Bonanova_43_extrait

• Cap’articulu
Gistì spaziu,
locu è piazza
Hè isciutu avà avà u
libru di Anghjulu
Pomonti, La littérature
d’expression corse
entre tradition, politique et
modernité (Albiana, 2021).
A somma maiò di circa 550
pagini arricata, fruttu di una tesa sustinuta
di nuvembri 2018 in Corti, palesa unipochi di
fatti maiò. Frà tant’altri, n’avemu sceltu dui.
U primu hè l’identificazioni di un
oghjettu chjaru : a literatura di sprissioni
corsa. Pomonti s’incamina cun cautezza da
strigna u so studiu senza nigà l’asistenza
di una litteratura corsa chì si godi parechji
lingui, chì i principali sò u latinu, u talianu,
u francesi è u corsu. Hè vera chì u sulcu era
dighjà beddu tiratu da Fusina (Écrire en corse,
Klincksieck, 2010) è dinò da una catasta
impurtanti d’articuli è cunfarenzi varii, tutti
quanti censati da Pomonti.
U sicondu hè in u fattu d’avè una vista
qualitativa è quantitava di ciò chì pudemu
chjamà l’elaburazioni literaria di a lingua
corsa. Pomonti faci a scelta ghjusta d’entra in
i so analisi è prisentazioni cù l’opari, l’autori
è, supratuttu, i testi. A missa in sesta crunulogica
faci un passu in più da capì u sbucinamentu
siculari di l’evuluzioni di issa sprissioni
literaria. È tandu si palesa « A divizia », titulu
di l’ultimu capitulu.
St’ultimi 25 anni, issa divizia di rumanzi,
testi è puesia, marca una cima in u prucessu di
A. Di Meglio
long’andà discrittu è missu à fetti di tempu da
Pomonti. A tradizioni fonda u puliticu chì iddu
stessu metti in anda i cundizioni di u prugressu
è a crescita di l’opari. Tandu i quistioni chì
spuntani sariani : a l’avaremu fatta ? Saremu
ghjunti à u scopu di una literatura di lingua
corsa degna, ricunnisciuta è letta ?
Risposta difficiuli. Si sà solu chì issu
prugressu ùn hè ghjuntu cusì sfaticatu è
caminu ni ferma monda da fà mirzà a ganga
diglossica chì, quant’è un certu viru, muta è
crea varianti à misura ch’iddu s’avanza.
S’è no fighjulemu induva l’avemu buschi
certi testi, si vidi chì à quandu nantu à una
reti suciali, à quandu in un blog, à quandu
in u fruttu di tali cuncursu. Vidimu chì u
corsu literariu si ficca in i punteddi novi di a
cumunicazioni. Ma quì ci hè appena di tuttu.
A quantità hè fiumaresca è a qualità ci pò fà
passà da u peghju à l’incantu. Ma quissa ùn hè
pò spicificu à u corsu è fattu si stà chì, forsa,
a divizia si sparti è si sparghji di più è chì u
libru t’hà menu pesu.
Si voli vena à dì chì u corsu literariu pò
essa in piazza publica, in lochi novi o in spazii
cunquisti oghji in issu tempu di ritrusera di a
diglussia. Ma ferma quantunqua a quistioni di
una scelta, di un sguardu analiticu di ciò chì
si dà à leghja. Ma a facilità di essa visti è letti
oghji da una mansa di ghjenti ùn passa micca
à u stacciu di l’edizioni o di tuttu un sistema di
a ricunniscenza qualitativa.
Più chè mai, l’attività di una rivista (in
ligna o micca pocu premi), u rollu maiò
di l’insignamentu, l’esistenza di ghjurii, u
sviluppu di i studii è di a critica, i scelti edituriali
o i varii dimarchji d’antulugizazioni,
n’avemu bisognu da cuntrà u viziu di i varianti
di a diglussia.
■

CREAZIONE
2
| BONANOVA

PROsa • Creazione
prosa
A cultura
Guidu BENIGNI
Di settembre ‘78, aviamu armatu
una girandulata equestra da
Talasani à Portivechju in 15
ghjorni, traversendu u massicciu montagnolu orientale di a Corsica. Iniziata
da l’uffiziu di u turisimu di Corsica è l’aiutu di a Rimonta naziunale, issa
spassighjata avia per ogettu di prumove una nova attività, vale à dì u turisimu
à cavallu. U nostru itinerariu era statu calculatu in funzione d’un alloghju in
ottellu, cù i so comudi. A fatiga, à causa d’un percorsu à bastanza rusticu, era
rimpattata ogni sera cù un bellu bagnu è una tremenda cena dopu à e nicessarie
cure à i cavalli.
Da a prima sera, à tavulinu, una discussione animata quant’è « sciolta »,
ebbi a Corsica per sugettu… È tutte e banalità ci eranu passate. Ùn eramu chè
dui Corsi tramezu à una quindecina di persone è, benintesu, ci stavamu zitti,
pettu à tanti discorsi auturizati è fatti, cum’è di solitu, d’avisi accertati. Sin’à
u mumentu chì a cunversazione hè andata à trattà di cultura è di tradizione.
U presidente di l’associu equestru di l’Île-de-France, medicu di prufessione
è omu di cultura, vultendu si versu mè, mi dumandò, cù un picculu surrisu
à u sprichju di l’ochju : « Les traditions d’accord, mais pouvez-vous me dire ce
qu’est la culture corse ?»
Furtuna chì a mi aspettava è ch’è no eramu in fine di fà cena. A dumanda,
l’avia vista vene dopu à tutte quelle ciarle più o menu fine, i cumenti fatti è
lesti, e risate scherzose à casu di a siesta è di u farniente, di l’urne piene è di
e case viote. Aghju schisatu a dumanda è rimarcatu ch’ellu s’era pocu parlatu
di cavallina. È vistu chì l’omu avia intesu a zirigata, aghju truvatu a scusa
| 3

