Marius Bourrelly - Université de Provence

FABLO VI
La Vièio e lei doues Servicialo.
Uno Vièio cran-cran avié douei Pòchi-grasso
Que menavon lou trin de l’oustau coumo fau:
Mai, sènso èstre fenianto, èron un pau dourmiasso;
An toutei quaucarèn, n’i’a ges sènso defaut.
La nue, lei Servicialo an besoun de repau.
Tre qu’au matin l’aubo espinchavo,
Lou gau cantavo dins la cour,
La Vièio si destrassounavo
E lei fasié leva à la pouncho dou jour.
Sènso bas, descausso, arribavo,
Em’ un coutihoun pedassa,
E vague de lei gangassa. . .
Durbien un uei e badaiavon,
En riscant l’autre, s’estiravon:
— Li petaras, bregand de gau,
Si disien daise, espero un pau!
Acò li arribè. Sus lou sero,
La Vièio, emé lei bras en crous, sus sa cadiero,
Fasié soun penequet davans lou fugueiroun.
Lei doues lurado Servicialo
Anèron, de galapachoun,
Au gau faire batre de l’alo
En lou saunant dins un cantoun.
Mai acò sieguè pas la fin de sei misèri;
Quand ausè plus lou gau, au mitan de la nue
La Vièio si levavo en touto ouro. Aquéu jue
Lou treboulè bèn mai lou repaus dei doues lèri.
Emé coumparesoun, n’en es ansin souvènt
Dei pople e dei gouvernamen;
Lou mounde creson de mies èstre,
Mai uno fes qu’an tua lou gau
Arribo un autre rèi, arribo un autre mèstre
Pèr lei debaussa de pus aut;
Acò si dis, toumba de la fèbre au mau-caud.