BITE-BITANTE

Quàuques esbagats, qui-n boulèn au mèste de Hougnis permou que-s tienè besiat ou permou d'oupinioûs de
poulitic (que crey qu'û cop ou dus qu'ous passèsse daban au counselh de la coumune) qu'abén hèyt coùrre
letres de faire part qui noû mancaben ne de sau ne de pébe ne de pimboû, e medich, û sé de hartère, que
s'éren boutats à rima ue cansoû, pràube cansoû doun lous couplets qui tourteyaben èren entrelardats
d'afrounteries grassoutasses. Cabens de la noeyt, be l'anèn canta daban lou pourtau de Hougnis!
Mes, tandes de chàfres que s'èren amourtits poc e poc. Lou tems qu'ey munit d'ue escoube qui s'y entén ta
n'escouba hères. Qu'ey tabé lou massounàyre qui sab boussa lous màyes boeyts, e oerats quin ey, se Fine
abè perdut hère dab lou soû marit, que s'en ère toutû counsoulade. Que boulet ha-y, noû-nse poudém toutû
hica daban de la mourt. E lou moùnde (oun que-s hè coustume de tout!) que s'èren hèyts gn'aute cop à béde
soubén lou Bictor enço de Fine.
Aquet, are, qu'ère passat coum lou counselhè de l'oustau de Casedebat. La may e boulousse passeya la
nenete, Bictor qu'atelabe la soue boeture, la daune e debousse cruba paperoûs à la banque, Bictor qu'ère de
biàdye; que calousse ha croumpes d'û beroy càdre ou cambia tapisseries, Bictor qu'abè lou soû goust à dìse.
E, tabé, sus lous bestìssis de Bictorine, Bictor qu'y boutabe lou soû mout. Puch, que m'at pénsi, s'embitaben
enço de Casedebat, Bictor que s'assedè dens la cadière dou defunt mèste.
E las anades ya s'escapaben au trot cagnè toutû que l'eretère debienè gouyatote. Que-b crubabe ue claretat de
pèt, ue finesse de care, ue traque hèyte per espia, mey linye, mey alihèrre que yamey la may noù s'ère biste.
Tiran dou pay pou soù ana, per la soue boune fayssoû plaserouse, qu'en moucabe quoan de maù-parlès,
quoandes de lengues de serp qui loungtems noû la mentaboun sénse dà-s'en guignades e bouta endabans lou
noum dou soû oùncou!
Aquéste, quoan la may de Bictorine e s'ère maridade qu'abè bint e cinq ans, mes are qu'en coundabe dèts e
oeyt de mey. E n'ère pas û arroussec. Brigue d'aquets bentourruts à las carns moufles qui an penes à
carreya-s e s'ayumpen coum pouloys arpastats, brigue d'aquets guilhèms-pesquès qui noû soun que cames.
L'oelh lusent, la barbe hèyte de cade die, quilhat, decidat e leuyè noû lou dèren mey de trente-cinq ans
maugrat qu'abousse doublade la quarantene. En bère santat de cos, en boune pousicioû de dequés, ya poudè
ha lou gay d'ue daune drin madure e dilhèu d'úe gouyate (qui noû pourtèsse coum leyitime que ço que Diu e
l'abousse dat) mes qui toutû s'en counsoulèsse. Ya s'en soun bis, b'en counechets, d'aquets atrebits doun lou
peu se mescle e qui-s prénen maynades tant per tant counfirmades.
Per aquero, se parlèssen de beudes, la Fine n'ère pas à mespresa. Quin s'arrenyabe ta noû pèrde nade
d'aqueres gràcies qui courounen la hemne de beroy àdye; quin poudè goarda-s lou yoenè dous bèts
dies? Tant y-a que se la may e la hilhe entrèssen à la glèyse ta la misse grane, e aco qu'arribabe cade
diménye, coum toutes dues se daben aygue benedite, las coumays à l'oelh hicanèc que-s tiraben û hougnat
dous boûs dab lou coud e gnacàn-se agnibes (permou que dents agudes noû-n n'y abè mey!) que sabèn
marmouteya-s. Espie, que semblen d'û tems, e se y-a choès la may qu'ey encoère mey bère e mey beroye.
E Bictor, d'escàde-s souben enço de Casedebat.
De segu que s'y tourrinabe û maridàdye, mes dab laquoau, dab la may ou dab la hilhe?
Fine n'abè pas atendut que s'en y parlèsse e que Bictorine e debiengousse hemne maridadere ta saya de ha-s
coumpréne d'aquet òmi. Per û souspit, per û plagn, per û mout largat en boune ore, per û loung batalis sus
l'àdye dourèc de la maynade (dens quàuques ans, deya, b'ou caloure cerca û bou partit) pous abantàdyes que
la hilhe e tiraré dou maridàdye de la may que chacabe lou bisitàyre, qu'enterrougabe l'amourous d'àutes cops.
Mes, l'àute que parechè ha dou sourd, se respounè, n'ère yamey que: — Moun Dieu, quio! Qui sab! Que
bederam!
U die toutû qui èren dens lou saloû, coume la daune noû sabè que la plagnence coustumère: Dinque are n'èy
pensat qu'à Bictorine e noû crey pas qu'arrés e poùsque trouba-y que dìse, d'are enla que débi pensa en you!
Au dìse mey abansiu de: Que seré tems que-nse maridèssem, bertat? mous de Hougnis noû poudou mey
sauba-s las soues rasoûs dens lou toupî, e tout sec que hasè à la beude abanhèyte.
— Escusats, se biéni quàuque cop ta bòste (lou gusard, que coundabe mau permou que nat sé noû s'anère
droumi sénse abé yougade la partide de loto enço de Casedebat!) se biéni n'ey pas permou de you, n'èy
yamey dit qu'èri dispausat à marida-m, se biéni, se biéni qu'ey permou de...
E aquiu dessus la bouts qu'ou tremoulè; que pallibe sénse sabé perqué, qu'espiabe adendour coum s'aperèsse
ue ayude. Qu'ey ço qui s'anabe escapa, lhèu paraules qui noû lou decharén mey lesé de tourna ta ço d'aquere
daune, sustout ta ço de la hilhe? Coum lhebabe lous soûs oelhs abeyats qu'abou sus la paret lou pourtrèyt
dou defun mèste, en nòbi, chenilhe negre, camise empesade e goans blancs, e au ras, dens las tules, la nòbie
cragntibe. Que hè:
— Qu'ey en soubeni dou me amic qui souy souben aci; abans de passa que-m recoumandabe d'abé soegn de
madamisèle Bictorine...
La daune, audin aqueres, qu'abè bachat lou cap, coum parlaben de Casedebat, e granes oumpres que s'èren
hèytes de seguide au deguens d'ere. Que disè aquet bisitàyre de cade die? Se bienè qu'ère permou de
Bictorine? Qu'en hou aquero maye truc tad ere e que mesurè d'abiade lou sou malur. Dalhades qu'èren las
soues ahides? Qu'ey ço qui-u disèn aquiu cap e cap? Ah quio! E, lhebade cop sec e mandan dues oelhades
de hoec sus aquet batalàyre, que parti, en dìse mespresibe e d'ue bouts chisclante:
— Que disets aquiu, moussu?