HENAC

HENAC
Sarrera Printzipio metodologikoak
1.2. Printzipio metodologikoak
Europako Erreferentzia Marko Bateratuak zenbait gogoeta egitera bultzatzen
du hizkuntzen ikaskuntzan eta irakaskuntzan dabilen oro. Proposatzen du
geure buruari galdetzea, batetik, ea zer egiten dugun benetan, besteekin hitz
egiten dugunean edo elkarri idazten diogunean, ea zerk ematen digun horrela
jarduteko gaitasuna, eta gaitasun horietatik zein landu behar ditugun
hizkuntza berri bat ikastean. Bestetik, nabarmentzen du jakin beharra dagoela
nola zehaztu behar ditugun gure helburuak eta nola ebaluatu behar dugun gure
garapena, hizkuntza baten erabateko ezjakintasunetik hura eraginkortasunez
menderatzera garamatzan bidean. Eta bukatzeko, galdetzen du ea nola
gauzatzen den hizkuntza baten ikaskuntza-prozesua, eta ea zer egin
dezakegun geure buruari eta beste pertsona batzuei hizkuntza bat hobeki
ikasten laguntzeko.
Galdera horiei erantzunda, ondorio honetara iritsi gaitezke: hiztunak, oro har,
zeregin edo ataza batzuk burutzen dituzten gizarte-eragileak dira, horretarako
komunikazio-gaitasunak erabiltzen dituztenak. Eta gogoeta hori ardatz hartuta,
eredu sozio-kognitibora iristen gara: erabiltzaileak euren gaitasun kognitiboak
erabiltzen dituzte hizkuntza-jarduerak testuinguru jakin horietan gauzatzeko;
hots, egoera batean, testuinguru batean, eta arlo batean helburu jakin bat
duten jarduera batzuetan parte hartzeko gai diren gizarteko kideak dira.
Eta horrek guztiak hiru ondorio ekartzen ditu, metodologiari lotuak:
a) Hizkuntzen ikaskuntza- eta irakaskuntza-prozesuaren oinarria da
hizkuntza-jarduerak egitea. Hau da, metodologiaren ardatza izanen da
hizkuntza-baliabideak erabiltzen ikastea eta irakastea, ekintza batzuk
gauzatzeko. Hizkuntza-jarduerak, gizarte-testuinguru zabalago baten
osagai dira, eta testuinguru horrek berak ematen die esanahi osoa.
Beraz, curriculum baten xede nagusia izan beharko litzateke maila
bakoitzean hiztunak zein komunikazio-jarduera egiteko gai izan
beharko lukeen zerrendatzea, eta jarduera horiek egiteko zein hizkuntzagaitasun
garatu beharko lituzkeen zehaztea. Eta ikaskuntza- eta
irakaskuntza-prozesuan hizkuntza-jarduerak didaktizatzeko ataza oso
tresna baliagarria da. Atazez mintzo gara, jardueretan gizabanako
batek edo gehiagok euren gaitasun espezifikoak emaitza jakin bat
lortzeko era estrategikoan erabiltzen dituztela adierazteko.
13