Remembranço QXP - Université de Provence

LOU MÈCO
Ai toujour ausi dire que cade païs fournis lei siéu. Adounc falié pas que Manosco
restèsse en retard: que li fai, que fugue pèr de fada qu’encuei me boute à l’obro? Quau es
que dins sa vido a pas agu quauque moumen de fadarié?
Noun vous charrarai dóu Tisto que gardavo lei vaco de la Carita ni dóu Jan Labé que
boufavo eis orgue de Sant-Sauvaire, e que marchavo ivèr-estiéu, tèsto descapelado,
anissado coumo uno endivo frisado, e que bandissié sei long bras que bacelavon sèmpre
dins lou vuege, quand leis enfant (sènso mauvaiènço, mai sènso pieta) lou fasien metre
en lagno en li disènt que la superiouro de la Carita valié pas un pié! Vous parlarai nimai
pas dóu paure Louei lou Cliclo qu’anavo bousca d’erbo pèr lei lapin, e que vous disié,
em’ uno facho esbrihaudado:
«— Èè! èè! èè! sabès? quand sarai mouert, anarai au Paradis.
— E que li faras au Paradis?
— Anarai cerca d’erbo pèr lei lapin dóu bouen Diéu!
— Mai se li a ges de lapin au Paradis.
— O que si fe, bord que la mounjo n’a, lou bouen Diéu dèu n’agué bèn mai!
— Adounc tout ço que vous dirai d’élei, es qu’avien uno tèsto à tenta un grand pintre:
èron bèu de ço qu’èron laid!
Es dóu Pauloun lou Mèco que vouele vous charra (es lou soulet que rèsto). Aquéu es
esta un grand gaiard, uno esclapo d’ome que, mau-grat l’asclo de soun cervèu, es esta un
fada plasènt. Fin coumo l’ambre, de pichoutié a toujour servi lei massoun. Es esta lou
pus flame manobro dóu païs. Se vesié un pichot manobro que pleguèsse souto lou fais,
éu vo li levavo, n’i’en cargavo un pus lóugié, e pourtavo lou gros subre lei pus àuteis
estagiero. Escalavo lei escalo emé lei pus gròssei cargo sènso que diguèsse jamai sebo!
Èro jamai las de travaia. Mai Diéu sant preserve qu’aguèsson l’èr de se trufa d’éu!
Un jour que leis óubrié li avien escoundu soun carnié, se diguè:
— Vous agantarai.
E vo mandè pas luen. Dóu tèms qu’èron ana gousta e qu’éu badavo la figo, noueste
fada se bouto en devé de li sarreta à mita lei barroun de l’escalo. Sa besougno facho, se
bouto à-n-un cantoun pèr jouï dóu cop d’uei. Adounc quand lou relògi piquè tres ouro,
nouéstei massoun s’acampon daurin-dauran pèr se remetre à l’obro. Lou proumié que
bouto lou pèd subre l’escalo, pico de mourre. Lou segound te garço un garbias! Lou
tresèime cabusso! E lou Mèco de s’esclafi dóu rire... Èro lou fada qu’avié lou
poumpoun. Acò arribo souvènt.