ch’ellu si facia tardi è chì lindumane ci vulia à alzà si à bonora, rimandendu a
risposta à un’altra volta.
Lindumane matina, dopu d’avè insellatu, brigliatu è fattu beie i nostri
cavalli, avemu traversatu u paese à pedi, cum’è tuttu bon cavalieru si deve
di fà, u tempu chì a sella è u spinu di u cavallu « s’accordinu ». Per i sumeri si
dice « ch’ella s’acconci a soma ».
Hè tandu chè noi simu stati interpellati da un paisanu : « Cume, marchjate
à pedi cun cusì belli cavalli ?»
– Que dit-il ? mi dumandò u sgiò duttore chì caminava à cantu à mè.
– Il me rappelle l’histoire que racontait ma grand’mère.
– Ah, racontez-moi ça, mi disse ellu.
È tandu li cuntede quella di u viaghju d’una certa Maria è u so cumpagnu
Ghjaseppu chì, traversendu un paese, s’intesinu dì :
– Cum’è, marchjate à pedi ? È l’asinu serve à chè ?
Per ùn cuntrarià isse ghjente, Maria è Ghjaseppu si messenu à cavallu. À
u paese dopu, nova critica :
– Eccu i fatigati ! Seranu cuntenti quand’elli averanu crepatu issu poveru
animale !
Ghjaseppu, riflettì è disse à Maria ch’ella si stia à cavallu, vistu a so situazione.
Novu paese, novu dettu :
– Ma fighjate mi issa muffuta, ella si sciora invece chì issu povaru vechju
si sterpa ! Chì vergogna a giuventù d’oghje !
Anu a ragiò, disse Maria, cuglite vi voi. Ma à u paese dopu :
– Fighjate mi issu vechju macuccu. Nisuna pietà per issa povera donna,
incinta è bella !
– Qui prétend contenter tout le monde et son père, mi disse u medicu. Mais
c’est la fable du meunier, son fils et l’âne que vous me contez là !
– Annò, o Sgiò duttò, l’aghju rispostu. Quessa hè a vostra cultura, vi
vene da Mr de La Fontaine è u liceu. A meia vene da a nostra cultura, orale
è tramandata da l’antichi, da generazione in generazione, mediterranea è
bibblica attempu.
Hè statu l’omu chì ùn hà parlatu chè di cavalli è ùn hà più ammintatu a
cultura corsa.
•••
4
| PROSA

PROsa • Creazione
A nustalgia
Pasquale
Ottavi
Amicu giuvanottu, tù
chì ti ne stai arrimbatu
à quellu bancu
di caffè, à bichjere in manu, agrazzulatu
à u bandarecciu di i to pari, ma chì ti
pudarà impreme, à tè, a nustalgia ? Chì ti
ne pare, sarà ghjustu un sintimu chì sente
u so fungu ? Valarà quant’è stu mocculu
di sigaretta ch’è tù esci à frumbulà in la
chjova ?
A sò, à tè chì sè in suchju ti bollenu i
farri è sceglie ùn sai ancu frà e mille vie
prumesseti da a to vita chì principia nutrita
à spiranze pampanute.
A meia, micca ch’ella sia da veru à fine
ma mancu possu dì ch’ella s’hè sempre in
principiola. Ehà ch’ùn la saparaghju quella
pena chì mi scrocca à l’impinsata, quella
medicina ch’ellu mi tocca ad aspittà in
pacenza chì u spiziale ùn l’hà ancu à riceve,
quellu parente o quellu amicacciu chì vene
à mancammi manu à manu pà u sempre.
Cù quessi sì ch’ùn le ci cuntava più e stonde
di benistà, po ci era quella frizione…
Benistà… M’affugava quellu curdogliu
q uandu chì, giovanu babbu à fiancu à
medama, chitavamu u paese : cumpiianu e
vacanze, s’eranu tutti accolti à a quatrera,
in tagliu di stradone, i me più stretti, i
vicini, tutti affaccati à tuccacci una manu o
ad appicciacci un basgiu d’amore casanu.
A vittura era trapiena, ci era ghjustu a
piazza pà i figlioli da tanta a robba ch’elli
ci davanu tandu, soprattuttu quella purcina
ch’indè noi a facianu à manera, po l’ochji
s’impiianu di lacrime fighjulendu in lu
ritruspechju tutta quella ghjente chì ci si
stava ferma cù u so mottu intristitu, chì ci
s’alluntanava po chì vinia à turnacci minuta
minuta prima di sparicci. I minuti tandu
pisavanu un seculu è u palpazzolu turnava
fasgiolu di testu prontu à sciuppà.
Oghje a vittura hè luccicante, putente,
in lu so mutore ci erpianu i cavalli quantu
è più. In paese, a casa hè meia, ci hè
tuttu cum’è in Francia è forse à dilla cusì
mancu basta. Di robba or dunque sariamu
ancu sazii… U me usciu u mi tirgu chì
ci n’andemu, in quellu mentre u sole
| 5

tramonta. In tagliu di stradone a vittura hè
pronta, mi ci cogliu cù medama, spichjette
di sole incalfate nantu à u nasu. Soli, eiu ed
ella. Spachja a piazza è spachja a quatrera.
Quelli di quì, i vicini, i mei, tutti quaiò à locu
di riposu. Purtelli sarrati è usci stanghittati.
Scaloni muti, sumeri più, nè sgiotte nè
ghjalline, hè pulitu u pianu chì di a pullina
mancu si cunnosce più u nome. U chjoccu
di a campana à certi li dà da fà. A meia a
vita, l’aghju po riisciuta, cusì mi prigava
minnanna, mi chjamava a so spiranzola,
cusì vulianu i me ginitori, cusì m’hà aiutatu
a scola à turnà ciò ch’e sò oghje. Chjorgu a
purtiera, semu avvinti à silenziu, accendu u
mutore, sei cilindri o ghjente, avvicinatevi
puru à sentelu ssu mormu, po movu.
In lu ritruspechju, più nimu.
Hè detta, bella sigura chì, di robba,
propiu nulla mi manca. Mi n’avanzaria
ancu. Ma u restu, a me ghjente ? A ghjente ?
Induva sarà po l’escinziale ? Andarete à
sapè, eiu stò bè campendu à cristianinu,
à a muderna, quale vularia vultà in daretu,
à strazià da una stella à l’altra, cumu elli
dicianu i vechji ?
Fà è fà, in core meiu ci s’hè furmatu un
fessu. U ci hà ficcatu a cugnola di u tempu,
à a zitta è à a muta, cavendu in giru à mè e
prisenze care. Dicisu, chjuccutu, intrepidu,
fala sempre di più à l’inghjò, ficchendumisi
assassinu in lu più sicretu di l’esse ed allarghenduci
sempre di più u filu di a crepa.
Aghju voglia à parà, aghju voglia à tappà,
pruvallila a li provu à quant’e possu ma
fallila ùn la li facciu… Tandu, ferma un solu
riparu, una sola medicina. Lascialla perde o
frumbulalla ùn possu.
A nustalgia.
Quellu dulore di u ritornu chì manca,
sicondu l’etimulugia soia. È quessa, un solu
duttore a pò scrive nantu à u repice : tene
u nome d’età. Allora, o quellu giuvanottu,
tù chì guasgi guasgi mi ghjucarii à a risa
cù i me mendi è i me raghjoni di i tempi di
Luigi Piombu, mai ùn ti scurdà : i to tratti,
a to foga, i to tichji, a to risa, e to macagne,
u to bichjere è a to sigaretta in cumpagnia,
l’aghju avuti è tinuti ancu eiu tutti quanti,
arrimbatu à listessu bancu di caffè.
Ma tù, quella di u ritruspechju in tempi
d’una volta pienu è po turnatu spachju,
forse mai a camparè. Mai ? Fà è fà, vai è
sappia tù, a cunnosci quella di l’acqua chì
volta à i so canali ?
Quandu in core toiu u pesu di l’anni ci
avarà impirnatu un lariu chì mancu a pudarè
spiigà, calculeghja ch’un antru giuvanottu,
quellu ch’è tù fusti tù, quellu ch’e fuimu
tanti è po tanti, si tinarà à bichjere in manu
è sigaretta in bocca, agrazzulatu à u bandarecciu
di i so pari, tutti quanti arrimbati à u
bancu di quellu caffè. Iscendu à frumbulà a
so sigaretta in la chjova, ti fighjularà ridoni
è spinsiratu in lu ritruspechju, in lu mentre
ch’è tù t’alluntani da a to quatrera paisana.
Alzarà e spalle, po si ficcarà torna in caffè à
cappiacci e so sciabbulate.
Quellu stradone, l’anu fattu à novu di
pocu. Una campa par quella to vittura, nova
framante è cusì putente.
Di sti paesi anu messu à primurassine.
Era ora…
■
6
| PROSA
2/05/2021

