Remembranço QXP - Université de Provence

Un jour, pèr soun bouenur, que noueste pichoun decroutur èro ana demanda à la
patrouno d’un magasin s’avié pas de soulié à cira, aquesto de vèire aquéu poulit
mourroun, li demando de mounte èro? S’avié de fraire, de souerre? L’enfant respouendè
à tóutei sei questien en diant qu’èro l’einat de sèt enfant, qu’avié douge an; qu’èro arriba
de la mountagno emé soun pichot sòu; qu’avié croumpa La Sartan e que dins un jour
avié gagna quatre franc e que n’avié croumpa seis óutis.
Basto, la damo s’interessè à-n-éu, li faguè quita lou mestié de ciro-boto, li croumpè
un bèu desabihé e lou placè encò d’un aubergisto.
Pèr n’en fini, lou pichot travaio voulountié; tóuti lei sòu que gagno lei mete dins uno
cacho-maio e quand a un escut lou pouerto à la Caisso d’Espargno: a deja vint escut e
quàuquei dardeno.
Tout en fènt d’espargno, noueste poulit bloundinet mando la mita de ço que gagno à
soun paire qu’a encaro sèt enfant à nourri. E aquest es urous que noun sai, en sounjant
que soun pitouet fara soun camin.
Vaqui coumo em’ un pichoun sòu l’on pòu quàuquei fes acoumença sa fourtuno.
Anàvi óublida de vous dire que noueste brave pichot Savouiard, qu’a foueço bouen
couer, s’es despuei abouna à La Sartan!...
LA COURSO DEIS AI A MANOSCO
Carèu, moun ome! Es pas de garceja. Aquest an moun païs va faire charra d’éu: 1.600
franc pèr la courso dei chivau. Jamai, au grand jamai s’èro vist pariero generousita. Acò
osco! es èstre largant pèr leis raço dóu cavalun. Mai qu sara pas countènt, qu sara bèn
couiouna, es lei pàureis ai! Pas soulamen un bridoun pèr élei! Avien qu’aquéu jour pèr
èstre festeja e vaquito que, tout d’un còup, lei coundanon à resta estaca lou franc diéu
dóu jour à la grùpi. N’en aura meme, dins lou noumbre, que badaran touto la journado
davans lou rastelié sènso qu’un brigoun de paio toumbe de la trapo.
Ah! bràveis ai, qu’àutrei fes nous fasias tant rire, coumo sias de plagne encuei! Degun
vòu plus si souveni qu’erias lei rèi de la courso; que l’avié que vàutrei que sabias nous
faire escagassa dóu rire, quouro après que lei chivau avien courru, venié voueste tour.
Mi sèmblo que li siéu sus d’aquelo badassiero de Sant-Sepiéucre, mounte sièis vo sèt
milo gènt venien s’estaloueira sus la farigoulo en flour pèr vous vèire courre, estriha de
fres e pimparra coumo noun si pòu mai, emé voueste bridoun flouca de riban rouge e
blu. Vouéstei cavalié avien pas de besoun de sello pèr vous mounta dessus e nimai
d’estriéu pèr si li teni: erias tant bounias!