BITE-BITANTE

— O ho! Quin triste òmi noû-m hès! Coum se noû-ns en abém gagnats quàuques dinès, e que s'aboussem
besougn de cabéstres enta la yègue n'abém pas de que croumpa-n!
— Que bos, si hey à la moulhè, de qu'en y-a qu'an respounse à tout, e toustem prèste la cabilhe tau hourat, e
en toute escadence que b harén sourti espurnes d'ue lose en marchan dessus. D'àutes, e que souy d'aquets, e
ya t’en ès abisade bère troupe de cops despuch qui-nse partadyam lou pâ e la garbure, que soun loungs,
loungs e qu'an besougn bères pauses ta mastega ço qui an à dise.
— Praubas! si-m digou, coum m'at préni en badinerie, se tant madures la toue respounse, qu'ey permou que
dab lous de dehore que bos passa bràbe, ya que dab lous de case nou sìes tant dous.
E la may dous mes maynats qu'en dabe ue guignade à toute la coade, mes lous hilhs, acoustumats d'audi
d'aquets gnacs, noû-s boudyaben. D'aulhous, se ue hémne e parle noû pod èste que dab rasoû; tabé, ta noû
cerca brégues mey, que hey dou mut.
L'ardalh, drins à drins, que hou cargat, e ballèu ayergat dens lou soulè de la borde. Que biengou l'ore de
soupa e d'ana-s yase.
L'abor tabé que-s despachè de ha place. La tèrre que s'adroumi, bestia e moùnde que s'embarrèn. E gn'aute
cop, la prime besiade que hé bade la muyete pous prats e, estan baquès, ya s'engountrabem dab lou Suberbie.
Per aquero, noû l'anàbi coùrre au darrè. Mes et, drins à drins, coum s'ou housse degrèu la hèyte de l'aute cop,
que-m dabe talèu qui-m bedè de loegn ou û sìnne de cap, ou û adichat de bouque. E you, que parlàbi, tè,
permou que boune pats que bau mey que guèrre cridade, e que lou qui bòu la pats entre besîs n'at deu pas
espia tout ore, e que s'en deu béde de grises, de berdes e quàuque cop d'escousentes.
Que biengou toutû lou trebuc de tourna-u las péres au sac. U die doungues, lous de case qu'èrem au medich
aròu, à brespalha sus la yèrbe, e Andrèu, qui abè l'oelh à d'arroun, de dìse:
— La cabale de Suberbie qu'ey au noùste casau!
— Bos-te cara!
— Noû-b hèy esprès noû, e senoû beyats se noû l'agraden lous caulets, qu'ous tors e à pic trabessè. Lous qui
dèche, qu'ous be hè crouchi debat lous pès.
E coume, d'û eslans, anabe bira la cabale, la hemne que-m digou:
— Bam que bas ha, pénsi qu'adare qu'as la paste aus dits. Bam quin hourneyes. S'ou ne bas canta dues au
besî? Qu'èm toustem de pèrte dab et. Aqueste primabère qu'aboum tout die la clouque e lous sous dèts e sèt
pourics qui m'entraben dinque au houns de la cousine, arré que biéne peruca ço de mau-estrussat, e ta ço qui
dechaben que calè ue palade d'arressec e mantû cop d'escoube; medich la guihe dab lous pourcets que-s
bienè cade maytî esdeyoa dens la parguie. Noû-t pàrli, ya-t sabs, de la saume qui de Nouste Dame de Mars à
Marteroû e s'y hè pou tour de case, tant que Menyete de las Cousseyes me disè l'aut die: E be l'abets toute
plagade, e noû la saberets remedia dab drin d'òli e harie de milhoc, ha-u-ne û bèt emplaste! N'ey pas nouste
aquere, s'ou tournàbi, lou qui n'ey mèste qu'a dequés ta croumpa poutingues. La nouste saume, hèy
mayboune, qu'ey à l'estacadé, e n'a pas rèyte de medechines, la beroye bèstie qui ey e bèt drin poumpouse!
— As audit si-m hasè encoère la hémne, noû cau cerca-s de peleye entre besîs coume aymes d'at dìse tu, mes
noû bouleri neuri-us lous auyàmis e lou cabau dab lou rebengut dou nouste bé!
Andreu, à l'entan, que-nse presentabe la cabale, toustém estiran lou cap entau casau oun lou hasèn dòu, bessè,
lous caulets qui abè debuts abandouna.
— Oère, si hé la may, de tire mie-l'at e, sense esmali-t, au clot de l'aurelhe dits-lou de las noustes parts: N'as
pas besougn gran hèch de pasture anoeyt, que bié de harta-s, que l'abem dies e dies au casau e que pods
créde qu'a beroy goust entaus caulets. E-t broumbes quin la nouste, l'abor darrè, e s'en dabe au coùrre decap
à boste? N'abou pas lesé de pèche quoàte busques e que la-nse tournabes. Bèn, tu tabé hique-u lou cabéstre,
e se noû n'as nat que t’en prestaram û!
— Pay, si-m hé l'aynat, tout fièr deya d'ana ha la coumissiou, que m'y pùyi, e qu'ou bau ha ue aubade au
Suberbie!
E d'û saut, ço qui ey d'esta yoen e lèste, que s'y acabalabe deya. Mes que l'estangàbi:
— Noû e noû! Per û brassat de caulets e s'at bau d'aluga tout lou besiàdye? Bèn, si hey à la caddète, bèn
maynade, mie la cabale dinque au prat dou besi e noû s'en pàrli mey. Tu, Andrèu, debare, bèn!
Lou gouyat que debarè e la moulhè se noû digou arré que-m tirè ue oelhade qui n'ère pas de las amistouses.
Toutû, que se-m escadou de l'at dìse au Suberbie, e dens la semane mediche. Qu'èrem de marcat e que
m'embitabe d'ue pinte dou blanc. Quoan abou chucat drin, en batalan que-m digou:
— Noû-t hèn bessè goàyre puchéu lous caps de pouralhe qui-b arriben quàuque cop enta bòste; lous boûs
besîs que s'an à cluca soubén?
— E o, si-u hey truc per truc, ya s'amien cade die las cloucades e medich las pourcerades, mes aquero, ray,
noû soun ne saumes ne cabales e n'ey pas aysit de las estaca dab cabéstres.
Sounque aco. L'òmi que senti la chacade, e de segu que pensabe au cabéstre qui-nse boulè croumpa l'àute
cop ta la nouste cabale:
— Toustém qu’en as ue, si-m hé à bouts bache, mes tringuém; bos?
E que tringuèm coum se d'arré noû ère.