PROsa • Creazione
U babbu
Pasquale
Baldovini
« Ahh… svegliatu…
Chì ora sò ? 6 ore…
Porca miseria…
‘Stu travagliacciu mi caccia u sonnu… »
A moglia li dete un calciu nerbosu à u
maritu, chì si muvìa troppu in u lettu è
parlava solu à alta voce.
« Eccu, mi ne vocu… » disse. Si discitò,
si pigliò un caffè è lesse u ghjurnale di a
vigilia. Ùn lu leghjìa mai u ghjornu stessu.
Sapìa ch’ellu si disceterìa prima cà tutti è
chì li ci vulìa truvà un calcusellu da spassà
si la nanzu à u discità di i zitelli.
A 7 ore è 15, s’avvicinò di a stanza di a
figliola, intrì in furia in furia è aprì i purtelli.
« AIÒ ! AIÒ ! DISCITATEVI ! ‘EMU ANDÀ
À U CAPU DI U MONDU ! » briunò, ridendu
à scaccanera.
Si n’andò voltu à a stanza di u fratellu
minore è ricumminciò a so riturnella.
« AIÒ ! AIÒ ! DISCITATEVI ! ‘EMU ANDÀ
À U CAPU DI U MONDU ! »
Si ne vultò in cucina, appruntò duie
tartine di buttiru è cunfitura è duie cicculate
calle pè i zitelli. A femina ghjunse è
cumminciò à piglià u sdighjunu. U fratellu,
ellu, ùn ghjunghjìa micca. U babbu si messe
in zerga.
« Ma chì ferà ? Aiò ! AIÒ ! AIÒ !
DISCITATEVI ! ‘EMU ANDÀ À U CAPU DI U
MONDU !
– Lascia mi in pace ! si lagnò u zitellu.
A chì fà ricummenci tutte e mane e to
scimità ?
– E mo scimità ? O merdusò ! A quale
parli quì ? A QUALE PARLI ? »
U babbu li cacciò a cuverta è li mandò
un pattone.
« O muccicò, sorti da ‘stu lettu subbitu
subbitu, o ti mengu !
– Sorti da a mo camera ! barbuttulò
u zitellu, mezu arritu nantu à u lettu,
arrembatu à u muru, e mani pisate.
– A to camera ? Quì, o testa di cazzu chì
tù sì… sì IN CA-SA MEIA ! U patrone, SÒ
EIU. Vocu è entru quand’ella mi pare è tù
ùn ai nunda à dì. »
Li venìa u pientu à u zitellu. U babbu
si n’andò torna in cucina, agguardendu in
bassu è disse chì u sdighjunu era prontu.
Un pugnu di minuti dopu, u zitellu ghjunse,
a faccia palida è si pusò mutu.
| 7

« Chì voli o figliò ? dumandò u babbu.
Dì mi ciò ch’è tù voli è a ti facciu.
– Ùn vogliu nunda.
– Bah… ùn ci hè bisognu à fà u musu…
T’ai da mette in zerga per quessa ? »
U zitellu ùn rispose nunda è u babbu
lasciò corre.
« Avà, spicciate vi ! Aè ! Andate è vestite
vi ! »
I dui zitelli si n’andonu à appruntà si.
A moglia escì da u bagnu è intrì in a cucina
senza agguardà u maritu manc’appena, u
sguardu biotu è stancu.
« O a mo cara ! Fà mi un basgiu… »
cherse u babbu, avvicinendu si, e labbre
versu a donna. Ella si girò à l’ultima è e
duie labbre di l’omu basgionu u mentu di
a moglia.
« Và bèèèèè ! Aghju da purtà i zitelli à
a scola. Ùn ai bisognu di nunda ‘sta mane ?
– Ùn la sò. Ùn avemu bisognu di
nunda ?
– Ah… ùn la sò… Vedi… Mi ne vulìa
cullà in muntagna à attipà mi à pena…
Ci hè Petru è Kiki chì m’anu dumandatu
d’accumpagnà li… ‘Emu da fà A Maniccia…
Sai… A teppa a più dura mì ! Ghjè per
l’intrinamentu… Dumenica, ci hè a corsa
sai… U trail più tamantu di l’istatina… Sò
ghjuntu decesimu annu, ti n’arricordi ?
Và bèèèè… In piena forma ghjera… Avà si
ùn m’approntu ùn vale nunda u straziu…
Vedi ? »
A moglia l’agguardò in catarochju è
stede muta una stonda.
« Chì c’hè ? dumandò u babbu.
– E spese ? L’aghju da fà eiu ? Chì finiscu
u travagliu à 7 ore è mezu ?
– Ah ùn ci la facciu… S’o mi ne collu
à A Maniccia… Hà da esse dura… Dopu
rifalendu mi tocca à piglià u zitellu à a
scola… »
A moglia l’agguardò torna cù un
sguardu schifignosu.
« Ah… disse l’omu… Và bè… Và bè… Ci
serà mezu… Mi n’occupu… »
U zitellu straziava à veste si in a so
camera è u babbu intrì cum’è una burrasca.
« Aiò ! T’emu da aspittà dui ghjorni o
chè ? Fà la finita avà, chì hè digià troppu
tardi per ghjunghje à l’ora ! »
Ùn era vera, a sapìa u babbu, ma a
facìa apposta, vulìa chì u zitellu si spiccessi
per ghjunghje da bon ora à u pede di a
muntagna. U zitellu, angusciatu d’esse
in ritardu, à pena abbambanatu, messe
dui scarpi listessi ch’ellu avìa ma di culori
diversi, una turchina è l’astra castagnu. Ùn
ebbe u tempu di pittinà si è si n’andò cù una
ciuffa di quelle.
In vittura, u babbu cappiò a figliola
davanti à u cullegiu è po u masciu davanti
à a scola. Si n’andò è, dopu à una cinquantina
di metri, s’avvedì chì u zitellu s’era
scurdatu a cartina. Fece un mezu giru,
accelerò versu u purtone di a scola, scansò
a vittura à mezu a strada, lacò apparta a
porta è s’infrugnò à trunchera di collu à
lampà a cartina di sopra à a serrenda di a
corte, briunendu u nome di u so figliolu.
« Ti si scurdatu di u to saccu ! »
U zitellu s’avvicinò, colse u saccu in
pianu, volse ringrazià u babbu ma era digià
partutu, à tavulette in a vittura.
Una quindecina di minuti dopu,
ghjunse in A Restonica, à u puntu di
8
| PROSA

