Remembranço QXP - Université de Provence

REMEMBRANÇO A PAU ARENO
I
Coumo lou tèms esquiho vite! Vaqui nòu mes que tóuteis aquélei que se senton
boumbi lou pitre e courre lou sang dins lei veno an tra de flour e de plour subre la
crudèlo despartido de noueste paure Pau Areno. Adounc li aurié que iéu que restariéu
muto? Nàni!
Es pas pèr espepiouna lei cap d’obro d’aquéu grand escrivan francés, que m’atale à
l’óubrage. Noun vous parlarai de Jan dei Figo que tout lou mounde counèis; ni de la
Cabro d’Or, ni de tant d’àutreis escri que fan la glòri de noueste paure mouert; es de: —
Pau Areno de Sisteroun — coumo l’avié signa subre la dedicàçi dóu proumié libre que
me fè liéuresso, soun Jan dei Figo, edicien de 1870.
Tant m’èro arriba d’ausi dire pèr quauque gros tòti:
— Pau Areno es un tintamarro, un mita fouele!
Pardi fasié de vers! e pèr tout ço que pènso pas qu’a la mocro, l’i a pas de mitan: sias
fouele!... Bello foulié, parai, paure Pau? subre-bello foulié, que te faguè canta nouesto
bello Prouvènço bèn miés que ço que lou roussignòu canto seis amour, quouro arribo
lou printèms. Idealo foulié que souvète en foueço, bord que te dounavo la doublo visto!
De destimbourla coumo tu, n’en faudrié un dins cade oustau!...
Diguas-me, quau miés que Pau Areno a sachu d’un rèn n’en fa ‘n cap d’obro.
S’embrounca ‘n’ un queiroun, se pougne à-n-un rebaudin, agué l’enterigo d’avé manja
d’agreno; vèire flouri un argeila, tout èro matèri à escriéure en sublime francés! en
francés saboura de farigoulo! Es nouesto bello Prouvènço que l’a sèmpre ispira. Amavo
sa Prouvènço mai que tout lou rèsto de l’univers; e soun Sisteroun èro lou pus bèu
cantoun de soun Paradis.
— Vè, me disié un jour, Sisteroun es lou pus bèu païs que counèisse; en lue
atroubarés tant de bèuta rejouncho dins tant pichot rode!
— Es verai, li rebecave, que pèr uno naturo artisto coumo la vouestro, sias neissu
dins un bèl endré!
Sei bèus uei beluguejavon quouro li despintave la Rouecho enchabanaio emé seis
escarto espetaclouso, mounte la Durènço emé lou mistrau gingoulon coumo de
despoutenta. Lou pouent de pèiro qu’encambo la Durènço, e de mounte se revirè pas
pèr vèire la pauro Roset, quouro soun brave Blanquet lou pourtavo à Paris, à la
counquisto de la glòri!...