinguistikoa
Ez du arazorik izaten bere diskurtsoa modu naturalean egokitzeko
elkarreraginezko ohiko testuinguruetan. Hortaz, gaia, hartzailea eta xedea
kontuan hartzen ditu, eta testu-genero ugari baliatzeko gai da. Ulermenean
erregistro formala nahiz informala bereizten ditu, nahiz eta tarteka
xehetasunak galtzen dituen (jarrerak, ikuspegiak, ideia inplizituak…); bere
espezialitateko testuak eta zenbait testu ofizial ere ulertzen ditu. Erregistro
intimoaz ere jabetzen hasia da.
Adierazpenari dagokionez, ziur, argi eta adeitasunez jarduteko gai da. Hasia
da bere adierazpenean ere erregistro formalean eta informalean jarduten,
nahiz eta erregistro neutrorako joera handia duen, oraindik ere. Asmo
komunikatiboa argia izaten du, eta gehienetan gai da elkarrizketan gertatu ohi
diren aldaketetara egokitzeko, eta formulazioa aldatzeko: gaiaren norabidea,
estiloa, enfasia... Baina diskurtsoa zuzentasunez sortzeko ahaleginak tentsioa
ekartzen dio batzuetan, eta horrek eragina izaten du egokitasunean.
b. B2 Diskurtsoaren antolaketa
Orokorrean, ohiko gaien gaineko testu argiak eta egituratuak sortzeko
gaitasuna du, gizarte-mailaren esparruan. Testu horiek batasuna edukitzen
dute, eta kohesionatuak eta koherenteak izaten dira. Lehendabiziko eta
bigarren mailako ideiak bereizten ditu, ohiko gaietan nahiz abstraktuagoetan,
eta baita ere bere espezialitateko gaietan.
Ideien arteko lotura hori lortzeko, kohesiorako baliabide sail zabal bat
eraginkortasunez erabiltzen du, eta gero eta egitura sintaktiko aberatsagoak
baliatzen ditu. Puntuazio-markak erabiltzen ere gero eta aberatsagoa da
(parentesiak, marra luzeak…). Eta hasia da puntuazio-marka zailagoak
erabiltzen (komak antolatzaileen ondoren, mendeko perpausetan eta
aposizioetan; bi puntu azalpenezko esaldiak lotzeko; puntu eta koma ideiak
kontrajartzeko; marratxoa hitz elkartuetan…).
239
B2