partanza di a cullata di A Maniccia, una
di e teppe e più dure, e più putente, chì
tutti i trailer di prima trinca battìanu per
appruntà si per e corse spaperse tutte e
dumeniche in a Corsica sana.
Si ne cullò cù i so amichi è messenu 1
ora è 45 minuti. 1 ORA È 45 MINUTI ! PER
A CULLATA È A FALATA ! VA BÈÈÈÈÈÈÈÈ !
S’ELLU ERA CUSI IN FORMA U GHJORNU
DI A CORSA, ATTENTI !!! L’astri dui ùn
l’avianu mancu suvitatu, era troppu lestu
nantu à i petranculi. Era falatu cum’è una
capra.
Agguardò l’ora. Meziornu ! Digià ! Pigliò
a vittura, si ne falò in furia in casa à lavà sì,
si manghjò un pezzu, eppo voltu à u Casino,
à fà e spese. Cumprò ciò chì ci vulìa, a
cicculata per i zitelli, ripasti appruntati da
scallà dui minuti à u micro-onde, casgiu è
pani di merolla affittati per fà i sandwich,
è paste, paste è paste chì sò l’alimentu più
bonu per i spurtivi è chì si facenu in furia
a sera quand’è tù ùn ai u laziu di scucinà.
Ghjunse à a scola à 4 ore è 10, vinti
minuti nanzu à l’apartura di u purtone. Una
mansa di donne parlava di i so zitelli ma
ellu preferì parlà cù un tippu solu ch’ellu
cunniscia à pena è si messe à diciulà nantu
à a pulitica, à criticà u merre di Corti chì
ùn facìa nunda, chì e strade eranu fragiche,
chì ingannava a so moglia è chì mancu si
piantava per salutà lu quand’elli si scontravanu
in carrughju. L’omu rispundìa pocu è
micca ma u babbu ùn si n’avvedìa mancu.
U zitellu escì da a scola cù una faccia
trista.
« Chì c’hè u mo figliolu ?
– Nunda.
– Dì mi. O figliulucciu bellucciu
cagucciu ! Dì à babbitu ! Chì c’hè ?
– Nunda !
– Aiò ! Dì mi chì amicu cum’è mè ùn ne
averè mai ! »
U zitellu cappiò un suspiru.
« M’anu ghjucatu à a risa.
– È perchè !?
– Perchè avìa una ciuffa di l’astru
mondu.
– Hahaha ! Solu per quessa… Lascia li
dì !
– È dinò perchè mi socu sbagliatu ‘sta
mane. Aghju messu dui scarpi differenti.
– Euuuuhh… Pò accade à tutt’ognunu !
Lascia corre ! Aè andemu t’aghju da fà un
vesperinu ! »
In casa, u babbu appruntò u vesperinu
presceltu di u figliolu.
« Boohh… Stà à sente o figliò ! Aghju
fattu A Maniccia ! Sai in quantu tempu ?
Induvina ! 1 ora è 40 minuti, cullata è falata.
1200 metri di denivelé ! Và bèèè ! Socu in
piena forma !
– Ah… Bravu… Eiu aghju fattu una
corsa in scola. Sò ghjuntu secondu di i CE2.
– A t’aghju da dì, a simana prossima, a
dumenica, veni cù mè ? Aghju da fà l’Ultra-
Trail. Possu ghjunghje omancu in u TOP
5 ! Và bèèè ! Ai manghjatu ? Mi ne vocu,
vulteraghju nanzu di manghjà. Ai duveri ?
Iè ? Poi fà li solu, ùn hè ? Sì un tercanu ! Dopu,
fà li vede à mammata, o sinnò lamperaghju
un uchjata quandu voltu ‘sta sera. A prestu
o figliulucciu. »
U babbu si ne falò in cità à ritruvà
Marcu, un amicu di i trail.
« Eh beh ! O Marcu ! Và bè ?
CREAZIONE | 9

– Cumu sì ? dumandò Marcu. Posa
posa. Allora ‘sta Maniccia ?
– Popopo, ci simu sterpi. Simu andati
à a scimesca. In a falata ùn mi parava nimu.
– Iè ? A Maniccia ghjè u più bellu locu
per approntà si. A simana scorsa l’aghju
compia in 1 ora è 32 minuti.
– 1 ora è 32 minuti ? O bugiardò !
– Cumu ? A ti dicu ! 1 ora è 32 minuti !
– Sò falatu eiu ‘sta mane in 1 ora… 1
ora è 36. Si sempre daretu à me in e corse.
Caccia ne à pena ah !
– Bah ! A ti ghjurgu nantu à u capu di u
mo figliolu. »
U babbu, annerbatu, si n’andò senza
mancu beie un caffè. U lindumane avia da
travaglià. Putana gobba ! Ùn pudìa andà à
intrinà si. È s’ellu ghjunghjìa prima cà ellu
Marcu a dumenica ? Bah, ùn face nunda, si
disse. Travagliava à u standard di l’uspidale
di Corti. Ci facia i trè ottu. Ci stava un
dopu meziornu da 1 ora à 8 ore, è u lindumane
facia a mane è a notte. Eppo dopu,
trè ghjorni di vacanza, è certe volte ancu
quattru chì s’arrangiavanu cù i culleghi !
Chjamate, dapoi chì l’urgenze eranu
lucalizate in Bastia, ci n’era dece in a ghjurnata,
per u più. A notte, ancu di menu.
Quandu ci seria, u lindumane, si ferìa
duie centinaie di burpees è altrettantu di
squat saltati. Da travaglià u so cardiò è a
musculatura di e so ghjambe. Li metteraghju
dece minuti in i denti à ‘stu Marcacciu
dumenica, pensò. Hà da capì stu conu !
Si ne vultò in casa. A moglia era in
a so camara, i capelli crosci, si facia una
mascara di notte.
« O cara ! S’hè passata bè a to
ghjurnata ? dumandò u babbu.
– Induv’eri ? Sò vultata avà. Ùn ai fattu
nunda ?
– Cumu nunda ? Aghju fattu e spese,
cum’è tù m’ai dettu !
– Ùn ai fattu nunda à manghjà ?
– Iè, iè. Ci sò i rispasti digià pronti !
– Hè robba purcina què…
– Và bè… ti feraghju e paste cù l’ovi… ti
piacenu nò ?
– Fà cum’ella ti pare » rispose a moglia.
È chjose a porta.
A figliola era sciuta cù un amica. U
babbu intrì in a stanza di u masciu. Leghjìa
un libbru nantu à a storia di i Rumani in u
so lettu.
« L’ai fatti i duveri ?
– Iè… disse u zitellu cù una voce
tremulante.
– Fà vede.
– Iè ma ùn aghju micca capitu…
– L’ai fatti o micca ?
– Aghju pruvatu… »
U babbu l’acciuffò è li mandò un
schiaffu.
« O bugiardò ! Ùn ai mancu a vergogna !
Stercaghjone di merda. »
A mamma escì di a so camara in a so
camisgia di notte è dumandò ciò chì si
passava. U zitellu disse chì u travagliu di a
scola era troppu duru, chì ci l’avia pruvata
ma ùn c’era statu mezu.
« A t’aghju dettu di fà li… disse u babbu,
agguardendu a riazzione di a mamma.
– Perchè ùn ai micca dumandatu una
manu à babbitu ? dumandò a mamma à u
zitellu.
10
| PROSA

