Download File - Chin Christian College

CCC Thanglawi
Established 2004
Vol. 6, No. 5 September 2010
A Living Sacrifice
Rom. 12:1
Principal Cabuai In
2010-2011 cacawn kum kumcheu tiang lam a kan hruaitu Pathian kan thangt,hat!
Tukum ah tuah ding kan timhmi thil tete chungin biapi ngai pakhat cu Siangbawi Johnson
philhlonak ca i magazine chuah ding a si. A fanu Ruti nih English article pakhat le hmanthlak
pathum a kan kuat i kan i lawm hringhran. Dicky pa thlan le an chungkhar hmanthlak kan
hmuh tikah lunglen le lunglawmh cawh in kan um.
Cun ramdang um Laimi chung in kan pa Rev. Dr. Stephen Hre Kio nih Johnson ruak
cung i a chimmi hnemhnak Thawngt,habia a kan kuat fawn. Bochanmi Thanglawi reltu zong
nih tu thla thih hlan ah capar nan kan kuat cio nakhnga kan in nawl hna. Nan cungah Pathian
thluahchuah tlung ko seh!
Certual
June 15, 2010 in t,uanhram kan thawkmi certual chunh cu kan t,uan saling a si. Seh a
t,hat ahcun tu thla chungah a hranpi cu aa lim lai tiah ruahchannak kan ngei. Lei cawhnak seh
hmannak nawl a kan petu Pu Ngun San Aung cungah lunglawmhnak chim cawklo kan ngei.
Amah ngandamnak, a riant,uannak le a chungkhar caah thla campiak hna u sih.
Pa Siangngakchia Tikholhnak
Hlan lio i CCC coka umnak zawn, Van Hre Building pawng tein vawlei a kak i
tlawmpal a tolh. Cucaah a pawng i pa tikholhnak ti inn cu hmang ti lo in Van Hre Building le
male warden umnak karlak ah kan t,hial. Tichiahnak thirpung (tank) pawl kan hman chung.
First Semester Examination
2010-2011 cacawn kum First Semester Examination cu Sept. 17-30, 2010 ah tuah a si
lai. Cheukhat subject caah cun final exam a si. Nihinni tiang CCC nih a hmanmi Grading
System cu mark zakhat chungin tuakmi percentage system a si. Camipuai um lo in
siangngakchia zong nih ca thiam khawhnak lam kan kawl khawh tikah cun kan i ning ngai ko
lai.
Thawngpang
Sayamah Thlia Caan cu HBA nih tuahmi Ngaknu Training, Sept. 2-3, 2010, HBA
zungah cawnpiaktu ah an sawm. Ngaknu 66 an kai tiah thawng kan theih.
CCC Principal H. Siang Kung cu Sept. 17 in Yangon ah khualtlawn aa tim. A lam
tluang ko seh!
Myanmar Baptist Convention, i Theological Education Department nih tuahmi
Church History (Baptist History: Myanmar Baptist History) Workshop, Sept. 28-30, 2010,
MBC, Yangon ah CCC in Church History a chimtu Saya T,ial Peng a kai lai.
CCC Nu hawikomh bu hruainak in “Nu le Ngandamnak” kong cu August 28, 2010 ah
Sayamah Ni Cer nih nu 80 hrawng kan sianghleiruun ah cawnpiaknak a ngeih hna.
CCC Sunday

Bethlehem Baptist Church, Cawbuk nih kum tin September zarhkhatnak cu CCC
Sunday tiah an Khrihfabu Calendar ah an suai. Tukum Sept. 5, 2010 Sunday ni zong CCC
Sunday a tuahtu Bethlehem Baptist Church ah Rev. Dr. H. Siang Kung, B. Th kum linak le
BAE kum linak nih an va pumhpi hna. CCC caah thawhlawm a chuakmi Ks. 34,200/- le tisik
anhnah tam nawnte an kan pek. An cungah lunglawmhnak tampi kan ngei. Vawleicung
khuaza um Khrihfabu le hawikomhnak vialte zong nih mah le siarem ningin CCC Sunday
phunphai in siseh, phundang in siseh, nan kan tuah piak ahcun CCC caah thil nganpi a si ko
hnga.
Bianihchuak!!!
Thelh Hlei: CCC cu Baibal sianginn zong a lo lo.
Thiam Cin: Aziah?
TH : Camipuai an kan tuahter.
TC: Baibal le Camipuai zeidah aasaing?
TH: Cucu dah kaw kati cuh! Baibal chungah camipuai ti a um lo.
TC: Camipuai biafang a um lo nain “I hneksak tuah u” (Put yourselves to the test) tiah pei
I Kor. 13:5 ah a um cu!
TH: Naa thiamter tuk!
TC: Ahmanmi a si. Salm 26:2 kha rel law naa fiang chinchin lai.
“CCC nih a dohmi”
• Lam kip in thancho duh ngai i mah pumpak thancho i zuam lo � ccc
• Thlacam t,hawn ngai i mi t,hatnak hmuh khawh lo � ccc
• Khamhnak kong chim ngai i nunzia nih zulh lo � ccc
• Dawtnak kong chim ngai i mi bomh zuam lo � ccc
• Thiam duh ngai i carel/cazoh zuam lo�ccc
Librarian he itonnak
TL: Hello! Saya! Hmasabik ah na mintling le na chungkhar kong theih kan duh ko.
Lib: Ka min cu Cung Lian Thawng ka si. Chuahpi unau pahra lakah a hniangchang ka si. Ka
chuahnak cu Senthang peng, Zat,hal a si.
TL: Na cacawnnak?
Lib: 1996 ah B.E.H.S No.(1), Hakha in tanghra ka awng. 2003 ah CCC in B.Th, 2007 ah
MIT in M.Div le 2010 ah Lutheran Theological Seminary, Hong Kong in M.A ka dih.
TL: Na t,uanmi rian?
Lib: CCC ah Librarian rian ka t,uan lio a si.
TL: Khoika dah na um?
Lib: CCC nih kan ngeihmi inn vialte lakah a t,ha bikmi, CCFDK, Denmark nih an kan sak
piakmi Staff Quarter ah ka um ko hih!
TL: CCC Caruuk ah cauk zeizatdah nan ngeih?
Lib: Pathian mithmai zoh in le Laimi zawnruahnak ruangah dawtu hna hlutnak thawngin
13000 lengkai kan ngei.
TL: Caruuk riant,uantu ahodah nan si?

