Marius Bourrelly - Université de Provence

FABLO XIII
La Galino eis Uou d’or.
Un avare avié ‘no Galino
Que toutei lei matin li fasié soun Uou d’or
Tout en pitant au sòu de grapié, de vermino.
Aquel ome, un jour s’imagino
Que dins soun vèntre li a ‘n tresor,
E la sauno autant-lèu. Li trobo de tripaio
Coumo eis autro, ni mai, ni mens,
E pèrde tout. Vaqui, pamens,
Coumo leis abrama si meton sus la paio
Quand vouelon tròu lèu fa ripaio.
Acò s’es vist foueço souvènt
E touei lei jour si ves encaro
Encò de l’arpian qu’acaparro,
De perdre tout d’un còup soun bèn.
Va li fau! sie di sènso lagno;
Couneisson pas seis interés.
A seis uei l’or a tròu de prés;
Mai l’or si volo pas,... si gagno!