– M’hà dettu di fà li solu…
– Cumu ! si strangulò u babbu. O
bugiardò ! Eiu ùn l’aghju mai detta quessa.
Mi voli fà passà per un omu chì ùn hè di
parolla ? Attenti… »
U chjappò per l’arechja è u mandò in a
so camera cù un calciu in culu.
« Perchè ùn l’ai micca aiutatu ?
dumandò a mamma.
– Hà dettu ch’ellu ci la facia solu, a ti
ghjurgu… Eppo ùn aghju micca avutu u
tempu cù tutti i capatoghji… »
A mamma calò l’ochji è si n’andò in a
camera di u zitellu à ricunfurtà lu. Dopu si
ne vultò in a so camera è chjavittò a porta,
dicendu ch’ella ùn manghjerìa nunda
quella sera.
U babbu appruntò e paste cù l’ovi è si
n’andò à circà u zitellu, stracquatu in u so
lettu, piattu sottu à cuerta.
« O mascettu, voli manghjà ?
– Innò.
– Aiò ! Veni, chì t’aghju fattu e paste cù
l’ovi fritti… Ti piacenu.
– Ùn aghju micca a fame… »
U babbu s’avvicinò è tirò a cuverta in
pianu.
« Ùn ti piattà o u mo mascettu. Vai…
Scusa mi… T’aghju parlatu male è minatu
anz’ora…
– Iè… È ùn era ghjusta…
– Ghjera annerbatu… Ùn hè micca
colpa toia… »
U babbu accarrezzò a guancia di u so
figliolu è li dete un basgiu putente.
« Aè, affacca ti, ci sò e paste cù l’ovi ».
A listessu tempu vultò a femina è
manghjonu tutti à trè.
« O figliuluccia ! Ùn la cunnosci micca
quella di u to fratellu, oghje ? Chì risata !
Conta li !
– Chì cosa ? sussurò u zitellu.
– Quella di i scarpi ! Madonna ! Chì
risata… »
U zitellu stede mutu.
« S’hà messu dui scarpi differenti ‘stu
capibiotu » disse u babbu, spansendu si cù
a figliola.
U zitellu calò u capu è manghjò in
silenziu.
Dopu manghjà, u babbu andò à pichjà à
a porta di a camera di i genitori.
« O cara. Possu entre ? O… Rispondi…
Per piacè… Possu entre ? »
Ma ùn ebbe risposta. Si stracquò nantu
à u soffà, messe un match di champion’s
league nantu à a televisiò è si ficcò sottu à
un plaid di sinteticu.
« Socu veramente un conu… » si disse.
Dopu à una stonda, agguardendu u
match, si dumandò ciò ch’ellu pudìa fà
u lindumane. Ah iè ! U dopu meziornu
c’eranu i burpees è i squat. A mane ? Ferìa u
sdighjunu per i zitelli, i purterìa à a scola
è dopu chjamerìa à ‘stu bugiardu di Marcu
per piglià si un caffè nantu à u corsu.
•••
CREAZIONE | 11

PROsa • Creazione
I mistieri
Paulu Antoni
SQUARCINI
Bonghjornu à tutti !
Socu filici di
ritruvà vi pà stu 76 u
numaru di u nostru ghjurnali di scuparti
chjamatu Scavendu a Storia. N’apprufittu
par ramintà chì stu numaru d’oghji hè unicu
postu ch’è no fistighjemi u capu d’Annu di
u 2769 è dunqua u milleniu di a battaglia
di Ponte Novu. U prisintatori di l’emissioni
accanitu si metti in ghjinochji. O Pasquà
pinsemi à tè è i to cispreri, i nostri eroi !
Hum Hum, scusetimi mi socu lacatu purtà
da l’emuzioni. Dunqua vi diciu chì oghji
ind’u nostru ghjurnali emi scavatu a Storia
è emi ritrovu un mistieru vechju vechju,
guasgi anticognu ch’ùn si faci mancu più.
Vi docu qualchì indiziu : U primu hè chì?
à i nostri antennati di u xix u è xx u , l’erani
imposta sta materia… u sicondu hè chì,
s’eddi vuliani, i nostri antennati, spirà à un
avvena più sirenu passavani tutti davant’à
quisti quì… è u terzu hè chì ammaistravani
a lingua di u pani (di l’epica !) com’è un preti
ammaistrava a messa… Eti un’idea allora ?
S’arrizza una manu ind’u publicu. « Sarà
prufissori di francesi ? » Iè iè iè iè !!! Propiu
bè !!! Semi andati à u scontru di un prufissori
di francesi, unu di l’ultimi chì fermani quì,
è l’emi intarvistatu. Aghju da ramintà u
cuntestu, in l’annu 2022, U presidenti di
a Republica francesi Emmanuel Macron
decidì d’avè i pieni puteri è pigliò parechji
misuri com’à quidda di pruibiscia a lingua
corsa. U populu tandu u pigliò à cori è
dicidoni tandu di parlà sempri corsu è
tandu u francesi d’hè indebbulitu ind’a
sucità. Fattu si stà chì a lingua francesi hè
sparita da leva in purleva, a lingua corsa era
ghjunta à un puntu criticu ind’a so storia,
era stata assuffucata da i sfarenti pulitichi
linguistichi in Francia è da i ghjunghjiticci
chì ùn la parlavani ma sò stati ubligati
dopu ch’osinnò ùn pudiani avè i so posti di
« cadre » in impresa. I nostri antennati ani
cunnisciutu tandu una riprissioni tamanta,
ci ramintemi sempri st’immaghjini famosa
di Ghjacumu Thiers à guasgi 70 anni chì era
cuddatu sopra u Palazzu naziunali pà metta
un affissu « Lingua corsa ufficiale ! Percò
sò di Bastia è… » – ùn ci era troppu piazza
12
|