Lib: Keimah, cun Assistant Librarians (Pu Lian Kim le Pi Nuh Nuh Sein) he tiah minung
pathum kan si.
TL: Caruuk riant,uannak he pehtlai in Hong Kong i na cawnmi kong theih kan duh ko.
Lib: Ka kainak sianginn hi Lutheran Theological Seminary, Hong Kong ah a si. Ka cawnmi
program hi Master of Arts (Theology) Emphasis on Theological Librarianship a si i
Nichuah Thlanglei Asia ah hin hi bantuk program hi LTS lawngah a um. Theological
Library i rian a t,uanmi hna caah tuahmi a si caah a t,ha ngaingai. Library Science lawng
si lo in Theology zong cawn chih a si Theological Seminary i riant,uantu hna caah
fimnak a pek lawng si lo in riant,uannak zong ah pumpek nun a kan petu a si chih.
TL: Na cawnmi hi CCC ah na hmang kho maw?
Lib: Ummmm! Ka hmang kho ko. Amah belte tangka thazaang tampi dih a haumi rian ah
cun kan i harh pah.
TL: Caruuk riant,uannak ah zeidah nan chambau bik?
Lib: Kan chambaumi ti cun a tampi ko. Abik in kan chantiluan nih a ngeih ve cang caah
Library i kan ngeihmi cauk hna hi fawite in le rangte in kawl khawh, hmankhawh nak
ding ah catalog kan ngei kho rih lo i kan har ngaingai. Manual catalog hmanh si lo in
computerized in thlen khawh siseh law kan ngeihmi cauk hna hi hinak in kan i
t,hathnemhpi deuh ngai lai. Cu ti tuah khawhnak ding ah Software kan herh ko. Cun,
mei hi a rat nakin a rat lo caan a tam deuh i riant,uannak ah kan rian hma a kal kho lo.
Cu lengah, kan cauk hna hi Theological Student caah cun hman ding a um len ko nain
BA (English) kan fale caah resources a um lo tluk a si. Sayate nih chimhmi lawng an i
rinh i mahte in study tuah khawhnak cauk kan ngei lo. M.Div zong kan thawk cang tikah
kan cauk hna zong hi a hlunmi a tam deuh i update cauk kan herh ngaingai.
TL: Caruuk i nan riant,uannak he pehtlaiin zapi theihter na duhmi?
Lib: CCC Caruuk cu Laimi vialte caah a si bantukin a ho poah nih ning le cang tein le zalong
tein hman khawh a si. A tu tiangah cun a lenglei unau chung in a hmangmi an tlawm
ngai rih! Cun, rothil, cauk t,hat,ha, pumpak, Khrihfabu in kan ngeihmi hna zong hi
Laimi zawnruahnak lungthin he rak kan hlu hram uh! A hmannak a kauhdeuh ahcun kan
thluachuah a tamdeuh ve ko lai. A santlaihnak a tamdeuh ahcun Laimi kan
t,hangchodeuh ve ko lai.
TL: Hmailei ca na suduhthah?
Lib: CCC hi hmailei caan saupi tiang a kal cuahmah dingmi a si caah kan caruuk pi hi chan a
dawi khomi dirhmun ah thlen hrimhrim kan herh. E-Books, E-Journals tibantuk online
resources zong tampi kan hman khawh ve nakhnga kan caruuk hi computer based
catalog tuah khawhnak ding ah Library Software i zalh in rian domh kan hau! Cu lawng
si lo in CCC hi a kapkip fimnak a tlinnak a si khawh nakhnga (secular resources) le kan
nunphung, kan bia le kan hla, kan rothil kennak hmunhma ah a can khawh nakhnga
Laimi dihlak i bawmh in Chin Research Centre tibantuk CCC ah dir kho ve seh law
CCC Caruuk hi Laimi tuanbia kengtu ah a si kho hnga! Laimi dihlak kan t,an ahcun kan
chunmang a tlam a tling ko lai.
TL: Caan na kan pek caah kan i lawm.
Lib: Ummm! Lai Lungrawn ah ka dang te ko kun uh. Kaa lawm ve.
CCC Friday

Chin Baptist Mission Church, DC nih cawnninga zaan sang pumh ah a chuakmi
thawhlawm cu CCC an pek lengmang. CCC caah thazaang taktak a si. Sayate le
siangngakchia caah rilcat pehtu a si.
Restricted Circulation