Remembranço QXP - Université de Provence

LA PROUMIERO COUMUNIEN
A ma coumpagno d’aquéu bèu jour,
Na Marìo Audibert.
Es encuei lou cinq d’abriéu; sènte boumbi moun couer souto moun pitre; pico
talamen fouert que s’ères à moun caire, creiriés qu’un manescau tabaso subre l’enclùmi
pèr n’en fourja un poulit eissadoun, coumo aquéu que ta pauro grand nous prestavo,
quand voulian planta lei plantun de flour que devien servi pèr garni lou grand autar, lou
jour que recebrian lou Bouen-Diéu.
Ai un vounvoun de remembranço que canton à moun entour, coume leis auceloun
canton, cade matin, au leva dóu soulèu. Vese toun bastidoun, quiha sus un cresten, que
se miraio dins l’aigo lindo dóu Riéu de Paradis, mounte l’estiéu, anavian nous asseta à
l’oumbro dei sause pèr estudia noueste catechime. La vese toujour, aquelo tepo flourido
de margarideto, de boutoun-d’or e de penitènt-blu, que nous servié de sèti. Lei
roussignòu, lei bouscarleto, lei cardelino, voulastriavon d’un bouissoun à l’autre pèr fa
sei nis, enterin que nous cantavon sa meloudiouso cansoun e nous aprenien à fa sourti de
noueste góusié lei proumiérei noto. Nautro peréu, falié que sachessian canta la glòri de
Noueste-Segnour.
E lou souleiaire, eila à drecho dóu bastidoun, mounte nous anavian encafourna,
quand la Mountagniero gingoulavo dintre lei pibo! Aquelo cafourno mounte boutavias
lei roso emé leis uiet, pèr que lou fre lei jalèsse pas; ta bravo grand, que fielavo pèr lou
prouvimen de tei souerre e lou tiéu; lei tanto souerre, aquéli doues bràvei fiho que nous
amavon coumo s’erian siéuno… Tout acò, lou vese toujour. E lou brusc plen d’abiho,
que l’ivèr li dounavias de cassounado pèr pousqué agué ‘no toupino de mèu, quouro
arribarié lou mes d’abriéu! Te rapelles coumo sucavian lei troues de bresco que la pauro
grand nous dounavo? Coumo èro bouen, que? S’en lipavian lei det! E la grosso figuiero,
aqui davans lou bastidoun, que nous tenié de figo negro, grosso coumo de merinjano,
pèr nouéstei gousta, lis ai nimai pas óublidado! E aquelo grosso ribo de giróuflado, de
serengat, de majourano que segavian pèr pourta à Nouesto-Damo de Roumigié: que li a
de tèms d’acò, e pamens me sèmblo qu’es aièr!
Digo-me que t’en rèsto peréu la souvenènço, d’aquélei bèu jour passa, mounte, sènso
soucit de l’endeman, s’escoulavo nouesto vido d’enfant!...
E lou Riéu dei Rato, digo-me se l’as eissublia? Coumo erian urous, quand escalavian
lei ribo dóu Riéu de Paradis, que passavian souto leis arcado dóu pouent d’Espen, pèr fa
béure lei petouo!