pà metta tutta a so puesia à nant’à
un affissu, pinseti… Ma tuttu què u
studiareti in iscola, ùn mi parmittaraghju
di rimpiazzà i vostri prufissori
di Storia di a Corsica mirè !
Vi dumandu di sciaccamanà
chì ricivimi subbitu à M. Persucapu,
l’ultimu prufissori di francesi !
– M. Persucapu bonghjornu,
tamant’onori ch’è vo ci feti !
– Saluta, vi ringraziu assai di u
vostru invitu.
– Allora o sgiò prufissori, prima
di tuttu, quali seti è chì feti ind’a vita ?
– Mi chjamu Émile Persucapu,
socu unu di l’ultimi prufissori di
francesi à u liceu Patrizia Gattaceca
di Bastia dopu ad avè insignatu
anni è anni à u culleghju Edmond
Simeoni di Niolu.
– Comu si faci chì u francesi
s’hè guasgi spintu oghji in Corsica ?
– Ùn pensu micca ch’eddu sia
guasgi spintu, par mè ci hè sempri
a brasgia ch’ùn dumanda cà di
suffià appena à nantu. Ind’a lingua
corsa, fighjuleti, fermani stampi di u
francesi com’è par u indettu a sprissioni
aduprata quandu si devi pagà
un colpu à bia : « Femi mità mità ? »
Allora chì ind’a lingua corsa antica si
dicia « Lascia stà, pagu eiu ! » o « Poi
fà marcà ? Pagu luni ». Ci hè ancu
u famosu « Povara Corsica » chì
veni da l’antica sprissioni francesi
« Povara Francia ». Eccu sò picculi
ditagli chì ramentani a piazza di u
francesi ind’u corsu.
– Assai intarissanti què. Criditi
voi à un trasaltu di cuscenza com’è
par u indettu u latinu chì hà vistu u
so numaru di prufissori è studienti
crescia à tempu à u tempu à u
principiu di xxi u seculu ?
– L’ultimi studii mostrani chì
solu 2 % di a pupulazioni parla u
francesi à i so figlioli, ancu u bunifazincu
hè di più parlatu cà u francesi.
Aghju pruvatu di parlà ni cù u me
culleghu Di Peghjo, prufissori à l’università
di Corti, chì hè un tarcanu
di u bunifazincu ma, postu chì ùn
ci aghju capitu nunda quand’eddu
parlava, aghju lasciatu corra.
– Studienti n’aveti assai ?
– N’aghju 4. Ma u prublemu hè
chì, postu chì a me materia hè in
uzzioni ind’u sicundariu, i sculari
ùn sceglini micca u francesi pà pudè
sorta più prestu da a scola…
– Tucchemi à a fini di stu ghjurnali,
ringraziemi à M. Persucapu di a
so tistimunianza !
– Au levoil et bonne soilée,
com’eddu si dici in francesi !
Iè iè à voi dinò avvedacci è bona
sera. Eccu, cari telespettatori, quali
avaria pinsatu 700 anni fà chì u
corsu saria cusì spartu in Corsica è
ind’a Romania ? U dettu dici bè : ùn ti
ni ridi di u me dolu, quandu u meiu
sarà vechju, u toi sarà novu… ■
CREAZIONE | 13

PROsa • Creazione
U cunfortu
[Premiu di u Ghjuria Altaleghje]
Stella Emmanuelli
U
sole luce. Cacciu a me vesta troppu
stretta è ricollu e maniche di a
me camisgia. Di sicuru, ùn li saria
micca piaciuta a me vistitura… Mi tuccava à esse solu dopu à issi pochi ghjorni
induve sò statu culpitu. Issa chjamata, a sapiu ch’ella ùn mi ci vulia micca à
risponde li. In tantu, u telefunu chì sonna à 9 ore di mane, a dumenica…
« Allò ?
- Babbu ùn s’hè micca svegliatu.
-… Vengu. »
Infilgu un jean, mi boccu una lanetta è chjappu u me mantellu. Lelia hè
dighjà pronta. Hà capitu subitu. I cinque minuti pà andà ind’è i me genitori
mi parenu un’eternità. Ùn la li facciu à parlà, mancu à rifiatà. À dì la franca, ùn
pinsavu micca ch’ella era pussibile di stà tuttu issu tempu senza rifiatà. T’aghju
l’impressione chì nulla ùn pò sorte da u me corpu, mancu un fiatu. Mi pare chì
stendu mutu, silenziosu, u tempu s’hè piantatu, ch’ùn hè micca vera.
Rientru in a camera. Dorme. A so faccia hè stesa. Anu sempre durmitu cù
l’alette aperte è u sole di marzu inchjarisce a stanza. M’avvicingu da a finestra
pà sarrà li ma mi piantu. U pratu di a me zitellina hà lasciatu a piazza à una
infilzata di case muderne. Quantu tempu aghju passatu à corre quallà. Mancu
a notte mi facia rincasà. M’arricordu di a me più bella scuperta : una culunia
d’ape s’era stallata in u tafone d’una leccia. Era u ghjornu di l’Ascensione, ùn
aviu micca scola. Marchjavu quand’e sò statu surpresu pà una bufunera. D’un
colpu, un nivulu neru hè passatu inde u celu nanzu di infucià versu à l’arburu.
Incredibule ! Era a prima volta ch’e vidiu un essame. Di più, s’era piantatu
14
|

