Remembranço QXP - Université de Provence

Avien uno taulo qu’avié que tres pèd, uno taulo-fermado em’ uno mastro vièio coumo
Matiéu-Salé. E rèn qu’uno cadiero! Peréu, quand falié s’asseta tóutei dous, la couchavon
ço que fasié que lou pu pesant toumbavo toujour sus lou pu lóugié. Acò li fasié faire
d’escacagnado de rire, d’aquéu bouen rire prouvençau que fai tant plesi d’ausi!
Avien entre tóutei dous que quatre sòu! S’en croumpèron tres sòu de sucre em’ un sòu
de brouqueto, e li restè plus rèn! Aqui, Jan, fai te gras!
Avien de pan emé de liéume pèr manja vue jour... Mai de fricot, avien qu’aquéu de sei
vint an! E m’an sèmpre di que l’aurien pas chanja pèr de feisan. Si poutouna, si
moussela, si miraia dins leis uei de ço que l’on amo, voulès quaucarèn de meiour?
Lou meme jour si metèron à l’obro. Travaiavon coumo de nègre, e vue jour après
avien gagna pèr croumpa ‘n sa de blad. Lou paguèron argènt coumtant, e li restè dès sòu,
uno peceto de dès sòu! Martin la mando en l’èr: la peceto toumbo au mitan de la
chambro, e lou vaqui en li partènt dessus en dansant la mateloto e en cridant: Sian riche,
dansan sus l’argènt!
Aro nous manco que d’enfant!
Pourren jamai mouri de fam!
Nouéstei filousofe soun pas vengu riche. An agu coumo tout lou mounde sa grosso
part de peno. Mai an agu de bràveis enfant, gaiard coumo d’ercule, e que leis amon
coumo bèn gaire de riche soun ama. Soun vièi, quàsi bèn vièi, mai si pouerton bèn. E
quand si regardon tóutei dous, l’on vèi passa dins lei belugo de seis uei un rèsto de
l’escandihado de sei vint an. N’en souvète autant en tóutei mei leitour.
LA MAIRE E L’ENFANT
L’enfantounet à peno arribo au mounde que sa maire pènso deja au jour que faudra
que siegue sóudard, e dins sa joio d’agué douna ‘no creaturo à Diéu, soun couer li sauno
en pensant qu’un jour si faudra separa d’éu. Li sèmblo qu’un boulet vo li vai empourta!
Lou sarro sus soun sen, e lou manjo de babeto! Es tant bèu soun nistoun! Es tant urouso
de pousqué lou maiouta, lou fa teta, lou tintourla, lou bressa dins sei bras pèr
l’endourmi, que li sèmblo que jamai degun dèu agué de dre sus d’aquelo bello creaturo.
Coume es countènto quand pòu lou pimpara! Bèn souvènt la maire es pauro; mai soun
couer es tant riche d’amour que fai de miracle pèr soun enfantoun. Elo fau que travaie
pèr gagna quàuquei sòu: — dien que, quand la vaco ajudo au buou, l’araire vai miés.
Saup que la journado de soun ome es pas proun fouerto pèr fa viéure touto la famiho,
e la maire vòu que rèn manque à soun fiéu. Elo vòu que siegue bèu, que rèn li defaute!