HENAC

Sarrera Atarikoa
HENAC
Curriculumak koherentea eta gardena ere izan behar du. Koherentzia da
curriculum baten oinarrizko printzipioa, irakaskuntza eta ikaskuntza
prozesuetan eragiten duten faktoreen arteko lotura estua izan behar baita. Eta
gardentasuna ere oso garrantzitsua da, tresna praktikoa izan behar duelako
ikaskuntza- eta irakaskuntza-prozesuan parte hartzen dutenendako. Gainera,
irekia, malgua eta integratzailea ere behar du izan, egoeraren arabera
egokitzapenak egiteko bidea eman behar duelako, eta partaide guztiak bildu
behar dituelako bere baitan. Azken batean, erabiltzaileen beharretara ahalik
eta gehien hurbildu eta egokitu behar da, eta ingurune soziokulturala hartu
behar du aintzat.
Bestalde, jakina da hizkuntza bakoitzak errealitatea hautemateko era propioa
duela. Eta gurera etorrita, euskara nafar hizkuntza da, berezkoa, eta
ezinbestekoa da curriculumak euskararen ingurune soziokulturala aintzat
hartzea, eta bere baitan integratzea. Horregatik, kontuan hartu behar da
euskara-ikasleek eragina izaten dutela euren inguruko egoera
soziolinguistikoan (normalizazio sozial eta linguistikoan, alegia).
Normalizazio horretako protagonista eta eragile izaten dira, dela ezagutzaren
bidez, dela erabileraren bidez, dela transmisioaren bidez. Beraz, curriculumak
tresna lagungarria behar du izan euskara-erabiltzaileak gizarteko arlo
guztietan trebatzen laguntzeko: arlo pertsonalean, sozialean, akademikoan,
laboralean, administratiboan…
Hartara, HENACek, helburu anitzekoa eta malgua izaki, gai izan behar du
Nafarroako euskara-ikasleen tipologia guztietara moldatzeko, eta
euskalduntzeko egon daitezkeen motibazioak kontuan hartzeko: dela
motibazio instrumentala, dela kulturala, dela identitatezkoa. Bestalde, kontuan
hartu beharko ditu bai bide naturaletik, bai bide kultural-akademikotik
euskara jaso duten nafarren ezaugarriak, eta horien beharrak asetzeko gauza
izan behar du.
12