quì ! Eru cuntentu cum’è un pichju. M’avvicinavu da verificà s’ellu era bè inde
l’arburu. L’ape vulavanu in giru, ci n’era millaie.
« Saveriu ? Saveriu ? O Savè !»
Impegnatu à usservà u so ballettu, ùn aviu micca intesu à Mamma chì mi
chjamava pà manghjà.
« Iè o Mà, duie minuti.
– Innò, veni, t’aspittemu pà manghjà. »
À tavulinu, aviu parlatu senza fine di a me scuperta.
« Vi rendite contu ? S’hè piantatu quì, davanti à mè !»
Dopu à e ricumandazione di Mamma, Babbu m’avia contu chì u soiu t’avia
una decina di bugni. L’avia fatti elli mì ! S’arricurdava di u gustu di u mele
tastatu direttamente in u pezzu di favu custruitu da l’ape.
À a fine di u ripastu, corsi prestu prestu à ritruvà e me ape. Passavu u dopu
meziornu à fighjulà le.
U lindumane, Babbu era vinutu à salutà mi mentre ch’e circavu a me
baretta.
« Umbè ! Sè cascatu da u lettu sta mane. Ùn ci hè micca scola ?
- Innò, ma vogliu andà à vede l’ape.
- O Figliulè, forse ch’elle ùn ci saranu più oghje.
- Cumu ? Parchì ?
- Parchì quandu un essame cambia di locu, si pianta sempre un ghjornu,
nanzu di truvà quellu chì li cunvene. »
Eru partutu in furia, in ciavatte, sin’à l’essame. Ancu di grazia, era sempre
quì.
Passavu e me ghjurnate quallà quandu ùn avia micca scola o ch’ùn eru
micca punitu. Stavu appena più luntanu di i primi ghjorni… Aviu amparatu –
appena troppu tardi – chì una volta chì l’essame cumencia à custruì i so favi,
l’ape diventanu di più aggressive. Ma, nulla mi pudia impedisce di cuntinuà à
fighjulà le, nè Mamma è i so mughji quand’e sò vultatu in casa cù una punghjitura,
nè una vulintà d’agì pà ripicca. Avianu prutettu a so casa.
L’estate era passatu cusì, à circà di sapè da chì fiori si purtavanu l’amacu.
Tutti issi culori… è l’odore di u mele. Aviu ancu pruvatu à tastà lu. Aviu battutu
a campagna pà truvà un bastone abbastanza longu da piglià ne.
Dopu à a rinfriscata di Santa Maria, Mamma avia cuminciatu à parlà di
scola. Sittembre s’era affaccatu troppu prestu è aviu fattu a me rientrata.
CREAZIONE | 15

U solu puntu pusitivu era issu 19 ch’e aviu avutu in redazzione : ci vulia à cuntà
e so vacanze. A maestra m’avia ancu dumandatu di leghje la davanti à tutti ! Eru
vultatu in casa triunfante. Eppuru, Mamma è Babbu ùn eranu tantu cuntenti.
« Ma, avete capitu ? 19 ! È l’aghju lettu davantu à tutti !
– Hè propiu bè, o Figliulè », avianu rispostu senza fede.
Ùn capiu micca a so riazzione è mi n’andavu à vede e me ape.
« Babbu ! Babbu ! Chì s’hè passatu ? Parchì ùn possu micca andà in u pratu ?
Chì ghjè issu pannellu ?
– Anu da custruì case…, cappiava Babbu.
– Ma ùn hè micca pussibule, ci sò e me ape.
– A sò… Sò vinuti sta mane pà sarrà tuttu. L’avemu amparata oghje.
– Ma sarà periculosu pà elli. L’ape l’anu da punghje cum’è à mè s’elli
s’avvicinanu.
– Aghju discorsu cù l’operai, anu da taglià tuttu pà spianà u tarrenu. »
Fighjulavu i me genitori, l’ochji pieni d’acqua è a gola strinta. Aviu odiu pà
tutti quelli chì vulianu fà a so casa quì. Eru incunsulevule.
Sargu l’alette è a finestra. Mamma hà chjamatu i bicchimorti. Entre inde
a camera da appruntà i vestiti. In cucina, Lelia mette l’acqua in a caffittera
quandu si pichja à a porta. Sò elli… Hè vera. Babbu hè mortu.
I ghjorni si sò suvitati, tutti pari : abbracciamenti, strinte di manu, parti.
Dumane, ti purteremu in tarra. Ùn possu micca dorme. Sta casa, l’odori, i
ricordi… A notte hè chjara, mi tocca à sorte, à marchjà, affocu.
Fora, tuttu hè chietu. E lanterne municipale inchjariscenu e facciate di e
case. Marchju senza riflette, un passu davanti à l’altru è ùn vecu mancu ch’ùn ci
hè più lume. Ùn ricunnoscu micca u locu. Mi sò persu. Cercu di truvà qualcosa
in issu bughju quandu cascu annantu à una forma chì mi pare cunnisciuta.
Cinnuleghju l’ochji da adattà di più a me vista. Hè ellu, ne sò sicuru. Ùn si vede
guasgi nulla è ùn pò micca avanzà, ci hè un ustaculu. Rivengu annantu à i me
passi. Vulteraghju dumane.
A messa era bella. U cunfortu hè compiu. Mamma è Lelia assestanu u
salottu quand’e mi ne vò. Ùn possu più aspettà. Ripigliu u caminu di a notte è
mi ritrovu davanti à ellu. Lampu un’ochjata in giru à mè è francu a sarrenda.
Hè sempre quì ! M’avvicineghju à passi sicuru quand’e sentu a bufunera. Pesu
u capu, surridendu…
« Sò quì, o Bà !» ■
16
| PROSA

PROsa • Creazione
U stallone salvaticu
Guidu BENIGNI
A natura hà sappiutu pruduce tante
bellezze, chì l’omu pò fà cum’ella li pare,
creà, inventà, cuncepisce, almanaccà, ùn
serà mai à paragone d’ella.
Guardate l’animali chì vivenu in
libertà. Ma chì tante ballerine ! Quand’elli si
movenu si valenu tutte l’arte curegrafiche.
Ogni sterpa animale pussede e so qualità
proprie.
Avete mai vistu issi cavalli salvatichi
chì stanu per isse pianure smense ? Ma chì
tanti affari ! Chì maravigliosu spetaculu à
vede li marchjà, truttà, galuppà è saltà. Fieri
di stintu, sazii di spaziu, superbi di forza,
fughjenu l’omu è disprezzanu e so cure.
Verani verdicenti, statine calurose, inverni
salutivi li danu rispiru puru è porgu. Elli
beienu acque linde è pascenu prati senza
cunfine. S’omu li si pudia dumandà u so
parè è ch’elli pudessinu risponde, sò certu è
sicuru ch’elli vi dicerianu : “Ma chì tanti lazii
d’esse curati in stalle puzzulente ! Chì tante
voglie d’esse cumandati è sottumessi à discipline
!” È cum’elli averianu ragione…
U salvatichisimu li dà forza, allegria,
nervu è nubiltà. Invece chì i so cumpagni
inchjustrati ùn anu, elli corci, chè poca
sumiglia cù isse qualità, for di a domma
chì l’omu l’impone (chjamanu quessa
“l’Alta Scola”), è per chì fà ? per ch’elli sianu
d’accunsentu à fà per forza ciò ch’elli facenu
cun l’amore, in libertà.
Fieri è salvatichi, furzuti è scupigni, elli
si difendenu da i predaghji è i vincenu à a
corsa. Aduniti in greghje, si piacenu à stà
inseme. Mentre ch’elli pascenu, u patriarca
di a sterpa stà in custodia è prevene s’è à
casu mai qualchì periculu si presenta. Elli
ùn attaccanu lite à nisunu, à nisunu facenu
assaltu. A guerra ùn hè di so fattu è ùn li
garba. Campà in santa pace è in libertà, in
libertà, pare ch’ella sia a so sola primura,
u so solu penseru. Chì vita piacevule è chì
lezzione per l’omu !
Ma l’omu, ci averà mai pensatu ?”
| 17

