Remembranço QXP - Université de Provence

Quand nouesto Crècho èro alestido, esperavian em’ impaciènci l’ouro dóu soupa. —
E perqué? me dirés. — Perqué? pèr-ço-que fasian riboto e que tout lou mounde fasié
riboto, dins noueste oustau. Lei gènt, lei bèsti, tout fasié Nouvè! Moun paire, ma maire,
que manjarien pas une avelano sènso la parteja ‘mé sa famiho, voulien que dins l’oustau
tout siguèsse en fèsto. Lou proumié servi èro lou chivau. Coupavon un gros pan
d’oustau dins uno grosso tiano e l’abéuravon d’un fiasco de bouen vin Quand lou pan
èro bèn espoumpi, moun paire anavo lou metre dins la crùpi e lou chivau fasié Calèno. A
la cardelino qu’avian en gàbi, li dounavo un moussèu de fougasso d’òli emé de sucre,
d’aquelo boueno fougasso que ma maire avié pastado e qu’èro grosso coume la luno
quand es pleno. Après venié lou tour dóu chin, dóu paure Choucho: à-n-aquest li
dounavo un gros plat de tian emé de merlusso. Oh! se l’avias vist, coume èro urous, lou
brave chin: gingoulavo, gassaiavo la coue, éu coumprenié que la joio èro dins l’oustau.
Enterin que moun paire apasturavo tout soun bestiàri, ma maire metié la taulo, bèn
pròchi de la chaminèio, mounte li avié un fue coume uno veiriero. Doues gròssei souco
espetaclouo servien de cafue emé de Cacho-fue. Dessus aquéli gròssei souco metian un
gros mouloun de boues bèn se, e poudès dire si flamejavo! Lei feissino d’óulivié
passavon peréu au fougau. Basto èro lou fue de Nouvè, lou fue de joio de l’ivèr.
Sus la taulo, mounte ma boueno maire avié mes uno touaio bèn blanco, li avié de gros
plat blanc coucourucha de poumo, de pero de figo, d’amendo pistacho emé de nougat de
Nouvè, que ma maire avié fa ‘mé de mèu, d’aquéu bouen mèu que lis abiho van cerca
sus lei flour de la couelo de Luro. Aquéu mèu es lou meiour dóu mounde: es
prouvençau!...
Li avié peréu de liame de rasin pendoula au planchié, que semblavon nous dire:
«— Nous óublidés pas, voulèn peréu èstre de la fèsto!»
Avian peréu lou tian d’espinarc, lou tian de cougourdo, de merlusso fregido, de panet
rous coume d’or, que ma maire avié couina dins l’òli nouvèu. Avian noueste gréu d’àpi
bèn blanc, de bouen vin de la bouto, de soumoustat, de vin cue; e voulès que nàutrei,
enfant de paure, fuguessian pas urous!
Avans de coumença de manja, cantavian tóuteis ensèn aquest nouvè dóu paire Abriéu:
Pastre de la bourgado,
Levas-vous lèu;
Veirés dins la valado
Coume un soulèu!
Un àngi foueço bèu
Que vous anounço (bis),
Un àngi foueço bèu
Que vous-anounco un rèi nouvèu!
Après agué canta aquéu nouvè, nous metian à taulo. Mai es lou cas de dire qu’avian
mai d’uei que de vèntre. Tastavian un pau de tout, mai gaire: lou bouenur nous servié de
nourrituro.