Marius Bourrelly - Université de Provence

E tout acò partè. Lei rato, lei ratoun
S’escapèron, vo pau vo proun,
Mai aquélei que coumandavon,
Lei capitàni e generau,
Que s’èron arnesca pèr acò, e pourtavon
Leis espaleto d’or, de crous sus lou peitrau
Emé de plumàchou bèn aut,
Poudien plus rintra dins sei trau.
Leis Moustello leis encapèron,
Zou! dessus; leis espoutissèron
Coumo se fasias un pelau.
L’ounour es uno bello cauvo.
Mai douno jamai rèn pèr rèn
E l’ome se li dèu; vous laisso ges de pauvo.
L’ounour vòu de vido o d’argènt.
Entanterin li fan la casso;
Es un feble qu’avèn. Leissas ista l’ounour
E la glòri ounte soun, car se prenés sa plaço
Va li pagarés chiero, un jour.
FABLO VII
La Mounino e lou Daufin.
Lei gènt, pèr s’amusa an besoun de Mounino,
De chin, de papagai, de cat, de passeroun;
Lou cat, se li passas la man dessus l’esquino,
S’enarco e vous fa de roun-roun.
Lei Macaco vous fan la mino,
Lou chin juego e leis auceloun
Canton, subre-que-tout quand es de cardelino.
Antan, lei rèi avien de fouele e de boufoun
Pèr leis espasseja; lei Felibre an la Muso,
E l’ome es rèn mai qu’un enfant
Que touto la vido s’amuso,
Aquélei d’aquest tèms coumo aquélei d’antan.