Cusì parlava Ziu Orsu Maria, tempi
passatoni. Discorsu filusoficu, vistu ch’ellu
avia avutu l’asgiu di pensà è riflette à u
stintu animale cum’è à l’estru omanu, da
tantu ch’ellu avia insulcatu mari è traversatu
paesi, da tantu ch’ellu avia avutu à
scumpete o trattà cun populi di tutte e
sterpe è di tutte e cundizione.
Ziu Orsu Maria, da giuvanottu s’era
datu à a pesca cù u babbu, è di quandu
in quandu capitava ch’elli avessinu à fà
viaghju da Macinaghju à Bastia. Chì d’issi
tempi era più comudu è prestu fatta in
barca chè d’andà ci per terra. Più tardi
ellu s’era imbarcatu cù un patrone chì
facia u cumerciu trà Capi Corsu è isse
mareme tuscane, vendendu vinu o oliu,
è incettendu stofe, ferri, ardigni o arnesi
prufessiunali. È fà chì cusì li era venuta
a passione di parte sempre più luntanu.
Sin’à u ghjornu ch’ellu s’era imbarcatu
nant’à una nave chì facia viaghji longhi è
da issi lochi ne era rivenutu… trent’anni
dopu.
Ziu Orsu Maria, quand’ellu cuntava e
so passate, i so stalvatoghji, e so venture, si
lasciava imbuccaliti tutti i zitelloni accatamansati
à l’intornu di u fucone. Babbone,
chì ne facia partita, averà avutu ellu tandu
una quindecina d’anni. U seculu stava
per finisce, vale à dì chì Ziu Orsu Maria
cuntava fatti successi ver’di i tempi di
Napulione III. È Babbò ci ne facia a ripetizione
di quelli chì l’eranu restati impressi.
Cusì fù per quella di u stallone salvaticu.
State che a vi conti tale ch’ellu a cuntava
Ziu Orsu-Maria…
“Quellu ghjornu m’era persu. È cume fà
per ùn perde si in isse pianure senza fine di
a Pampa argentina ? U sole, ellu solu, pudia
indicà punente o levente. Partutu sulitariu
à riguarà vaccine sbandate, m’era spiccatu
da a squadra di i cumpagni è senza rende mi
contu m’era lasciatu piglià da u tardi. Tandu
m’era vistu custrettu di circà un aggrottu
per passà a notte. Siccome chì e nuttate
ùn eranu friddose, in cuntrastu tremendu
cù u calore di a ghjurnata. U ciuttà di sole
facia scade a timperatura di 15 o 20 gradi
è malasgi à chì ùn avia previstu u fattu.
Campa chì mi purtava sempre appressu,
liati à a sella, o stretti in le prisacche, tutti
l’attrazzi nicessarii per pudè vive for di
casa parechji ghjorni : manghjusca, bienda,
stuvigli, cupertoghji, panni di riscambiu è
arme per caccighjà.
Per furtuna avia scupertu una teppa
chì mi avia prucuratu l’aggrottu è cusì avia
pussutu accende un fucarellu è fà mi duie
ove cù una fetta di panzetta. U “maté” caldu
mi avia datu fiatu per a nuttata. À qualchì
passu vicinu, a mo ghjumenta, intravata, a
si pascia pianu pianu, avveza ch’ella era à
stà si in cumpagnia di u patrone senza mai
spustà.
A stupita fù lindumane à u sbiancà di
l’oriente, quandu mi sò svegliatu è chì mi
sò avvistu chì a ghjumenta ùn era più sola,
ma si tenia in cumpagnia d’un superbu
stallone salvaticu. Fieru, nare pisate,
chjoma furnita, coda alta, quellu baculava à
l’intornu à a ghjumenta è ella, accunsentevule,
u guardava fà, cum’è ammagata. Fattu
straordinariu, a ghjumenta s’avia persu e so
18
| PROSA

trave, ciò chì m’avia impenseritu s’è mai mai
li venia u laziu di fughje…
Da tandu ùn sapia chì fà. Un ventulellu
cuntrariu, impedia u palesu di a mo presenza
à u stallone è d’infatti, quellu ùn era attente
chè à fà u bellu cù a so nuvella cunquista.
Mustrà si, fiscà a ghjumenta ? Mancu pensà
la chì pudia umbrichjà u stallone è fà lu
parte, è cun ellu a ghjumenta. Aspettà ? Ma
quantu ? È po chì sà ciò chì corre in chjocca
à l’animali ?
Per fine, m’era decisu è avia fiscatu a
ghjumenta. À u solitu, allettata, ella venia
sempre chì sapia buscà si qualcosa. Ma
tandu, facia cum’è s’ella ùn avessi intesu.
Aghju turnatu à fiscà, ma più forte… Ahù,
nisun muvimentu di a ghjumenta, ma u
stallone tandu s’era avvistu di a mo presenza.
Benchè à più di centu passi, ellu avia messu
a spazientà, ruspendu di zampa è pisendu
un nulu di pulvarizzu, trinichendu a cullaghja
per scuzzulà a so chjoma, tutti segni
d’impazienza è d’estru cuntrariatu. Hè stata
quandu aghju circatu à avvicinà mi, pianu
pianu si sà, chì a ghjumenta s’hè resa contu
di a mo presenza. Ella, tandu, s’hè tirata più
luntanu è u stallone appressu. Avia bonu à
turnà à fiscà, più m’avvicinava più l’altri
dui si scantavanu, dolcemente, in principiu,
è più lesti per fine à ogni passu. À manu à
manu a ghjumenta s’era vultata versu mè,
m’era venuta à dece passi è mentre chì à mi
pensava decisa à rivene s’era firmata netta,
guardendu mi una stonda è d’un colpu
pisata arritta arritta, s’era vultata da l’altra
parte è partuta à u trottu, coda pisata, ver’di
u stallone chì, fermu cum’è una statula
l’aspettava. Tandu, partendu tramindui,
fiancu à fiancu, cum’è per dì mi : “Noi ci simu
piaciuti, è ch’ella ti piaci o nò à tè, avemu
decisu di fà vita inseme”.
“Piglia ti què, o carnavà, è vai à pedi !”
s’era dettu Orsu Maria. Hè tandu ch’ellu
avia truvatu, in pianu, e trave di funa di a
so ghjumenta, mastacciate è tazzate da i
denti è chì ripresentavanu u simbulu di a
libertà ritruvata.
Orsu Maria aspettò dui ghjorni,
sulitariu è scumpientu, chì i so cumpagni
u ritrovinu, dopu ch’ellu avessi fattu un
bellu focu cun frasche di legna verde, per
dà assai fume è signalà a so pusizione.
“U stintu di libertà, in più di quellu di
l’amore… è tuttu hè dettu, avia cunclusu
Orsu Maria, a ghjumenta avia fattu a so
scelta.”
•••
CREAZIONE | 19