Remembranço QXP - Université de Provence

LA CASSO
En legissènt lou titre emé la patarafo d’aquéstei ligno, lou leitour jito un «hoi!» que
resclantis à sèt lègo à la roundo. Dins aquéu «hoi!» li a tout un mouloun de questien...
La proumiero es de si demanda se, pèr cop d’asard, seriéu uno feleno de Diano, la
patrouno deis espóusso-sebisso, e se vène li adurre un nouvèu mejan pèr tua foueço
gibié. Eh! bèn, nàni! es pas acò que me fai gafouia ma plumo encuei dins l’escritòri: se
sabiéu coumo fau faire pèr qu’un cassaire si retourne jamai emé lou carnié vuege, bèn
segur vo li diriéu pas! gardariéu lou secrèt pèr iéu, qu’ai jamai touca ‘n fusiéu e que
nimai n’ai pas envejo. Ço que me fai escriéure aquéstei ligno, es un sentimen tout autre.
Oubligado de viéure dins l’escaufit de la grand vilo, li a pièi d’aquélei jour ounte lou
couer n’en pòu plus! Lou brut dei carriero devèn insupourtable. L’on es peginous,
fichimassia. Avès la lagno, e se mandarié voulountié lou manche après la destrau!…
Quouro aquélei moumen de tafagnoun vous aganton, sèmblo que pèr si reviscoula li a
que de quita la vilo, e d’ana ravaudeja dins lei boues o long dei riéu pèr que nouesto amo
siegue countènto. Aquelo idèio vous fai leva de grand matin, e vous vaqui parti pèr avé
lou bouenur de vèire pouncheja l’Aubo, pèr ausi subre-tout lou cant de touto l’auceliho!
Mai, pecaire! l’Aubeto se lèvo toujour dins sa raubo pourpalo e l’eigagno peréu perlejo
en tóutei lei péu d’erbo. Lou Printèms adus toujour de flour; tóutei lei baragno, tóutei
leis aubre soun pimparra de floureto blanco, roso, bluio, vióuleto, jauno gringouriado!
Es uno mescladisso meravihouso que touto aquelo aboundànci de beloio jitado à bèl
èime dins touto la creacien, e la visto se n’alasso jamai. L’on voudrié que lou bèu tèms
aguèsse ges de fin! Mai se la visto trovo de que èstre ravido, noun es pas ansin de
l’ausido!...
Long dei baragno, dins lei roumias, entendès plus lou riéu-chiéu-chiéu dei
bouscarleto, dei cardelino, qu’alestisson lou nis de sei pichoun tresor. Lou roussignòu,
aquéu rèi dei cantaire, vèn plus de sei roulado gatiha vouesto auriho. La bergeireto sauto
plus sus lei mouto, davans lou païsan que licheto, e vèn plus manja lei brigo de pan dins
lou clot de sa man! L’inmourtalo Mirèio, emé soun Vincenet, trouvarié plus, dins la
borno de l’amourié, de pimparrin pèr la grafigna. L’alauseto, la tèsto-negro, lou
quinsoun, lou verdoun, lei serro-fino, lei serin, lei cuou-blanc e tant d’àutrei divin
cantaire, vous fan plus entèndre sa meloudiouso cansoun. S’avèn encaro de flour, avèn
plus ges de cansoun! L’ome a tout destrui!... N’en restara bèn lèu plus ges, d’aquélei
poulits auceloun que lou Creatour metè dins la creacioun, noun pèr que l’ome n’en
veguèsse la fin, mai pèr que li fuguèsson utile e agradiéu.